काठमाडौं- संसद विघटन भएसँगै देशको राजनीतिमा सम्पूर्ण नेपालीको ध्यान आकर्षित भएको छ। नेताको भाषणबाटै हुने दोहोरी सुनेर रमाउनेको संख्या पनि बढिरहेको छ। यस्तो अवस्थामा नेपालका कलाकारको अवस्था के छ त? उनीहरुले देशको राजनीतिमा कत्तिको चासो देखाइरहेका छन् ?
नेपाल लाइभले यी विषयमा जिज्ञासा राख्नका लागि केही कलाकारलाई टेलिफोन सम्पर्क गर्यो। अधिकांश कलाकारले फोन उठाएनन्, उठाएका केहीले आफू निकै व्यस्त भएको र यो विषयमा कुरा गर्ने फुर्सद नभएको बताए।
टेलिफोनमा देशको राजनीतिबारे वार्तालाप हुन नसकेपछि नेपाल लाइभले उनीहरुको सामाजिक सञ्जाल चिहायो। जसमा जम्मा तीन कलाकारले मात्रै देशको राजनीतिमा चासो देखाएको पाइयो।
करिष्मा मानन्धर
बिहीबार दिउँसो १ बजेर ३२ मिनेट जाँदा अभिनेत्री करिश्मा मानन्धरले सामाजिक सञ्जाल फेसबुकमा लामो स्ट्याटस पोस्ट गरिन्। उनको उक्त स्ट्याटस देशमा भइरहेको राजनीतिक घटनाक्रम, त्यसमा उनको प्रतिक्रिया र त्यो प्रतिक्रियामा आएका टिप्पणीको जवाफ थियो।
उनले स्ट्याटसको सुरुमै प्रश्न गरेकी छन्, ‘के मैले स्वतन्त्र नागरिकको हैसियतमा आफ्ना कुरा पनि राख्न नपाउने? अहिलेको राजनीतिले मलाईमात्रै होइन, सबैलाई आजित बनाएको छ। शिक्षा, स्वास्थ्य, सिनेमा, उद्योग, कृषिलगायतका कुनै क्षेत्र सन्तोषजनक छैन।’
कोरोना महामारीले ठप्प भएको अर्थतन्त्र बल्ल चलायमान हुन खोजेको भन्दै उनले लेखेकी छन्, ‘यी सबै समस्या छाडेर राजनीतिक दलहरु जुँगाको लडाइँमा मात्रै रमाउने गरेको विकृति देखियो।’
उनी यतिमै रोकिएकी छैनन्। अगाडि लेखेकी छन्, ‘सरकारको पहिलो प्राथमिकता सुखसुविधा हुनुपर्नेमा कुर्सी र पार्टीका नेताबीचको झगडा अगाडि आएको छ।’
‘जनतालाई मर्का पर्दा सडकमा नआउने तर संसद विघटन भएर आफैलाई मर्का परेपछि भने सडकमा भीडभाड बढाउने नेतालाई कुनै हालतमा राम्रो भन्न सकिँदैन‚’ उनले लेखेकी छन्।
अन्त्यमा यी सबै कुरा नदेखेझैं बस्न नसकेर आफूले स्ट्याटस लेखेको र संविधानको अभिव्यक्ति स्वतन्त्रताको अधिकार उपयोग गरेको बताएकी छन्। साथै राजनीतिक दलहरुका विकृति, विसंगति, असफलता र कमजोरीलाई ढाकछोप गरेर बाेल्न आफू राजनीतिक कार्यकर्ता नभएको पनि बताएकी छन्।
कुनै समय नयाँ शक्ति पार्टीमा लागेकी उनी अहिले भने आफूलाई स्वतन्त्र नागरिक भन्न रुचाउँछिन्।
रेखा थापा
विभिन्न पार्टीको सदस्यता लिइराख्ने तर कुनै पार्टीले पनि चुनावमा टिकट नदिने कलाकार रेखा थापाले पनि देशको राजनीतिक विषयमा सामाजिक सञ्जालमा छोटो टिप्पणी गरेकी छन्। कुनै समयमा पुष्पकमल दाहाल प्रचण्डसँग कुम जोडेर नाचेकी थापाले सामाजिक सञ्जाल फेसबुकमा लेखेकी छन्, 'एउटा सानो काम गरौं, हामीभित्र पनि एउटा कमजोर सत्ता छ र डराएर बाँच्छ भन्ने स्वीकार गरौं।’
उनले प्रश्न गर्दै अगाडि लेखेकी छन्, ‘हामी हाम्रो स्वाधीनता जोगाउन सक्षम छौं?’ रेखाले उक्त स्ट्याटस बिहीबार साँझ ४ बजेर ११ मिनेटमा लेखेकी हुन्।
मनिषा कोइराला
बलिउड फिल्ममा लामो समयसम्म राज गरेकी मनिषा कोइरालाले भने सामाजिक सञ्जाल फेसबुकमा एउटा सांकेतिक चित्र सेयर गरेकी छन्। चित्रमा राजामहाराजाले रैतीसँग टीका थापिरहेको देख्न सकिन्छ।
उनी नेपाल आएसँगै सामाजिक कार्यहरुमा सक्रिय भएर लागेकी छन्। केही समयअघि पृथ्वी जयन्ती धुमधामसँग मनाउने अभियानमा लागिपरेकी उनको सामाजिक सञ्जाल हेर्दा मनिषा जनतालाई राजा सम्झाउने प्रयासमा छिन्। मनिषाले उक्त पेन्टिङ शुक्रबार दिउँसो करिब २ बजेतिर सामाजिक सञ्जाल फेसबुकमा राखेकी हुन्। उनले दुई हात जोडेर नमस्कार गरेको इमोजी राख्दै उक्त चित्र पोष्ट गरेकी हुन्।
यीबाहेक नेपालका अन्य अभिनेता अभिनेत्री कसैले पनि राजनीतिक विषयमा आफ्ना धारणा राखेका छैनन्। अभिनेता राजेश हमाल यतिखेर कालिन्चोकमा चिसोसँग रमाइरहेका छन्। तस्बिर हेर्दा उनी कुनै भिडियो छायांकनका लागि त्यता पुगेजस्तो देखिन्छ।
केकी अधिकारी, निशा अधिकारी, ऋचा शर्मा, रिमा विश्वकर्मा, प्रियंका कार्कीलगायत सबै अभिनेत्रीहरु महंगा कपडा लगाएका फोटो सेयर गर्नमा मस्त छन्। निश्चल बस्नेत, दयाहाङ राई, सौगात मल्ल लगायतका अभिनेताहरु पनि आफैंमा मग्न छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
