काठमाडौं- नेपाल ट्रष्टको कार्यालयले ट्रष्टको स्वामित्वमा रहेको काठमाडौं महानगरपालिका-१३, सोल्टीमोड, ताहाचलस्थित कित्ता नम्बर १८, १९ र २० को जग्गा भाडामा लिएको यति समूहअन्तर्गतको थामसेर्कु ट्रेकिङ प्रालिलाई सम्झौताअनुसारको मात्र भवन निर्माणका लागि नक्सा तथा डिजाइन पेस गर्न पत्र पठाउने निर्णय गरेको छ।
ट्रष्ट सञ्चालक समितिको ६४औं बैठकले नक्सा पासका सम्बन्धमा लिज प्रस्तावसम्बन्धी कागजात, एलपिडीमा उल्लेख भएबमोजिमको बेसमेन्ट र ग्राउण्ड फ्लोरसहित ६ तलाकै विस्तृत इन्जिनियरिङ् डिजाइन पेश गरी पूर्व स्वीकृति लिने प्रकृया अघि बढाउन पत्र पठाउने निर्णय गरेको हो।
बैठकले यसअघि समितिको ६२औं बैठकको निर्णयबमोजिम लेखी पठाइएका विषय कार्यान्वयन गर्न समेत थामसेर्कुलाई पुनः पत्र पठाउने निर्णय गरेको हो।
योसँगै थामसेर्कुले सम्झौताविपरीत १२ तलाको भवन निर्माणका लागि बनाएको डिजाइन तथा नक्सा पासको काम रोकिने भएको छ। थामसेर्कुले कार्यालयबाट पूर्वस्वीकृत नलिइ १२ तलाको भवन निर्माणका लागि महानगरपालिकाबाट नक्सा तथा डिजाइन पास गर्ने गरी प्रक्रिया अगाडि बढाएको थियो।
४ रोपनी ४ आना ३ पैसा ३ दाम जग्गा ३० वर्षलाई भाडामा लिएको थामसेर्कुले दुईपक्षीय सम्झौतामा बेसमेन्ट, ग्राउन्ड फ्लोर र थप ४ तला गरी ६ तलाको भवन बनाउने उल्लेख गरेको थियो। तर, सम्झौता भएको ३ वर्ष पुग्दैगर्दा १२ तलाको भवन बनाउने गरी नक्सा तथा डिजाइन बनाएको थियो।
सम्झौताको बुँदा नम्बर १२.१२ बमोजिम प्रालिबाट लिज प्रस्ताव सम्बन्धी कागजात पेश गर्दा बेसमेन्ट, ग्राउन्ड फ्लोरलगायत गरी ६ तलाको भवन निर्माण गर्ने प्रस्ताव पेश भई सोही बमोजिम लिजभाडा निर्धारण गरी सम्झौता भएको थियो। तर, थामसेर्कुले २०७४ मंसिरमा भएको करार सम्झौता पत्र भन्दा बाहिर गएर १२ तलाको भवन बनाउने पहल अघि बढाएको थियो। भवन निर्माणका लागि कार्यालयको पूर्वस्वीकृति लिई काठमाडौ महानगरपालिकामा पेश गर्नुपर्नेमा जानकारी नै नगराई महानगरमा पुगेको थियो।
विस्तृत इन्जिनियरिङ्ग डिजाइन, पूर्वस्वीकृति, भवन निर्माण कार्यतालिका पेश गरी ३ वर्षमा भवन निर्माण गरी सक्नुपर्ने सम्झौतामा उल्लेख थियो। सोहीअनुसार काम नभएको भन्दै अहिले सञ्चालक समितिबाट निर्णय गरिएको एक सञ्चालकले जनकारी दिए।
ट्रष्ट कार्यालय पनि सम्झौतामा ६ तलाको भवन निर्माण हुने उल्लेख भएको र थामसेर्कुले १२ तलाको नक्सा पास गर्न लागेको कारण नक्सा पासको काम रोकिदिएको स्वीकार गर्दै अहिले उक्त निर्णय भएको जनाएको छ।
सम्झौतामा नक्सा तथा भवनको डिजाइन नेपाल ट्रष्टको कार्यालबाट अनुमोदन हुनुपर्ने उल्लेख छ। काम पनि सोहीअनुसार हुनुपर्ने कार्यालयको भनाइ छ।
सार्वजनिक खरिद ऐनविपरीत प्रतिस्पर्धा
सार्वजनिक खरिद ऐनले सार्वजनिक रूपमा गरिएको टेन्डरमा सामान्यतः दुईभन्दा धेरै कम्पनीका बीचमा प्रतिस्पर्धा हुनुपर्ने भन्छ।
तर, नेपाल ट्रष्टले कालिमाटीको यो जग्गा दिँदा दुईवटा सीमित कम्पनीलाई मात्र प्रतिस्पर्धा गराएको थियो। दुईभन्दा कम कम्पनी प्रतिस्पर्धामा सहभागी भएमा पुनः टेन्डर गराउनुपर्ने हुन्छ।
टेन्डरमा थामसेर्कु र क्लिन इन्फ्रास्ट्रक्चर प्राली सहभागी भएका थिए। तर, ट्रष्टले उक्त टेन्डर थामसेर्कुलाई दिने निर्णय गरेको थियो।
सम्झौतामा पहिलो ३ वर्षका लागि निर्माण अवधि मानेर वार्षिक ६ लाख भाडा तिर्ने उल्लेख भएपनि अहिलेसम्म कम्पनीले भवन पनि बनाएको छैन, भाडा रकम पनि तिरेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
