काठमाडौं- स्वास्थ्य तथा जनसंख्या मन्त्रालयले काठमाडौं उपत्यकामा वायु प्रदूषणको बढेको भन्दै केही दिन मर्निङ वाकमा ननिस्कन सचेत गराएको छ।
स्वास्थ्य मन्त्रालय अन्तर्गतको स्वास्थ्य आपत्कालीन तथा विपद् व्यवस्थापन इकाईले वायुप्रदुषणले श्वासप्रश्वासमा कठिनाइ लगायतका स्वास्थ्य समस्या देखा पर्ने भन्दै विभिन्न सावधानी अपनाउन र केही दिनका लागि मर्निङ वाकमा समेत ननिस्कन सर्वसाधारणलाई अपिल गरेको हो।
काठमाडौं उपत्यकामा दुई दिनदेखि वायु प्रदूषणको स्तर उच्च भएको भन्दै वातावरण विभागले समेत सर्वसाधारणलाई सावधानी अपनाउन सचेत गराइसकेको छ।
स्वास्थ्य मन्त्रालयले मर्निङ वाकमा जाने वा घरबाहिर गएर शारीरिक व्यायाम गर्ने गरिएको छ भने केही दिनका लागि रोक्न, फोहोरहरुको उचित व्यवस्थापन गर्ने तर नजलाउने, घरबाहिर ननिस्कने र निस्कनै पर्ने अवस्था भएमा मास्कको अनिवार्य प्रयोग गर्न र कोभिड-१९ का लागि तोकिएको जनस्वास्थ्यका मापदण्ड पालना गर्न अनुरोध गरेको छ।
साथै, धुलो धुँवा उड्ने खालका पेसा, व्यवसाय, निर्माण कार्यहरु केही दिनलाई स्थगत गर्न पनि मन्त्रालयले अनुरोध गरेको छ।
जनस्वास्थ्य ऐन, २०७५ को दफा ४० मा वायु प्रदुषणका कारण जनस्वास्थ्यमा पर्ने प्रभावहरुलाई मध्यनजर गरी सरकारले मापदण्ड तोक्न सक्ने व्यवस्था गरेको छ।
तर, हालसम्म उक्त व्यवस्था अनुसार मापदण्डहरु तोकिएको छैन। उक्त व्यवस्था नतोकिएकाले मन्त्रालयलृ आकस्मिक रुपमा माथि उल्लेखित कार्य पालना गर्नगराउन अपिल गरेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
