काठमाडौं– नेपाली कांग्रेसको बैठकमा हिन्दूराष्ट्रको एजेन्डा कांग्रेसले उठाउनुपर्ने आवाज निस्केको छ।
प्रतिनिधि सभा विघटनका सन्दर्भमा पार्टीको धारणा तय गर्न बोलाइएको बैठकमा हिन्दूराष्ट्रको पक्षमा कांग्रेस उभिनुपर्ने तर्क अघि सारिएको छ। सभापति शेरबहादुर देउवा पक्षीय दुई केन्द्रीय सदस्यले हिन्दूराष्ट्रको मागसहित कांग्रेस सडकमा जानुपर्ने सुझाव दिएका छन्। नेताहरु शंकर भण्डारी र देवेन्द्रराज कँडेलले हिन्दूराष्ट्र कायम हुनुपर्ने मुद्दा कांग्रेसले सडकमार्फत् उठाउनुपर्ने माग राखेका हुन्।
कांग्रेसले हिन्दूराष्ट्रको माग नउठाए अरु शक्तिले कब्जा गर्ने प्रति उनीहरुले नेतृत्वलाई सचेत बनाए। भण्डारी कांग्रेसका पूर्वनेता खुमबहादुर खड्का निकट हुन्। कँडेल सभापति देउवा निकट केन्द्रीय सदस्य हुन्।
बैठकमा नेता डा मीनेन्द्र रिजालले कांग्रेसले सडक आन्दोलनमा जोड दिनुपर्ने बताएका छन्। संसद विघटनको मुद्धा लिएर आन्दोलनमा जान नहुने तर्कसमेत बैठकमा उठेको छ। आन्दोलनमा नगई विरोध मात्रै गर्नुपर्ने कतिपय नेताको धारणा छ।
१९ गते अर्को बैठक
कांग्रेसको अर्को बैठक पुस १९ मा बस्ने भएको छ। पार्टीको औपचारिक धारणा तय गर्न बसेको बैठकलाई ‘बैठकका लागि बैठक’ भएजस्तै बनाइएको छ।
अदालतको धारणा कुर्ने संस्थापन पक्षको चाहनाअनुरुप बैठक लम्ब्याउन खोजिएको संस्थापनइतरका नेताहरुले बताएका छन्। दिउँसो १ बजे बोलाउने गरिएको बैठकमा चार जनाभन्दा बढीलाई बोल्न दिइएको छैन। यथेष्ट समय बोल्न दिनुको कारण समय तन्काउने कार्यमात्रै भएको कतिपय नेताको बुझाइ छ।
पुस ७ देखि बोलाइएको बैठकमा हालसम्म १५ जनाले आफ्ना धारणा राखेका छन्। केन्द्रीय समितिमा मनोनित र आमन्त्रितसहित सदस्य सहित गरि सय बढी पुगेका छन्।
पुस १३ (सोमबार) मा हुने देशव्यापी प्रर्दशनको समीक्षा गरि अर्को प्रर्दशन तय गरिने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
