काठमाडौं- सभामुख अग्निप्रसाद सापकोटाले संसद्ले सरकारलाई असहयोग नगरेको बताएका छन्। सोमबार अन्तरपार्टी महिला सञ्जालको ध्यानाकर्षण प्रस्ताव बुझ्दै उनले नीति तथा कार्यक्रमदेखि बजेट पास गर्नेसम्मका काममा सरकारलाई सहयोग गरेको बताए।
प्रतिनिधि सभा विघटन गरेपछि प्रधानमन्त्री केपी शर्मा ओलीले प्रतिनिधि सभाले सहयोग नगरेको आशयका अभिव्यक्ति दिइरहेका छन्। उनले सभामुख सापकोटाको पनि आलोचना गर्ने गरेका छन्।
तर, सापकोटाले भने ‘सहयोग भएन, अराजकता भयो, अनुशासन भएन’ भन्ने कुरा सत्यमा आधारित नभएको बताए। ‘हामीले लोकतन्त्रको मूल्य मान्यतालाइ स्थापित गर्न र छलफलको वातावरण बनाउनका लागि भगरथ मेहनत गर्यौं। हामी सांसदहरु, सचिवालयका कर्मचारीहरु सबैले अहोरात्र खटेर सदन सञ्चालन गरेका थियौँ’, सापकोटाले भने।
संसद् सञ्चालन गर्नुपर्छ भनेर आइरहेका कुरालाई आफूले गम्भीरतापूर्वक लिएको सभामुख सापकोटाको भनाइ छ।
‘देशका सबै संविधानविद्, कानूनविद्, राजनीतिक पार्टीका नेताहरुले चिन्ताका साथ संसद् सञ्चालन गर्नुपर्छ भन्ने आवाज उठाइराख्नु भएको छ’, उनले भने, ‘त्यस सम्बन्धमा म गम्भीरतापूर्वक चिन्तन-मनन् गरिरहेको छु। मैले परिस्थितिलाई धेरै गम्भीरतापूर्वक, जिम्मेवारीपूर्वक अध्ययन, विश्लेषण गरिरहेको छु।’
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।