काठमाडौं- प्रधानमन्त्री केपी शर्मा ओलीको राजीनामा जनताले नमागेकाले पद छोड्नु नपर्ने परराष्ट्रमन्त्री प्रदीप ज्ञवालीले स्पष्टीकरण दिएका छन्। जनताप्रति प्रधानमन्त्री उत्तरदायी भएकाले चार नेताले राजीनामा माग्दैमा दिन नमिल्ने उनको तर्क थियो।
प्रधानमन्त्री केपी शर्मा ओली पक्षको विद्यार्थी संगठनमा बोल्ने क्रममा मन्त्री ज्ञवालीले भने, ‘जनताले प्रधानमन्त्रीले राजीनामा मागेको भए सहजै दिनुहुन्थ्यो। जनताले प्रश्न उठाएको भए पदमा बस्ने नैतिक आधार रहँदैन। केही नेताले प्रश्न उठाएको आधारमा राजीनामा दिन मिल्दैन।’
प्रधानमन्त्रीको पद जनता मार्फत प्राप्त भएकाले जनतालाई नै नासो बुझाउने गरी निर्वाचनको घोषणा गरिएको उनले बताए। ‘निर्वाचन मार्फत सार्वभौमसत्ता जनताकहाँ पुर्याउन खोजेका हौं,’ उनले भने, ‘म असक्षम रहेछु। कम्युनिस्ट पनि रहेनछु, समाजवादी पनि रहेनछु भनी आन्दोलनलाई भड्खालोमा हाल्ने कि अगाडि बढ्ने?’
पार्टीभित्र दुई अध्यक्षको कुर्ची सारिएको विवादको समेत मन्त्री ज्ञवालीले स्पष्टीकरण दिए। प्रधानमन्त्रीलाई संक्रमण जोखिम उच्च भएर कुर्ची टाढा राखिएको उनले बताए। कुर्ची सारेकै विषयमा एक दिनभरको स्थायी कमिटी बैठक प्रभावित भएको समेत उनले स्मरण गरे। कुर्चीकै विषयमा छलफल हुँदाँ आफैप्रति प्रति धिक्कार लागेको बताए।
पार्टी एकतापछि अधिकांश समय नेता व्यवस्थापनमा खर्चिनु परेको ज्ञवालीले स्मरण गरे। उनले भने, ‘हाम्रो अधिकांश समय नेताको व्यवस्थापनमा गयो। जति पानी खाएपनि तिर्खा नमिट्ने रहेछ उहाँहरुको।’
आगामी महाधिवेशनपछि अध्यक्ष र प्रधानमन्त्री नबन्ने प्रतिबद्धता जनाउँदा पनि अर्को पक्षले महाधिवेशन गर्नै नचाहेको आरोप ज्ञवालीले लगाए।
प्रचण्डले पार्टीमा पेश गरेको प्रतिवदेनलाई आरोपपत्रको संज्ञा दिदैँ ज्ञवालीले भने, ‘प्रधानमन्त्रीलाई लगाएको आरोप प्रमाणित भए पार्टीले मात्रै होइन। संविधानसमेत आकर्षित भएर प्रधानमन्त्रीले कारबाही भोग्नुपर्ने थियो।’
सत्ता सञ्चालनका क्रममा पार्टीभित्रको प्रतिपक्षले काम गर्न नसकिने अवस्था आएको उनले बताए। ‘बरु, प्रतिपक्षले औपचारिक राजीनामा कहिले मागेन। चार जना नेतालाई रिझाउन नसक्दा पार्टी हलचल गर्न नसक्ने अवस्थामा पुग्यो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
