काठमाडौं- नेपाली कांग्रेसले प्रतिनिधि सभा विघटन विरुद्ध सडकमा सशक्त आवाज उठाउन नसकेकोप्रति वरिष्ठ नेता रामचन्द्र पौडेलले असन्तुष्टि व्यक्त गरेका छन्।
प्रतिनिधि सभा विघटनलाई असंवैधानिक ठहर गरेपनि सडकमा उठाउने मुद्दाविहीन भएको नेता पौडेलले बताए। मंगलबार केन्द्रीय समितिको बैठकमा पौडेलले भने, ‘आन्दोलन त गरियो। तर, आन्दोलनको लक्ष्यमा कांग्रेस प्रष्ट भएन। उद्देश्यहीन आन्दोलन भयो।’
असंवैधानिक भनिसकेपछि संसद् पुर्नस्थापनाको माग पनि सडकमा उठाउनुपर्ने उनको जोड थियो। मंगलबार बसेको बैठकले केन्द्रीय तहको विरोध प्रर्दशन गर्ने निर्णय गरेन।
प्रतिनिधि सभा विघटनको विरोध कांग्रेसले गरेको ‘देखाउन कै लागि’ जिल्ला तहको विरोध प्रर्दशनको मिति तोकिएको छ। विरोध प्रर्दशनको जिम्मेवारी जिल्ला कार्यसमिति, भ्रातृ संस्था र शुभेच्छुक संस्थालाई दिइएको छ।
सबै जिल्लामा १९ गते भ्रातृ संस्थाले, २४ गते शुभेच्छुक संस्थाले विरोध प्रर्दशन गर्ने निर्णय गरिएको छ। माघ ३० मा जिल्ला कार्यसमितिले आयोजना गर्ने गरी सबै सदरमुकाममा विरोध प्रर्दशन गरिने भएको छ।
१ बजे बोलाइएको बैठक तीन बजे शुरू भएर करिब दुई घण्टा बसेर सकिएको थियो। बैठक शुरू भएपछि सभापति शेरबहादुर देउवाले बैठकको एजेण्डा पेश गर्न महामन्त्री पूर्णबहादुर खड्कालाई समय दिएका थिए।
खड्काले क्रियाशील सदस्यता नवीकरण र वितरण माघ महिनाभित्र सक्ने गरी छलफलमा प्रस्ताव ल्याएका थिए। बैठकले उक्त प्रस्तावलाई पारित गरेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।