काठमाडौं- प्रतिनिधिसभा र राष्ट्रियसभाको दोस्रो अधिवेशन भोलिदेखि सुरु हुँदैछ।
राष्ट्रपति विद्यादेवी भण्डारीले भोलि अपराह्न ४ बजे अन्तर्राष्ट्रिय सम्मेलन केन्द्र नयाँबानेश्वरमा संघीय संसदको अधिवेशन आह्वान गरेअनुसार दुवै सदनको बैठक बस्न लागेको हो।
प्रधानमन्त्रीको सिफारिशमा नेपालको संविधानबमोजिम राष्ट्रपतिबाट संघीय संसदको अधिवेशन आह्वान भएको हो। यो अधिवेशनलाई बजेट अधिवेशनका रुपमा लिइन्छ। संसदको मुख्य जिम्मेवारी कानुन निर्माण गर्नु भए पनि यो अधिवेशनका क्रममा सरकारको नीति तथा कार्यक्रम समेत प्रस्तुत हुनेछ।
भोलि अपराह्न ४ बजे संघीय संसद् अन्तर्गत प्रतिनिधिसभा र राष्ट्रियसभाका बैठक एकैसाथ सञ्चालन हुनेछ।
संसद् सचिवालयका अनुसार भोलि दुवै सभाका बैठकमा संघीय सदनको अधिवेशन आह्वानसम्बन्धी राष्ट्रपति कार्यालयबाट प्राप्त पत्र वाचन गरी सुनाउने, ज्ञात-अज्ञात शहीदप्रति श्रद्धाञ्जलि अर्पण गर्ने तथा अधिवेशनअघि जारी भएका चार वटा अध्यादेश प्रस्तुत हुने सम्भावित कार्यसूची छ।
भोलिकै बैठकमा आ–आफ्नो सभासम्बन्धी नियमावली मस्यौदा समितिको प्रतिवेदन पेश गर्ने कार्यसूची रहेको संसद् सचिवालयका सहायक प्रवक्ता केशव अर्यालले जानकारी दिए।
आइतबारपछिका बैठकहरुमा नियमावली मस्यौदा समितिको प्रतिवेदनमाथि छलफल, संशोधन प्रस्तुत गर्ने अवधि र पारित गर्ने, साथै पहिलो बैठकमा प्रस्तुत भएका अध्यादेशहरु क्रमशः स्वीकृत हुनेछन्।
बैसाख २६ देखि २८ गतेसम्म (प्रि–बजेट) विनियोजन विधेयकका प्राथमिकता र सिद्धान्त अर्थमन्त्रीद्वारा प्रस्तुत हुने र सभामा छलफल गर्ने सचिवालयले प्रारम्भिक सम्भावित कार्यसूची बनाएको छ। अधिवेशनका क्रममा जेठको पहिलो साता राष्ट्रपतिबाट सरकारको नीति तथा कार्यक्रम प्रस्तुत गरी सम्बोधन समेत हुनेछ। त्यसपछिका संसदको बैठकमा नीति तथा कार्यक्रममाथि छलफल गर्ने, प्रधानमन्त्रीबाट जवाफ दिने र पारित गर्ने सन्दर्भ रहनेछ।
संवैधानिक व्यवस्था अनुसार अर्थमन्त्रीले जेठ १५ गते सदनमा सरकारको राजश्व र व्ययको वार्षिक अनुमान (बजेट) प्रस्तुत गर्नेछन्। अधिवेशनका क्रममा बजेटमाथि एक साता सैद्धान्तिक छलफल गर्ने र अर्थमन्त्रीद्वारा जवाफ दिने कार्यक्रम रहनेछ।
त्यसपछिका बैठकमा विनियोजन विधेयक प्रस्तुत गरी सबै मन्त्रालयका शीर्षकगत छलफल गर्ने, पारित गर्ने र सोसँग आश्रित विधेयकहरु आर्थिक विधेयक, राष्ट्र ऋण उठाउने विधेयक र ऋण तथा जमानत विधेयक पारित गर्ने समयसीमा सहितको सम्भावित कार्यक्रम रहेको सभामुख कृष्णबहादुर महराले जानकारी दिए।
अधिवेशनको क्रममा सदनमा प्राप्त संविधान कार्यान्वयनसम्बन्धी विभिन्न विधेयमाथि छलफल गर्ने, संसद सचिवालयमा दर्ता हुन आएका सार्वजनिक महत्वका र संकल्प लगायतका प्रस्तावमाथि छलफल गरिनेछ। संघीय संसदको दोस्रो अधिवेशनको क्रममा संसदीय अभ्यासका लागि महत्वपूर्ण मानिएका समितिहरु गठन गरिनेछ।
तल्लो सदनका रुपमा रहेको प्रतिनिधिसभामा २ सय ७५ सदस्य छन् भने प्रबुद्ध समूहको प्रतिनिधित्व रहने राष्ट्रियसभा ५९ सदस्यीय छ। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790816682.webp)
-1786602170.png)
