काठमाडौं– नेपाल टेलिकमका पोस्टपेड सिम प्रयोगकर्ताले अब मासिक रेन्टल चार्जबापतकै रकमबाट पोस्टपेड प्याक सुविधा प्रयोग गर्न पाउने भएका छन्। पोस्टपेड प्रयोगकर्ताले प्रत्येक महिना न्यूनतम ३८३ दशमलब ०७ रुपैयाँ रेन्टल शुल्क तिर्नुपर्छ। अर्थात् ग्राहकले योभन्दा थोरै रकमको सुविधा प्रयोग गरेपनि रेन्टलबापत् ३८३ दशमलव ०७ तिर्नुपर्छ।
टेलिकमले यही रेन्टल चार्जबापतको रकम पोस्टपेड प्याक खरिद गर्न, कुनैपनि प्याक खरिद नगरी फोन गर्न, एसएमएस गर्न वा डाटा चलाउन पाइने व्यवस्था गरेको हो। अहिले ग्राहकले प्याक प्रयोग गर्दा यो रेन्टल चार्जभन्दा छुट्टै रकम काटिन्छ। सस्तो दरका डाटा र भ्वाइस प्याक उपलब्ध भएकाले ग्राहकले यो रेन्टल चार्जबापतको रकममा खासै ध्यान नगएको पनि देखिएको छ।
सामान्यतः नेपाली महिनाको अन्त्य अर्थात् अंग्रेजी महिनाको १५ तारिखमा पोस्टपेड मोबाइलको बिल हिसाब गरिन्छ। यो अवस्थामा महिनामा थोरैमात्र रकम प्रयोग गरेको भएपनि ३ सय ८३ दशमलव ०७ जोडेर त्यो महिनाको हिसाब गरिन्छ। मानौं, कुनै ग्राहकले महिनामा १ सय रूपैयाँमात्र प्रयोग गरेको भएपनि ३८३ दशमलव ०७ रूपैयाँ नै काटिन्छ र आफ्नो २८३ दशमलव ०७ रूपैयाँ कता हरायो भनी झुक्किएको पाइन्छ।
कम्पनीको जिएसएम पोस्टपेड सेवामा विगत लामो समयदेखि यसरी नै बिलिंग हुने भएतापनि हाल सस्तो दरका प्याकहरु उपलब्ध भएपश्चात् धेरै ग्राहक झुक्किने गरेको पाइएको छ। उदाहरणका लागि, कुनै पोस्टपेड मोबाइल प्रयोगकर्ताले २ सय रूपैयाँको प्याक प्रयोग गरेको छ भने प्याकबापतको २ सय रूपैयाँ र रेन्टल चार्जबापतको ३८३ दशमलव ०७ रूपैयाँ गरी ५८३ दशमलव ०७ रूपैयाँ तिर्नुपर्छ। मानौ, १४ तारिखका दिन ग्राहकको मोबाइलमा बाँकी रकम ४ सय रूपैयाँ थियो भने सो रकम समेत काटिएर थप १८३ दशमलव ०७ रूपैयाँसमेत तिर्नुपर्ने हुन्छ।
पोस्टपेड ग्राहकको यही अन्यौललाई सम्बोधन गर्नका लागि कम्पनीले हाल ‘पोस्टपेड प्याक’ उपलब्ध गराइरहेको टेलिकमले जनाएको छ। पोस्टपेड प्याक लिँदा ग्राहकले रेन्टल चार्जबापतको रकम पनि प्याक खरिदमा उपयोग गर्नसक्ने भएकाले ग्राहक झुक्किने सम्भावना नहुने टेलिकमको विश्वास छ। सो प्याक प्रयोग गरी कम्पनीको नेटवर्कभित्र र बाहिर कल गर्न, एसएमएस पठाउन र डाटा चलाउन सकिन्छ। पोस्टपेड प्याक लिनका लागि आफ्नो पोस्टपेड मोबाइलबाटै एस्ट्रिक १४१५ एस्ट्रिक २ ह्यास् डायल गरी आफूलाई उपयुक्त प्याक खरिद गर्न सकिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786184812.png)
