नयाँ दिल्ली- भारतका चर्चित चलचित्र कलाकार रजनीकान्तले नयाँ पार्टी खोल्ने घोषणा गरेका छन्। विशेष गरी तमिल सिनेमाबाट धेरै चर्चामा रहेका रजनिकान्तले आफूले नयाँ पार्टी खोल्न लागेको बिहीबार जानकारी दिएका हुन्।
उनले पार्टीको औपचारिक घोषणा भने यही डिसेम्बर ३१ तारिखका दिन गर्ने पनि बताएका छन्। तमिलनाडुमा निर्वाचन हुन लागेको पूर्वसन्ध्यामा उनले पार्टी खोल्ने र निर्वाचनमा जाने बताएका हुन्।
‘हामीले एउटा नयाँ राजनीतिक पार्टी गठन गरेर घोषणा गर्न लागेका छौं, जनवरीदेखि दर्ता गरेर त्यसले काम गर्न थाल्नेछ, त्यसमार्फत् हामीले अत्यन्त कडाइका साथ काम गर्नेछौ,’ उनले भने।
सामाजिक सञ्जाल ट्वीटरमार्फत् उनले दिएको जानकारीअनुसार पार्टी खोल्ने निर्णयमा पुग्नुअघि उनले धेरैसँग परामर्श गरेका थिए।
‘मैले पटक पटक विभिन्न व्यक्तिहरुसँग छलफलहरु गरेँ, उनीहरूको सल्लाह सुझावलाई लिएर मैले पार्टी खोल्ने निर्णयमा पुगेको हुँ,’ उनले भनेका छन्। आफूलाई धेरैले सहयोग गर्ने भरोसा पलाएको र आवश्यकता पनि देखिएको कलाकार रजनीकान्तले उल्लेख गरे।
तमिलनाडुमा सन् २०२१ को अप्रिलदेखि मेसम्म विधान सभा निर्वाचन हुने तय भएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।