काठमाडौं- प्रचण्ड–नेपाल समूहका तीन नेता बल्खुस्थित पार्टी कार्यालय पुगेर कम्युनिस्ट एकताको सन्देश दिएका छन्।
नेपाल कम्युनिस्ट पार्टीका अध्यक्ष पुष्पकमल दाहाल प्रचण्ड, अर्का अध्यक्ष माधवकुमार नेपाल र वरिष्ठ नेता झलनाथ खनाल केन्द्रीय समिति बैठक सकिएलगत्तै बल्खु पुगी मदन भण्डारीको शालिकमा माल्यार्पण गर्दै कम्युनिस्ट एकताप्रति प्रतिबद्धता जनाएका हुन्।
केन्द्रीय समिति बैठकबाट वर्तमान अवस्थामा कम्युनिस्ट एकताको ऐतिहासिक आवश्यकता रहेको ठहर गरेका नेताहरू सच्चा कम्युनिस्टहरुको एकता आवश्यक छ भन्ने सन्देश दिन बल्खु पुगेको प्रतिक्रिया दिएका छन्। उनीहरूले आफूहरू नै वास्तविक नेकपा भएको भन्दै सबै कमिकमजोरी सच्याएर एकताबद्ध हुन सबैलाई आह्वानसमेत गरे।
अध्यक्ष दाहालले लोकतन्त्र र गणतन्त्रविरुद्धको षडयन्त्रको रुपमा असंवैधानिक तरिकाले संसद विघटन गरिएकाले त्यसविरुद्ध कम्युनिस्ट एकता आवश्यक रहेको प्रतिक्रिया दिए। उनले अहिलेसम्म कम्युनिस्टहरुले प्राप्त गरेका उपलब्धिविरुद्धको षडयन्त्रको रुपमा संसद विघटनलाई लिइएको भन्दै त्यसलाई सफल हुन नदिने संकल्प गरे।
‘आजमात्रै हामीले हाम्रो पार्टीको केन्द्रीय कमिटीको बैठक सम्पन्न गर्यौं। बैठक सफलतापूर्वक सम्पन्न गरेको र फेरि पनि कम्युनिस्टहरूको एकताको ऐतिहासिक आवश्यकताबारे पनि हामीले प्रस्ताव पारित गरेको सन्दर्भमा बल्खुस्थित पहिलाको पार्टी कार्यालयमा कमरेड मदन भण्डारीको शालिकमा माल्यार्पण गर्ने र देशभरि फेरिपनि सच्चा कम्युनिस्टहरुको एकता आवश्यक छ भन्ने सन्देश दिने उद्देश्यले हो। हामीले केन्द्रीय कमिटीको दोस्रो बैठक जो पोहोर साल भएको थियो त्यस बैठकको अध्यक्षता मैले गरेको थिएँ। त्यो बैठकबाट यो ठाउँमा राम्रो आधुनिक र सबैखाले कम्युनिस्टहरुको भाव झल्कने खालको राम्रो कार्यालय भवन बनाउने निर्णय गरिएको थियो,’ उनले भने‚ ‘त्यो निर्णयलाई स्मरण गर्नको लागि पनि तेस्रो केन्द्रीय समितिको बैठक पछि हामी आएका छौं। अब कमरेड माधव नेपाल जसले लामो समयसम्म यही ठाउँको पार्टी कार्यालयमा महासचिवको हैसियतले एमालेमा नेतृत्व गर्नुभयो। अहिलेको बैठकले उहाँलाई अध्यक्षमा निर्वाचित गरेको सन्दर्भ पनि यो सँग जोडिएको छ। हामीले दिने सन्देश भनेको के हो भने संसद अप्राकृतिक र असंवैधानिक तरिकाले विघटन गरियो। यो लोकतन्त्रका विरुद्ध, गणतन्त्रका विरुद्ध र अहिलेसम्म कम्युनिस्टहरुले प्राप्त गरेका उपलब्धीविरुद्धको षडयन्त्रको रुपमा छ। यसलाई हामी सफल हुन दिन्नौं भन्ने कुरा पनि हामीले पारित गरेका छौं। र यसलाई हामी सफल हुन दिन्नौँ भन्ने देखाउन संकल्प दोहोर्याउन चाहेको हो।’
प्रचण्ड–नेपाल समूहका अर्का अध्यक्ष माधवकुमार नेपालले नेपाली जनतालाई प्रतिनिधिसभाको विघटनका विरुद्धमा एकजुट हुन आग्रह गरे। उनले प्रधानमन्त्री ओलीले राजाको जस्तो निरंकुश कदम चालेको भन्दै त्यसको भर्त्सनासमेत गरे।
‘अहिले सिङ्गो राष्ट्र नै अनिश्चितताको भूमरीमा परेको छ। त्याग, तपस्या र बलिदानबाट ल्याएको संविधान, जनप्रतिनिधीहरुबाट निर्वाचित संविधानसभाबाट निर्मित नेपालको संविधानलाई कुल्चिने काम भएको छ। त्यसको प्रावधानविपरीत, भावनाविपरीत, मर्मविपरीत प्रतिनिधिसभालाई विघटन गर्ने अत्यन्तै गलत कदम प्रधानमन्त्री केपी शर्मा ओलीबाट चालिएको छ‚’ उनले भने‚ ‘हामी त्यसलाई स्वीकार गर्ने पक्षमा छैनौं। प्रतिनिधि सभालाई कुनैपनि तानाशाही तरिकाबाट विघटित गर्न पाइँदैन। यो ठिक राजाको निरंकुश कदमजस्तै अर्को प्रतिगामी कदम हो। यसको हामी घोर भर्त्सना गर्दछौं।’
उनले जग्गा खरिद, भवन निर्माण, केन्द्रीय कार्यालय बनाउने सवालमा आफ्नो भावना जोडिएको भन्दै नेकपाको मूल धार र मूल शक्ति आफूहरू नै भएको भन्दै गल्ती सच्याएर सबैलाई मूलधारमा जोडिन आह्वान गरे।
त्यसैगरी वरिष्ठ नेता खनालले प्रधानमन्त्री ओली सच्चा कम्युनिस्ट नै नभएको टिप्पणीसमेत गरे। प्रधानमन्त्रीले पार्टीको विधि र विधान नमानेको र आन्तरिक मतभेदका नाममा संसद विघटन गरेर अपराध गरेको टिप्पणी गरे।
पार्टीभित्र विवाद आउनु सामान्य भएको उनले बताए। ‘कमरेड केपी शर्मा ओली कम्युनिस्ट नै हुनुभएको रहनेछ। पार्टीको विधि र अनुशासन मान्नुभएन‚’ उनले भने‚ ‘यो अपराधको कुरा हो। संविधान‚ लोकतन्त्र र जनादेशविरुद्धको अपराध हो।’ संसद विघटन राष्ट्रविरुद्धको अपराध भएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
