काठमाडौं- ब्रोकर कम्पनीहरुले सेयर बजारसम्बन्धी सचेतना अभिवृद्धिका लागि नाफाको एक प्रतिशत अनिवार्य खर्च गर्नुपर्ने भएको छ। केन्द्रीय निक्षेप कम्पनी, क्रेडिट रेटिङ एजेन्सीले पनि नाफाको एक प्रतिशत सामाजिक उत्तरदायित्व अन्तर्गत खर्च गर्न नेपाल धितोपत्र बोर्डले निर्देशन दिएको हो।
उक्त संस्थाहरुले खुद मुनाफाको कम्तिमा एक प्रतिशत रकम छुट्टाई संस्थागत सामाजिक उत्तरदायित्वसम्बन्धी कार्य अन्तर्गत लगानीकर्ता शिक्षा तथा सचेतना अभिबृद्धि कार्यमा खर्च गर्नुपर्ने र खर्च गर्दा सबै प्रदेशमा आवश्यकता अनुरुप खर्चको वितरण हुनु पर्ने व्यवस्था गरिएको बोर्डले जनाएको छ।
मर्चेन्ट बैंकरको सन्दर्भमा संस्थागत सामाजिक उत्तरदायित्व सम्बन्धी व्यवस्था कार्यान्वयनमा आइरहेको छ। धितोपत्र व्यवसायीको खुद मुनाफाबाट एक प्रतिशत रकम संस्थागत सामाजिक उत्तरदित्व कोषमा छुट्टयाउने र प्रमुख रुपमा उक्त कोष मार्फत लगानीकर्ताको ज्ञान तथा सचेतना अभिबृद्धि गर्ने कार्यका लागि आवश्यक बजेटको व्यवस्था भई लगानीकर्ताका लागि धितोपत्र बजारसम्बन्धी शिक्षा तथा सचेचना अभिवृद्धि कार्यक्रम संचालन हुने जसबाट लगानीकर्ताले सूसुचित निर्णय लिन सहयोग पुगी लगानीकर्ताको हित हुनुका साथै बजार विकास विस्तारमा समेत सहयोग पुग्ने बोर्डले जनाएको छ।
धितोपत्रको प्राथमिक बजार देशभर ७७ जिल्लामा पुगिसकेको र एउटै प्रारम्भिक निष्काशनमा १० लाखभन्दा बढी लगानीकर्ताको सहभागिता भैरहेको बोर्डले उल्लेख गरेको छ।
दोस्रो बजारमा समेत अनलाइन प्रणालीको प्रयोग भई देशका प्रमुख शहरबाट कारोबार गर्न सक्ने व्यवस्था भएको र बजारमा नयाँ लगानीकर्ताको प्रवेश समेत बढ्दै गइरहेको सन्दर्भमा प्रविधिमैत्री हुने गरी लगानीकर्ता शिक्षा तथा सचेतनामा विशेष जोड दिनुपर्ने र यसका लागि धितोपत्र बजासम्बद्ध सबै पक्षहरुको सहभागीताको आवस्यकता देखिएकोले यस्तो निर्देशन दिइएको बोर्डले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
