नेपालबाट निर्यात हुने एक मुख्य नाका वीरगञ्जस्थित भन्सार कार्यालय।
काठमाडौं- चालु आर्थिक वर्षको सुरुवाती ५ महिनामा पहिलो पटक निर्यात घटेको छ। चालु आर्थिक वर्ष २०७७/०७८ को सुरुदेखि आयात घटेको भए पनि मंसिरमा निर्यात पनि गत वर्ष मंसिरको भन्दा कम भएको हो।
भन्सार विभागले दिएको जानकारीअनुसार चालु आर्थिक वर्षको मंसिरमा नेपालबाट ९ अर्ब ८५ करोड रूपैयाँको वस्तु निर्यात भएको छ। गत वर्षको मंसिरमा १० अर्ब ९५ करोडको वस्तु निर्यात भएकोमा यसपटक १०.०४ प्रतिशत निर्यात घटेको विभागले जनाएको छ।
मंसिरमा निर्यात घटे पनि मंसिरसम्मको तथ्यांकमा भने ५ प्रतिशतको वृद्धिदर देखिएको छ। आर्थिक वर्षको पहिलो ५ महिनामा ५० अर्ब रूपैयाँको वस्तु निर्यात भएको छ। गत वर्षको यही अवधिमा ४७ अर्ब ६१ करोड रूपैयाँको वस्तु निर्यात भएको थियो। गत आर्थिक वर्षको पहिलो ५ महिनाको तुलनामा यस वर्ष ३ प्रतिशतले निर्यात बढेको छ।
मंसिरमा आयात ६ प्रतिशतले घटेको छ। आयात घटे पनि राजस्व संकलनमा भने ठूलो वृद्धि देखिएको छ। मंसिरमा १९.७७ प्रतिशतले राजस्व वृद्धि भएको भन्सार विभागले जनाएको छ। मंसिरमा १ खर्ब २३ अर्ब रूपैयाँको वस्तु आयात भएको छ। जुन गत वर्ष १ खर्ब ३० अर्ब ९५ करोड रूपैयाँ बराबरको थियो।
मंसिरसम्मको तथ्यांकअनुसार ३.६ प्रतिशतले राजस्व संकलन बढेको छ। मंसिरसम्ममा १ खर्ब ५८ अर्ब रूपैयाँ भन्सार राजस्व संकलन भएको छ। जुन गत वर्षको यही अवधिमा १ खर्ब ५३ अर्ब रूपैयाँ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
