काठमाडौं- नेपाली कांग्रेसका नेता गगन थापाले प्रतिनिधि सभा विघटनको विषयमा सर्वोच्च अदालतले शाख नगिराउने गरी फैसला गर्नुपर्ने बताएका छन्।
प्रतिनिधि सभा विघटनको विरोधमा नेपाली कांग्रेसले राजधानीमा आयोजना गरेको विरोध सभामा नेता थापाले अदालतप्रतिको विश्वास र भरोसा नटुट्ने गरी निर्णय हुनुपर्ने बताएका हुन्।
विरोध कार्यक्रममा नेता थापाले प्रधानमन्त्री केपी शर्मा ओलीले सार्वजनिक रूपमा नै 'अदालत मिलाएको छु' भन्दै बाहिर हिँडिरहेको कुराप्रति ध्यानकर्षण गर्दै अदालतले विवेक प्रयोग गर्नुपर्नेमा जोड दिए।
'प्रधानमन्त्रीले त खुलमखुल्ला भन्नुभएको छ। मैले अदालत मिलाएको छु भनेर। हामी अदालतको सम्मान नगुमोस् भन्ने चाहन्छौं,' विरोध सभामा नेता थापाले भने, 'अदालतले विवेक प्रयोग गर्नुपर्छ। अदालतले न्याय गर्नुपर्छ। न्याय गरेँ मात्र भनेर हुँदैन। न्याय गरेको देखिनुपर्छ।'
उनले प्रधानमन्त्रीले भनेजस्तै हो भने अदालतले शाख र सम्मान गुमाउने र सर्वोच्च अदालतको नाम नै फेरिएर 'सेटिङ अदालत' हुन पुग्ने पनि बताए।
'अदालतलाई हाम्रो संविधानले सर्वोच्च अदालत भनेर मात्र चिन्छ। सम्मानित अदालत त हामीले बनाएको हो। सम्मान भनेको कुरा आर्जन गर्ने हो। जबर्जस्ती कहीँबाट सम्मान आउँदैन। त्यो सम्मान नगुमोस्। अदालतको शाख नगुमोस्,' उनले भने, 'यदि अदालतको शाख गुम्यो भने त्यसपछि हाम्रो अदालतको नाम सर्वोच्च अदालत होइन। सेटिङ अदालत हुन पुग्छ। त्यो नहोस् भन्ने हाम्रो चाहना हो। विश्वास हो, भरोसा हो। अदालतप्रति हाम्रो विश्वास छ। त्यसकारण चिन्ता हाम्रो छ। यो अदालतप्रतिको सम्मानका कारण भनेको हो।'
भिडियो:
नेता थापाले अदालतप्रति पनि पछिल्ला दिनमा धेरै प्रश्न उठेको भन्दै ती प्रश्नहरू अदालतको निर्णयबाट खारेज हुनुपर्नेमा जोड दिए।
'अदालतमाथि पनि थुप्रै प्रश्न उठेका छन्। ती सबै प्रश्न सडकबाट खारेज हुँदैन। अदालतको निर्णयले ती प्रश्नहरू खारेज गरून् भन्ने हामी चाहन्छौं,' उनले भने।
विरोध सभामा नेता थापाले अदालतबाट नै दर्ता भएको पत्रका विषयमा अदालतप्रति प्रश्न उठाएका छन्। उनले अदालतबाट हराएका पत्रका विषयमा प्रधानन्यायाधीसले जवाफ दिनुपर्ने बताए।
'अदालतमा दर्ता भएको पत्र हराएको छ। श्रीमानले यसको जवाफ दिनुपर्छ। पत्र कहाँ गयो? अदातलमा दर्ता भएको पत्र सरकारले कसरी लिएर गयो? दोषी को हो? दोषीलाई दण्ड दिनुपर्छ। यसलाई यताउता पन्छाएर मात्र चित्त बुझ्दैन। चित्त हाम्रो बुझ्नुपर्छ,' विरोध सभामा नेता थापाले भने।
नेता थापाले सरकारले नागरिकको पक्षमा केही काम नगरेको भन्दै प्रधानमन्त्री ओलीको आलोचना पनि गरेका छन्।
'नागरिकका पक्षमा केही गर्नु भएन। ९ महिना सिंहदरबार टेक्नुभएन। यस्तो बेला निर्वाचन थोपरेर दुई तिहाई चाहियो भन्नुहुन्छ। चुनावलाई ४० अर्ब चाहिन्छ। अनि, कोभिड नियन्त्रणलाई दुई तिहाई मलाई चाहियो भनी जवाफ लेख्ने? यस्तो निर्लज्जता? यो निर्लज्जताको पराकाष्ठा हो,' उनले भने।
प्रधानमन्त्रीले कीर्ते गरे
नेता थापाले असंवैधानिक र अराजनीतिक रुपमा प्रनितिधिसभा विघटन गरेका प्रधानमन्त्री ओलीले कीर्ते काम गरेको पनि बताए।
प्रधानमन्त्री ओलीले प्रतिनिधि सभा विघटनका लागि राष्ट्रपतिलाई सिफारिस गरेको पत्र नै नक्कली तयार गरेको भन्दै नेता थापाले ओलीले कीर्ते काम गरेको आरोप लगाएका हुन्।
'प्रधानमन्त्रीको कदम असंवैधानिक र अराजनीतिक त छँदै थियो। कीर्ते पनि छ। पुस ५ मा प्रतिनिधि सभा विघटन गरेको सिफारिसमा धारा उल्लेख छैन। फेरि अर्को पत्र पठाइएको छ। अदालतबाट पत्र फिर्ता गरिएको छ। ढाँटेको कुरा काटे पनि मिल्दैन भनेको यही हो,' उनले भने।
उनले प्रधानमन्त्री ओलीको नाम फेरेर अब कीर्तेप्रसाद ओली भएको पनि बताए।
'तपाईंको कीर्ते काम देखेपछि मैले भन्नुपर्ने भएको छ। तपाईंको नाम बदली दिनुस् अब। केपीबाट खड्ग प्रसाद होइन, कीर्ते प्रसाद ओली भन्ने बेला आएको छ। प्रधानमन्त्रीले यो तहको कीर्ते गर्न मिल्छ?,' नेता थापाले आक्रोशित हुँदै भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
