काठमाडौं। दुबईबाट इजरायलका लागि उडेको फ्लाईदुबईको विमानमा सहपाइलटले कप्तानमाथि चक्कु प्रहार गरी विमान दुर्घटना गराउने प्रयास गरेको आरोप लागेको छ। घटनापछि यात्रुहरूले ककपिटमा प्रवेश गरी आक्रमणकारीलाई नियन्त्रणमा लिएपछि ठूलो हवाई दुर्घटना टरेको हो।
बुधबार भएको घटनामा विमानमा १७४ जना यात्रु तथा चालक दलका सदस्य थिए। विमानमा तीव्र रूपमा उचाइ घटेपछि यात्रुहरू आतंकित भएका थिए। अन्ततः विमानले साउदी अरबको तबुकमा आपत्कालीन अवतरण गरिएको थियो।
इजरायली प्रधानमन्त्री बेन्जामिन नेतान्याहूका अनुसार आक्रमणमा संलग्न व्यक्ति ओमानका नागरिक हुन्। उनलाई साउदी अरबमा पक्राउ गरी सोधपुछ भइरहेको छ। घटनाको उद्देश्य भने तत्काल स्पष्ट भएको छैन।
विमानमा रहेका यात्रु यानिभ हायुनले आफू र अन्य यात्रुहरू ककपिटमा प्रवेश गरेको बताए। उनका अनुसार ढोका खुला रहेको र ककपिटभित्र घाइते कप्तानको छेउमा आक्रमणकारी थिए। यात्रुहरूले आक्रमणकारीसँग संघर्ष गर्दै उनलाई नियन्त्रणमा लिएका थिए।
हायुनले विमानको नियन्त्रण सम्हाल्न आफूले टेलिभिजनमा देखेको तरिकाअनुसार नियन्त्रण प्रणाली तानेको बताए। त्यसपछि चालक दलका अन्य सदस्यले विमानको नियन्त्रण सम्हालेका थिए।
घटनामा घाइते कप्तान स्मित मच्छार भारतीय नागरिक रहेको नेतान्याहूले बताएका छन्। भारतीय दूतावासका अनुसार उनको अवस्था स्थिर छ। गम्भीर रूपमा घाइते भए पनि उनले प्रतिरोध गर्दै ककपिटको ढोका खोल्न सहयोग गरेको र यात्रु तथा चालक दललाई आक्रमणकारी नियन्त्रणमा लिन अवसर दिएको नेतान्याहूले बताएका छन्।
इजरायली आपत्कालीन सेवाका अनुसार घटनामा तीन यात्रुलाई सामान्य चोट लागेको थियो। विमानमा इजरायल, भारत र संयुक्त अरब इमिरेट्सका नागरिकहरू रहेको बताइएको छ। अमेरिकी विदेश मन्त्रालयका अनुसार चार यात्रुसँग अमेरिकी नागरिकता थियो।
विमानको उडान विवरणअनुसार दुबईबाट उडेको करिब साढे दुई घण्टापछि विमान करिब ३३ हजार फिटबाट एक मिनेटभित्रै १७ हजार फिटसम्म झरेको थियो। तीव्र अवतरणका क्रममा विमानको पुच्छरमा रहेको रडरको ठूलो हिस्सा क्षतिग्रस्त भएको बताइएको छ।
उड्डयन सुरक्षा विज्ञहरूले यस्तो तीव्र अवतरणपछि पनि विमान सुरक्षित रूपमा अवतरण गर्न सफल भएको घटनालाई असाधारण बताएका छन्। विमानले अन्ततः तबुकमा सुरक्षित आपत्कालीन अवतरण गरेको थियो।
घटनापछि इजरायलले सम्भावित अपहरणको आशंकामा लडाकु विमानसमेत परिचालन गरेको थियो। विमान अवतरणका क्रममा साउदी अरब र जोर्डनबीच अनुमति लिन कठिनाइ भएको र अन्ततः तबुकमा अवतरण गरिएको बताइएको छ।
घटनापछि फ्लाईदुबईले अनुसन्धान पूरा नभएसम्म इजरायल जाने तथा इजरायलबाट आउने आफ्ना उडानहरू स्थगित गर्ने जनाएको छ।
साउदी अरब र इजरायलबीच औपचारिक कूटनीतिक सम्बन्ध नभए पनि पछिल्ला वर्षहरूमा इजरायली यात्रु बोकेका विमानका लागि साउदी अरबले आपत्कालीन अवतरणको अनुमति दिँदै आएको छ। सन् २०२३ मा पनि प्राविधिक समस्याका कारण इजरायली यात्रु बोकेको विमानले साउदी अरबमा आपत्कालीन अवतरण गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790816682.webp)
-1786602170.png)
