काठमाडौं- बिहीबार बिहान कलंकीबाट पक्राउ परेकी नेकपाको प्रचण्ड–माधव समूहकी स्थायी समिति सदस्य अष्टलक्ष्मी शाक्यलाई प्रहरीले महाराजगञ्ज लिएर राखेको छ।
उनलाई महानगरीय प्रहरी शिक्षालय महाराजगञ्ज राखिएको प्रहरीले जनाएको छ। प्रचण्ड–माधव समूहले आह्वान गरेको आमहड्तालका लागि सडकमा उत्रिएकी शाक्यलाई प्रहरीले कलंकीबाट पक्राउ गरेको थियो। पक्राउ परेकी शाक्यलाई भेट्न नेता÷कार्यकर्ताहरू महाराजगञ्ज पुगेका छन्।
प्रहरीले अहिलेसम्म ७६ जना नेता/कार्यकर्ता पक्राउ परेको जनाएको छ।
पुस ५ गते प्रतिनिधि सभा विघटन गरिएपछि प्रचण्ड-माधव पक्षले विभिन्न किसिमका आन्दोलन गरिरहेकै थियो। तर, संवैधानिक परिषद्को विवादित सिफारिस अनुसार बुधबार ३२ जना पदाधिकारीले नियुक्ति पाएर सपथ खाएपछि भोलिपल्टैका लागि आमहड्ताल गरिएको हो।
नेपाल प्रहरीका केन्द्रीय प्रवक्ता एसएसपी बसन्त कुँवरले उपत्यका भित्रिने गाडीहरूका लागि स्कटिङको समेत व्यवस्था मिलाइएको बताए।
प्रधानमन्त्री तथा नेकपा अध्यक्ष केपी शर्मा ओली पक्षले माघ २३ गते (बिहीबार) काठमाडौंमा गर्न लागेको शक्ति प्रर्दशनमा उपत्यका बाहिरबाट जसरी पनि मान्छे आउने वातावरण बनाउन गृह मन्त्रालयले सुरक्षा निकायलाई निर्देशन दिएपछि प्रहरीले स्कटिङको व्यवस्था मिलाएको हो।
प्रचण्ड-नेपाल पक्षले आमहड्तालको आह्वान गरेपनि गृहमन्त्रालयले भने उद्योगी तथा व्यवसायीलाई निर्धक्क भएर आफ्नो पेशा–व्यवसाय पूर्ववत सञ्चालन गर्न पनि आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
