काठमाडौं–तिहारमा एकै दिन देशभर ४२ वटा विपद्जन्य घटना भएका छन्। गृह मन्त्रालयको राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार ३० कात्तिक बिहान १० बजेदेखि १ मंसिर बिहान १० बजेसम्म भएका घटनामा अधिकांश आगलागीका छन्। ४२ मध्ये ३९ वटा आगलागीका घटना रहेको प्राधिकरणले जनाएको छ।
ती घटनामा १ जनाको मृत्यु हुनाको साथै ५ जना घाइते भएका छन्। जसबाट २ करोड ४६ लाख रुपैयाँभन्दा बढीको क्षति भएको अनुमान गरिएको छ।
मन्त्रालयका अनुसार झापाको कमल गाउँपालिका २ थापागाउँमा मैनबत्तीबाट आगलागी हुँदा ७ वर्षीया बालिकाको घटनास्थलमै मृत्यु भएको छ। आगो निभाउने क्रममा १ जना घाइते भएका छन् भने १५ लाख रुपैयाँ बराबरको धनमाल क्षति भएको जनाइएको छ।
यस्तै, कैलालीको बर्दगोरिया ४ नौनियास्थित एक गोठमा बालेको मैनबत्तीबाट अन्नपात, काठसमेत जलेर क्षति भएको छ भने आगो निभाउने क्रममा एक जना घाइते भएका छन्।
सप्तरीको डाक्नेश्वरी ६ विष्णुपुरस्थित एक गोठमा बालेको धुरबाट आगलागी हुँदा खसरी र अन्नपात क्षति भएको छ भने आगो निभाउने क्रममा १ जना सामान्य घाइते भएका छन्।
यस्तै, सोही अवधिमा उदयपुर, धनुषा, दोलाखा, सुनसरी, धनकुटा, रौतहट, सर्लाही, बझाङ, इलाम, पाँचथरलगायतका जिल्लामा पनि आगलागीका घटना भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
