काठमाडौं- प्रहरी वरिष्ठ उपरीक्षकबाट प्रहरी नायब महानिरीक्षक पदमा बढुवा भएका ९ डिआइजीलाई दर्ज्यानी चिन्ह प्रदान गरिएको छ। प्रहरी महानिरीक्षक शैलेश थापा क्षेत्रीले प्रहरी प्रधान कार्यालयमा बिहीबार आयोजित कार्यक्रमकाबीच उनीहरुलाई दर्ज्यानी चिन्ह प्रदान गरेका हुन्।
डिआइजीमा बढुवा भएका गणेश बहादुर ऐर, पुरुषोत्तम कँडेल, राजेशकुमार लाल कर्ण, डा देवबहादुर बोहरा, दिवेश लोहनी, राम कृपाल साह, उमेश रञ्जितकार, प्रकाश अधिकारी र मुकुन्दराज आचार्यलाई दर्ज्यानी चिन्ह प्रदान गरिएको हो।
बढुवा भएका डिआइजीहरुलाई बधाई दिँदै आइजी थापा क्षेत्रीले नयाँ ऊर्जाका साथ निर्वाह गर्न निर्देशन दिए। उक्त अवसरमा पदोन्नति भएका प्रहरी अधिकृतहरुका तर्फबाट मन्तव्य व्यक्त गर्दै डिआइजी पुरुषोत्तम कँडेलले प्रचलित कानुन र संगठनको नीति निर्देशन अनुसार काम गर्ने प्रतिबद्धता व्यक्त गरे।
यसैबीच, महानिरीक्षक क्षेत्रीले सरुवा भई जान लागेका प्रहरी उपरीक्षक र प्रहरी नायब उपरीक्षकहरुलाई निर्वाचनलाई मध्यनजर गरेर काम गर्न निर्देशन दिएका छन्।
आइजी थापा क्षेत्रीले हालको परिस्थितिलाई मनन र विश्लेषण गरी सोही अनुरुपको कार्य योजना बनाई अगाडि बढ्न निर्देशन दिए। हालको सुरक्षा चुनौती व्यवस्थापन, तस्करी तथा गुन्डागर्दी नियन्त्रण र घोषित निर्वाचनलाई मध्यनजर राखी आवश्यक तयारीमा जुट्नुपर्नेमा उनले जोड दिए।
आइजी थापा क्षेत्रीले हालै संगठनले लागू गरेको नेपाल प्रहरी कार्य योजना र प्रहरी कर्मचारीले पालना गर्नुपर्ने आचारसंहिता लगायतका नीति निर्देशनलाई अक्षरस पालना गरी लागू गर्नुपर्ने बताए।
सेवाग्राहीले देख्ने र भोग्ने गरी प्रहरी कार्यमा सकारात्मक परिवर्तन आएमा आफ्नो उपस्थिति सार्थक हुने हुनाले सबैले आफ्नो कर्तव्य र संगठनले दिएको जिम्मेवारी पूरा गर्नुपर्ने थापाले उल्लेख गरे।
कार्यालय व्यवस्थापन, साधनस्रोतको उचित परिचालन र मर्मतसम्भार लगायतका दैनिक क्रियाकलापमा विशेष ध्यान दिई चुस्त दुरुस्त रुपमा प्रस्तुत हुन समेत उनले निर्देशन दिए।
प्रहरी प्रधान कार्यालयले यही पुस २१ गते ३० जना प्रहरी उपरीक्षकहरू र ६९ जना प्रहरी नायब उपरीक्षकहरुको सरुवा गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
