काठमाडौँ- नेपाल पत्रकार महासंघको आज हुने प्रदेश निर्वाचनमा आफ्ना आधिकारिक उम्मेदवारविरुद्ध संगठनका केही पदाधिकारीले अन्य संगठनसँग वार्ता गरी विज्ञप्ति सार्वजनिक गरेको भन्दै प्रेस चौतारी नेपालले कारबाहीको चेतावनी दिएको छ।
नेतृत्वको अनुमतिविना कुनै पनि संगठनसँग वार्ता, छलफल, माइन्युट र विज्ञप्ति सार्वजनिक गर्न नपाइने वैधानिक व्यवस्थाविपरीत संगठनका वरिष्ठ उपाध्यक्ष माधवप्रसाद नेपाल, उपाध्यक्ष नरेन्द्र साउद, महासचिव राजेश राई, उपमहासचिव रामकुमार एलन लगायत पदाधिकारीको सहभागितामा अराजनीतिक र विधानविपरीतका कार्य भएको भन्दै चौतारीका अध्यक्ष गणेश बस्नेतले विज्ञप्तिमार्फत कारबाहीको चेतावनी दिएका हुन्।
महासंघको निर्वाचनमा प्रदेश नं ७ का अध्यक्षमा चौतारीका हरिप्रसाद जोशीलाई उम्मेदवार बनाउन अध्यक्ष बस्नेतले निर्देशन दिएकामा केही पदाधिकारीले अर्जुन शाहलाई उम्मेदवार बनाइएको भनी सामाजिक सञ्जालमा सार्वजनिक गरेपछि केन्द्रीय सचिवालयको आकस्मिक र उपलब्ध सदस्यको शुक्रबार साँझ बसेको बैठकले अनुशासन कायम गर्न कारबाहीसमेत गर्नुपर्ने चेतावनी दिएको हो।
चौतारीका महासचिव राई र नेपाल प्रेस युनियनका महासचिव अजयबाबु शिवाकोटीले सो प्रदेशका अध्यक्षमा शाह उम्मेदवारी रहेको विज्ञप्ति सार्वजनिक गरेका थिए। बैठकले शाहलाई उम्मेदवारी फिर्ता लिन र नदिएमा संगठनबाट निष्काशन गर्ने चेतावनी दिएको छ।
प्रदेश नं ७ मा प्रेस चौतारी, प्रेस युनियन र प्रेस सेन्टर नेपालका अध्यक्षले पत्रकार जोशीलाई अध्यक्षमा साझा उम्मेदवार बनाउने समझदारी गरी सो निर्णय कार्यान्वयन गर्न निर्देशन दिइसकेका छन्। महासंघको प्रदेश निर्वाचनमा अधिकांश स्थानमा निर्विरोध भइसकेको छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790816682.webp)
-1786602170.png)
