काठमाडौं- नेपाल कम्युनिस्ट पार्टी (नेकपा) अध्यक्ष पुष्पकमल दाहाल 'प्रचण्ड'ले प्रधानमन्त्री केपी शर्मा ओलीको संसद् विघटन गर्ने कदमविरुद्ध आफूहरू सर्वोच्च अदालत जाने बताएका छन्। सोमबार दिउँसो बानेश्वरमा प्रचण्ड-माधवकुमार नेपालका नेताहरूसँगको छलफलमा बोल्दै उनले यस्तो बताएका हुन्।
प्रचण्डले प्रतिनिधिसभा जीवितै रहेको सन्देश सर्वोच्च अदालतलाई दिन पनि त्यसरी जान लागेको उल्लेख गरेका हुन्। 'झन्डै दुई सय जनाको जुलुस लिएर सर्वोच्च अदालत गयौं भने अदालतले पनि भन्नेछ- संसद जीवित रहेछ।'
प्रधानमन्त्री ओलीमा छल र बेइमानी कल्पना पनि गर्न नसकिने हदमा रहेको समेत उनले बताएका थिए। प्रधानमन्त्रीलाई अनुशासनको कारबाही गर्ने भोलिको बैठकले निर्णय गर्ने जानकारी प्रचण्डले दिए। ‘अनुशासनको कारबाही गर्ने भोलिको बैठकले निर्णय गर्छ,' उनले भनेका छन्। संसद विघटनको अधिकार संविधानले प्रधानमन्त्रीलाई नदिएको समेत उनको भनाइ छ।
यसैबीच नेपाली कांग्रेस केन्द्रीय कार्यालयमा सोमबार दिउँसो ४ बजे बैठक गर्दै प्रचण्ड-नेपाल समूह र जसपाले पनि ओलीविरुद्ध एकजुट हुने निर्णय गरेका छन्। उनीहरुले सर्वोच्चमा जानका लागि रिटको ड्राफ्ट नै तयारी गरेको समेत बताइएको छ। तर पार्टीहरूले केन्द्रीय समितिबाट अनुमोदन गराएर संस्थागत रूपमा नै निर्णय गर्दै सर्वोच्च जाने तयारीमा रहेको स्रोतले बताएको छ।
यसका लागि वरिष्ठ अधिवक्ता गोविन्द बन्दीले दलहरूका तर्फबाट दायर गरिने रिटको मस्यौदा तयार गरिरहेका छन्। अधिवक्ता बन्दीले बहुसंख्यक सांसदहरुको हस्ताक्षरसहित नेपाली कांग्रेस, नेकपा र जनता समाजवादी पार्टीका शीर्ष नेताहरूका तर्फबाट मंगलबार सर्वोच्च अदालत रिट दायर हुने बताए। सबै दलको सहमतिमा निवेदनको मस्यौदा भइरहेको बताइएको छ हो।
प्रतिनिधिसभामा हुने २७५ मध्ये १३८ जना सांसदको हस्ताक्षरसहित सर्वोच्च अदालतमा संसद विघटनको निर्णय रोक्न माग गर्दै मंगलबार बिहान निवेदन लिएर जाने तयारी भएको अधिवक्ता बन्दीले बताए।
संसद् विघटनविरुद्ध सर्वोच्चमा हालसम्म ११ थान निवेदन दर्ता भएका छन्। एक निवेदन संवैधानिक इजलासमा पुगेको छ भने १० निवेदन नियमित तर्फ दर्ता भएका छन्। उक्त निवेदनको पेसी बुधबारका लागि तोकिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
