गौतम बुद्ध क्रिकेट रंगशाला : गरेरै देखिएको उदाहरणीय काम

फिचर

गौतम बुद्ध क्रिकेट रंगशाला : गरेरै देखिएको उदाहरणीय काम

सराेज तामाङ सोमबार, मंसिर २९, २०७७, १२:२७

चितवन- जनस्तरको सहयोगमा निर्माण भइरहेको गौतम बुद्ध अतर्राष्ट्रिय क्रिकेट रंगशालाको नमुना मैदानमा ‘गौतम बुद्ध कप’ प्रतियोगिता चलिरहेको छ। यता, प्रतियोगिता चलिरहँदा नमुना मैदानसँगै जोडिएको ‘गौतम बुद्ध अतर्राष्ट्रिय क्रिकेट रंगशाला’ धमाधम निर्माण भइरहेको छ।

नमुना क्रिकेट मैदानमा खेल्दै गर्दा छेवैमा बन्दै गरेको रंगशाला देखेर राष्ट्रिय टिमका खेलाडीहरुलाई झनै उत्साह थपिन्छ। खेल्ने मनोबल बढ्छ। आत्मविश्वास पनि। निर्माणको माहोल नै यस्तै छ। काम गर्ने शैली फरक देखिन्छ।

सरकारबाट वर्षौंदेखि निर्माणाधीन अवस्थामा रहेका रंगशालालाई हेरेर निराश भएका खेलाडीलाई ‘गौतम बुद्ध अतर्राष्ट्रिय क्रिकेट रंगशाला’ ले सान्त्वना दिएको छ। धुर्मुस सुन्तली फाउन्डेसनको पहलमा निर्माण भइरहेको यो रंगशालाले आकार पाइसकेको छ। काम तीब्र गतिमा भइरहेको फाउन्डेसनका अध्यक्ष सिताराम कट्टेल (धुर्मुस)ले सुनाए।

गरे के हुन्न? भन्ने धुर्मुस सुन्तली फाउन्डेसनले देखाएको छ। रंगशालाको नाममा करोडौं बजेट छुट्याएर झ्वाम पार्ने सरकारी संयन्त्र र मन्त्रीहरुको लागि पनि यो ठूलो झापड हो। चितवन जिल्लाको सदरमुकाम भरतपुर महानगरपालिकादेखि ८ किलोमिटर टाढा रामपुरमा निर्माणाधीन रंगशालाको मैदानको काम करिब ८५ प्रतिशत सकिएको फाउन्डेसनका अध्यक्ष कट्टेलले बताए। उनले भने, ‘एउटा नमुना क्रिकेट मैदान तयार भइ अहिले गौतम बुद्ध कप प्रतियोगिता आयोजना भइरहेको छ। अन्तर्राष्ट्रिय क्रिकेट रंगशालातर्फ चाहिँ मैदानको ८५ प्रतिशत काम सम्पन्न भइसकेको छ।’

त्रिभुवन विश्वविद्यालयको नाममा रहेको र कृषि तथा वनविज्ञान विश्वविद्यालयको मातहातमा रहेको जग्गामा भरतपुर महानगरपालिकासँग सम्झौतापछि निर्माण थालिएको करिब एक वर्ष पुग्यो। यो अवधिमा धेरै किसिमको समस्या र पस्थितिको सामना धुर्मुस सुन्तली फाउन्डेसनले भोग्नु परेको छ। डोजरै लगाएर तारबार भत्काउनेदेखि विभिन्न आरोपसमेत फाउन्डेसनमाथि लाग्यो। तर पनि पछि हटेन फाउन्डेसन। एकीकृत बस्ती निर्माण गर्दा मिलेको जनस्तरको साथ रंगशाला निर्माणमा पनि देखियो। यही साथ र सहयोग धुर्मुस सुन्तलीको मुख्य उर्जा बन्यो। त्यही उर्जाले अहिले रंगशालाले सार्थकता पाउँदै छ। अनि आफ्नै देशमा सुविधा सम्पन्न ठूलो रंगशालामा खेल्ने नेपाली खेलाडीको सपना पनि।

आइतबार करिब ४०-४५ जना राष्ट्रिय खेलाडीबीच फाउन्डेसनका अध्यक्ष कट्टेल भावुक भए। निर्माणको प्रगति र विवरण खेलाडीलाई सुनाउँदै उनले भने थिए, ‘निर्माण कार्य तीब्र भइरहेको छ। यो पटक नमुना मैदानमा खेलायौं। अर्को वर्ष तपाईंहरुलाई रंगशालामै खेलाउँछौं। त्यो पनि अन्तर्राष्ट्रिय खेल।’

करिब ३० हजार दर्शक क्षमता रहने यो रंगशालाको प्याराफिटतर्फको काम अहिले धमाधम भइरहेको छ। प्याराफिटतर्फ एट्यान्ड-ए र एट्यान्ड-बी भनेर नामाकरण गरेर काम भइरहेको अध्यक्ष कट्टेलले भने, ‘३० हजार दर्शक क्षमता रहेको प्याराफिटतर्फ एट्यान्ड-ए र एट्यान्ड-बी भनेर नामाकरण गरेर काम भइरहेको छ। एट्यान्ड-ए र एट्यान्ड-बी मा पनि ‘ए वान’ र ‘ए टु’ भन्ने रहेको छ। दुबै तर्फको मेसेनरी वालको काम सकिएको छ। गत साउनको एक गतेबाट जगको ढलान गरेर पाँच महिनाको अवधिमा २८६ वटटा पिल्लरहरु उठाइसकेका छौँ।’

अहिले सम्पूर्ण जगको काम सकिएको छ। अब प्याराफिटको माथि उठाउने काम भइरहेको छ। २५३ जना जनशक्ति अहिले पनि निरन्तर खटिरहेका छन्। ‘विषम परिस्थितिमा पनि हाम्रो काम रोकिएन। दसँै तिहार छठ पनि हामीले यहि नै मनायौं। यसरी नै निरन्तर काम भइरह्यो भने निर्माण सम्पन्न गर्न धेरै समय लाग्दैन’, फाउन्डेसनका अध्यक्ष कट्टेलले भने।

निर्माणले गति लिइरहेको छ। कामदारहरु ब्यस्त छन्। रंगशालाको मैदानको स्वरुप बदलिँदो छ। तर फाउन्डेसनलाई आर्थिक बोझ पनि उत्तिकै बढ्दो छ। एकपछि अर्को गर्दै अहिले लाख हुँदै करोेडौँ पुगेको छ। अहिले पनि उदारो मात्रै करिब ८-९ करोड भएको कट्टेल बताउँछन्। तर पछिल्लो समयमा सहयोगी हातहरु फेरि फैलिएका छन्। आर्थिक सहयोग गर्नेहरु आइरहेकै छन्।