काठमाडौं- अखिल नेपाल फुटबल संघ (एन्फा)ले पदाधिकारी मनोनयन व्यवस्थालाई खारेज गर्दै प्रत्यक्ष निर्वाचित प्रणालीलाई पारित गरेको छ।
काठमाडौंमा मंगलबार सम्पन्न एन्फाको १९औं साधारण सभाले निर्वाचन प्रणालीबाट मात्र पदाधिकारी चयनको व्यवस्था सुरु गरेको हो। यसअघिको व्यवस्थाअनुसार केही कार्यसमितिले परिस्थिति अनुकुल पदाधिकारी मनोनयन गरिरहेका थिए।
साधारण सभाले १७ सदस्यीय कार्यसमितिलाई बढाएर २१ सदस्यीय कार्यसमितिमा पुर्याउने निर्णय समेत गरेको छ। एन्फाका प्रवत्ता किरण राईले आगामी साधारण सभाबाट बन्ने कार्यसमितिमा संशोधित विधान लागू हुने बताए।
निर्वाचनमार्फत् आउने २१ सदस्यीय नयाँ कार्यसमितिमा २ जना महिला अनिवार्य गरिएको छ। फिफाको गाइडलाइन अनुसार एन्फाले मनोनितको कोटालाई बन्देज लगाउँदै सबै कार्यसमिति निर्वाचनमार्फत् चुनिने व्यवस्था गरेको हो।
मंगलबारकै साधारण सभाले आगामी वर्ष २०७७/७८ को लागि वार्षिक बजेट तथा कार्यक्रम पनि पारित गर्यो। राष्ट्रिय लिग, फुटसल छनोट प्रतियोगिता, विभिन्न वर्कसप, बाँकी रहेको ‘बी’ डिभिजन लिग, प्रदेश लिग, एन्फा प्रेसिडेन्ट कप, सहिद स्मारक ‘सि’ डिभिजन लिग, राष्ट्रिय महिला लिग, अन्तर्राष्ट्रिय पुरुष फुटबल प्रतियोगिता, फोर नेसन्स कप लगाएतका कार्यक्रम सार्वजनिक गरेको हो।
उक्त कार्यक्रममा लागि एन्फाको ८२ करोड ६६ लाख ४२ हजार २ सय ४० रुपैयाँको वार्षिक कार्यक्रमलाई साधारण सभाले पारित गरेको प्रवक्ता राईले जानकारी दिए।
साधारण सभाले, अध्यक्षको वार्षिक प्रतिवेदन, आम्दानी र खर्च विवरण लगाएका विषयलाई पारित गरेको हो। गत वर्ष एन्फाले ४० करोड २६ लाख आम्दानी गरेको छ भने ४१ करोड २६ लाख रुपैयाँ खर्च गरेको प्रवक्ता राईले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
