विप्लवका अर्थ विभाग प्रमुखले अदालतमै भेष बदलेपछि अर्कै मान्छे प्रहरी हिरासतमा

सुरक्षा/अपराध

#EXCLUSIVEविप्लवका अर्थ विभाग प्रमुखले अदालतमै भेष बदलेपछि अर्कै मान्छे प्रहरी हिरासतमाएक हप्तासम्म घटना गुपचुप, सिपाहीदेखि एसएसपीसम्मलाई स्पष्टीकरण

नारायण अधिकारी शुक्रबार, पुस ३, २०७७ २२:११

काठमाडौं- नेत्रविक्रम चन्द (विप्लव) नेकपाका आर्थिक विभाग प्रमुख प्रेमबहादुर दर्नाल (विकल्प) भनेर अर्कै व्यक्तिलाई प्रहरी हिरासतमा राखेपछि प्रहरीभित्र खैलाबैला मच्चिएको छ। अर्थ विभाग प्रमुख बनेर अर्कै मान्छे हिरासत पुगेपछि सिपाहीदेखि एसएसपीसम्मलाई प्रष्टीकरण सोधिएको छ।

अर्थ विभाग प्रमुख दर्नालले अदालत परिसरमै भेष बदलेपछि प्रहरीले अर्कै मान्छेलाई पक्राउ गरेर हिरासत राखेको थियो। अर्थ विभाग प्रमुख भने प्रहरीको पञ्जाबाट फरार हुन सफल भएका छन्।

यो घटना कसरी भयो भन्नेबार प्रहरी प्रधान कार्यालय गम्भीर रुपमा लिएर छानबिन सुरु गरेको छ। दर्नाल कसरी उम्किए भन्नेबार महानगरीय प्रहरी परिसर ललितपुरका एसएसपी किरण बज्राचार्य, महानगरीय प्रहरी अपराध महाशाखाका एसएसपी दीपक थापा, महानगरीय प्रहरी परिसर भक्तपुरका एसपी तारा थापालाई प्रष्टिकरण सोधिएको स्रोतले नेपाल लाइभलाई बतायो।

प्रहरी प्रधान कार्यालयको निर्देशनमा महानगरीय प्रहरी कार्यालय (मेट्रो) उनीहरुसँग प्रष्टीकरण सोधिसकेको छ। तर प्रहरीले भने उक्त घटना गुपचुप राख्दै अर्थ विभाग प्रमुखकोे खोजीलाई तीव्र पारेको छ।

प्रहरी स्रोतका अनुसार उनको खोजी ३०/३५ जनाको विशेष टोली नै खटाइएको छ। दर्नाल उम्किएपछि अदालत परिसरमै राखिने सादा पोसाकका प्रहरीलाई परिर्वतन गरेर नयाँ टोली पठाइएको छ। पुरानो टोलीसँग सोधपुछ भइरहेको छ।

यसरी भएको थियो घटना
मंसिर ५ गते प्रहरीले विप्लव नेतृत्वको नेकपाका अर्थ विभाग प्रमुख प्रमुख प्रेमबहादुर दर्नाल (विकल्प) र अर्थ विभागकै अर्का सदस्य तथा जिल्ला सेक्रेटरी सञ्जीव नेपाली (सुवर्ण) बागडोलबाट पक्राउ गरेको थियो। आतंकवाद, अन्तरदेशीय अपराध तथा राजनैतिक र सशस्त्र समूहको गतिविधिको निगरानी गर्ने प्रहरीको विशेष ब्युरोको सक्रियतामा उनीहरू पक्राउ परेका थिए।

लामो समयको सुक्ष्म निगरानीबाट पक्राउ परेका विकल्प र सुवर्णलाई महानगरीय प्रहरी परिसर ललितपुरको हिरासतमा अनुसन्धान गरेको थियो। अनुसन्धानपछि विप्लव नेकपाका आर्थिक (अर्थ) फाँटका महत्वपूर्ण दस्तावेजहरू प्रहरीले फेलासमेत पारेको थियो।

उनीहरुमाथि प्रहरीले चन्दा ऐन अन्तर्गत म्याद थप गरेर अनुसन्धान गरेको थियो। तर उनीहरुले भने आफूहरुलाई गैरकानूनी रुपमा थुनामा राखेको भन्दै सर्वोच्च अदालतमा बन्दीप्रत्यक्षीकरणको रिट दायर गरेका थिए।

मंसिर २८ गते उनीहरुमाथिको रिटको सुनुवाई गर्दै सर्वोच्चले ललितपुर जिल्ला अदालतका स्रेस्तेदारको रोहवरमा हिरासत मुक्त गर्न आदेश दिएको थियो। त्यसपछि सर्वोच्च अदालतबाट ललितपुर प्रहरी टोलीले उनीहरु दुवै जनालाई प्रहरीकै गाडीमा राखेर ललितपुर जिल्ला अदालत पुर्‍याएको थियो।

सर्वोच्चको आदेशपछि स्रेस्तेदारले उनीहरुलाई छाडिदिन प्रहरीलाई निर्देशन दिएका थिए। त्यसपछि छुटेका दर्नाल र नेपाली अदालत परिसरमै बसेका थिए। सादा पोसाकको प्रहरी भने उनीहरु दुवैलाई पुनः पक्राउ गर्न अदालतको गेट अगाडि ढुकेर बसेको थियो।

त्यसको केही समयमा दर्नाल र नेपाली अदालत परिसरबाट बाहिरका थिए। उनीहरु अदालतको गेटबाट बाहिर निस्कने बित्तिकै सादा पोसाकको प्रहरीले पुन उनीहरु दुवै जनालाई पक्राउ गरेर महानगरीय प्रहरी परिसर भक्तपुर पुर्‍याएको थियो।

भक्तपुर प्रहरीको हिरासतमा पुर्‍याएका मध्ये एक व्यक्ति भने विप्लवका अर्थ विभाग प्रमुख थिएनन्। उनी थिए अर्थ विभाग प्रमुखकै सहोदर भाई प्रमेश दर्नाल। प्रमेशलाई प्रहरीले अर्थ विभाग प्रमुख भनेर पक्राउ गरेको थियो। तर उनी भने विप्लवको पार्टीका सदस्य नै थिएनन्।

000

प्रहरी अनुसन्धानबाट दर्नाल दाजुभाइले जुक्ति निकालेर प्रहरीलाई छक्कयाएको पाइएको छ। अर्थ विभाग प्रमुख प्रेमबहादुर दर्नाल र उनका भाई प्रमेशको अनुहार मिल्छ। दाईलाई भेट्न ललितपुर अदालत परिसरमै पुगेका प्रमेशले फेरि पनि दाईलाई पक्राउबाट जोगाउन जुक्ति निकाले- कपडा चेन्ज गर्ने।

त्यसपछि दाजु भाई नै बाथरुम गए। दाइको कपडा भाइले लगाए। भाइको कपडा दाइले लगाए। अनुहार दुवैको एउटै थियो। जिउडाल पनि उस्तै। कपडा परिवर्तन गरेको केहीबेरमा भाइ प्रमेश अदालत परिसरबाट बाहिरए।

‘अनुहार एउटै थियो। अदालतमा उपस्थित गराउँदाकै कपडा लगाएको छ। अर्थ विभाग प्रमुख नै भनेर प्रहरीले ती व्यक्तिलाई पक्राउ गर्‍यो र गाडीमा हाल्यो,’ स्रोतले भन्यो, ‘आखिर ती व्यक्ति थिए, अर्थ विभाग प्रमुख विकल्पका भाइ प्रमेश।’

प्रमेशले पनि प्रहरीले आफूलाई पक्राउ गर्दा केही भनेनन्। उनी सुरुसुरु प्रहरीसँगै। भोलिपल्ट अदालतमा म्याद थप गर्न लाने बेला प्रमेशले पक्राउको कारण खोजे। त्यसपछि खुल्यो वास्तविकता। आखिर प्रहरी अर्थविभाग प्रमुख भनेर हिरासत पुर्‍याएका व्यक्ति अर्थविभाग प्रमुखकै भाइ प्रमेश।

उता प्रहरीले भाईलाई पक्राउ गरेर गाडीको हालेर लगेको दृश्य अर्थ विभाग प्रमुख प्रेमबहादुर नियालिरहेका थिए। त्यसको केहीबेरमा उनी अदालत परिसरबाट निस्किएर भागे। अहिलेसम्म उनी पक्राउ पर्न सकेका छैनन्।

यसअघि पनि यस्तै घटना भएको थियो। २०७५ साउनमा मकवानपुरतर्फबाट काठमाडौं आउँदै गर्दा चोभारबाट खड्गबहादुर विश्वकर्मा (प्रकाण्ड) पक्राउ पर्दा प्रेमबहादुरको व्यापक खोजी भएको थियो।

त्यसबेला प्रकाण्डको सेक्रेटरी भएर काम गरेका उनीसँग विप्लव नेकपाका आर्थिक हिसाबकिताबको दस्तावेज रहेको प्रहरीको बुझाइ थियो। त्यतिबेला पार्टी नेताले प्रयोग गर्दै आएको गाडीसहित उनका भाइ प्रमेश दर्नाल पक्राउ परेका थिए भने उनी भाग्न सफल भएका थिए।