नेपाल एयरलाइन्सको हुम्ला उडानमा विद्यार्थीलाई २५ र वृद्धवृद्धालाई ५० प्रतिशत छुट

पर्यटन-उड्डयन

रासस सोमबार, मंसिर २२, २०७७ १९:४४

काठमाडौं- नेपाल वायुसेवा निगम (नेपाल एयरलाइन्स)ले हुम्ला उडान पुनः सञ्चालनमा ल्याएको छ। एयरलाइन्सले हुम्लामा झन्डै एक वर्षपछि सोमबारदेखि उडान सुरु गरेको हो। नेपालगञ्जबाट हुम्लाका लागि हप्ताको एक पटक उडान गर्ने भएको हुम्ला स्टेसन इञ्चार्ज बलबहादुर सुनारले जानकारी दिए।

दुई वर्षमुनिका बालबालिका तथा विद्यार्थीलाई परिचयपत्रका आधारमा टिकटमा २५ प्रतिशत छुटको व्यवस्था रहेको उनले बताए।

यस्तै वृद्धवृद्धालाई ५० प्रतिशत टिकटमा छुटको व्यवस्था रहेको इञ्चार्ज सुनारको भनाइ छ।

अन्य नागरिकका लागि हुम्लाबाट नेपालगञ्जको भाडादर ६ हजार ३०० रहेको छ भने नेपालञ्जदेखि हुम्लाका लागि ७ हजार भाडादर कायम गरेको उनले बताए।

नेपाल एयरलाइन्सले हुम्लामा हप्ताको एक, जुम्लामा हप्ताको दुई र रुकुममा एक दिन उडान गर्दै आएको छ। हुम्लामा यात्रुको सङ्ख्या हेरेर उडान तालिका थप्न सकिने समेत निगमले जानकारी दिएको छ।