.jpg)
बन्द हुनुअघि र पछिको स्क्रिनसट काठमाडौं- राष्ट्रपति विद्यादेवी भण्डारीको सञ्चार कार्यालयले प्रयोगमा ल्याएको ट्विटर एकाउन्ट बन्द गरिएको छ। राष्ट्रपति कार्यालयका सूचना र जानकारी साझा गर्ने उद्देश्य राखेर चलाइएको सो एकाउन्ट (@ShitalNiwas) मा प्राविधिक समस्या देखिएका कारण बन्द गरिएको कार्यालयको भनाइ छ।
सो खाता अगष्ट २०१८ मा खोलिएको थियो। त्यसपछिका अपडेटका बारेमा जानकारी प्राप्त नभएता पनि पछिल्लो समय राष्ट्रपतिसँग जोडिएका सूचनाहरु पोस्ट गर्ने गरेका कारण सक्रिय देखिएको थियो।
केही दिनयता सो एकाउन्टलाई लिएर ट्विटरमा विभिन्न प्रतिक्रियाहरु उत्पन्न भएका थिए। कतिपयले सो एकाउन्ट पहिल्यै कसैको प्यारोडी एकाउन्टको रुपमा प्रयोग भएको र पछि नाम र ह्यान्डल परिवर्तन गरी राष्ट्रपतिको कार्यालयले प्रयोग गरेको बताएका थिए। त्यसलाई सहयोग पुग्नेगरी उनीहरुले कैयौं स्क्रिनसटहरु पनि पोस्ट गरेका थिए।
सार्वजनिक भएका फोटोहरुमा शितल निवास ह्यान्डललाई मेन्सन गरेर प्रशस्तै अन्तरक्रिया गरिएका छन्। तर, ती स्क्रिनसटमा शितल निवास ह्यान्डल भएको ट्विटरसँग सम्बन्धित ट्विटलाई भने हटाइएको देखिन्छ। यसले अहिले शितल निवास बनाइएको भए पनि पहिले अर्कै ह्यान्डल रहेको र त्यसमा अन्तरक्रिया भएको तर्कलाई बल पुग्छ। यद्यपि, यसको आधिकारिता भने पुष्टि भएको छैन।
प्रधानमन्त्री निकट र सरकारबाट लाभ लिएका कतिपयले नै विभिन्न नेताका नाममा प्यारोडी एकाउन्ट बनाउने र असान्दर्भिक ट्विट लेख्ने गरेको आरोप लाग्ने गरेको छ।
तर राष्ट्रपति कार्यालयका सूचना तथा सञ्चार विज्ञ टीका ढकालले भने आफूले प्रयोगविहीन अवस्थामा रहेको ह्यान्डललाई सक्रिय बनाएको बताए। ‘शितल निवास ह्यान्डलमै दर्ता भएर नचलाइएको खाता मैले एक्भिट गरेको हो। मैले नै भेरिफाइ गरें’, उनले नेपाल लाइभसँग भने।
उनले आफूले पुरानो खातालाई ‘रिनेम’ नगरेको पनि बताए। पहिले कसैले फेक खाता चलाएर, पछि शितल निवास बनाएर तपाईंलाई दिएको हो भन्ने प्रश्नमा उनले सो विषयमा आफूलाई जानकारी नभएको तर आफूले राष्ट्रपति कार्यालयबाट संस्थागत रुपमै सो ह्यान्डल लिएको बताए।
खाताको नाम र ह्यान्डल परिवर्तन गरिएको तर्कलाई सघाउ पुग्ने गरी सार्वजनिक भएका फोटालाई नक्कली भएको हुनसक्ने आकलन गरे। ‘पहिल्यै दर्ता भएको खाता हो। अहिले सार्वजनिक भएका फोटोहरुचाहिँ फोटोसप गरिएका वा अरु केही पनि होलान्। त्यतातिर म गइनँ। तर मैले लिँदाचाहिँ शीतल निवास नै थियो। (राष्ट्रपति कार्यालयका साथीहरुले) दुई अढाइ वर्ष अगाडि दर्ता गरेर पनि नचलाइ राख्नुभएको रहेछ’, उनले भने।
सो एकाउन्टबाट पछिल्ला दिनमा राष्ट्रपति कार्यालयका विज्ञप्ति र राष्ट्रपतिसँग सम्बन्धित फोटो पोस्ट गरिन्थ्यो। अन्य कतिपय सूचना पोस्ट गर्नुका साथै राष्ट्रपतिको ट्विटर एकाउन्ट (@Presidenofnp) का ट्विटहरु रिट्विट गरिन्थ्यो।
सो ह्यान्डलाई लिएर बेलाबेलामा अमर्यादित मेन्सन पनि हुने गरेका थिए। त्यसलाई रोक्न सो ह्यान्डलले शिष्ट र मर्यादित बन्न आग्रह गरेको थियो। ‘हरेक विषयलाई राजनीतिक आँखाबाट मात्र नहेरिदिनुहुन सबैमा आदरपूर्वक अनुरोध गर्दछौं’, अक्टोबर २६ मा गरिएको ट्विटमा भनिएको थियो।
केही दिनअघि एउटा अनलाइनको सामग्री सेयर गरेका कारण पनि ट्विटर प्रयोगकर्ताले प्रश्न उठाएका थिए। ढकालले भने त्यसरी सेयर गर्नु नीति नभएर मानवीय त्रुटि भएको बताए। ‘त्यो हाम्रो नीति होइन। मानवीय त्रुटि भएको हो। त्यस्तो गर्नु हुँदैन। त्यसलाई तत्कालै सच्याइएको थियो। तर अहिले खाता बन्द गरिएकोचाहिँ त्यो कारणले होइन’, उनले भने।
ढकालले पछिल्लो समय सो खातामा ह्याकर्स अट्याक् हुने गरेको बताए। ‘सो ह्यान्डल सक्रिय बनाइयो तर अहिले गहिरिएर हेर्दा प्रशस्तै प्राविधिक समस्या देखियो। त्यसमा धेरैपटक ह्याकर्स अट्याक् पनि भयो’, उनले भने।
ढकालले अब केही दिनमै नयाँ एकाउन्ट बनाइने बताए। उनले डिलेट भएको खाताबाट पहिले गरिएका ट्विटहरु आफूले कपी गरेर राखेको बताए। ‘प्रिन्ट पनि गरेको छु’, उनले भने।
एकदुई दिनमै नयाँ खाता : टीका ढकाल, सूचना तथा सञ्चार विज्ञ, राष्ट्रपति कार्यालय
शितल निवास ह्यान्डलमै दर्ता भएर नचलाइएको खाता मैले एक्भिट गरेको हो। मैले नै भेरिफाइ गरें। तर त्यसमा अहिले गहिरिएर हेर्दा प्रशस्तै प्राविधिक समस्या देखियो। त्यसमा ह्याकर्स अट्याक् पनि भयो धेरैपटक। त्यसैले अर्को सुरक्षित खाता बनाउनुपर्नेभयो।
(पुरानो खातालाई रिनेम गरिएको) होइन। मैले त्यसरी खाता लिएको पनि होइन। पहिल्यै दर्ता भएको खाताचाहिँ हो। फोटोहरुचाहिँ फोटोसप गरिएका वा अरु केही पनि होलान्। त्यतातिर म गइनँ। तर मैले लिँदाचाहिँ शीतल निवास नै थियो। (राष्ट्रपति कार्यालयका साथीहरुले) दुई अढाइ वर्ष अगाडि दर्ता गरेर पनि नचलाइ राख्नुभएको रहेछ।
अर्को खाता एक दुई दिनमै आइहाल्छ।
खाता डिलेट गरिए पनि मैले कपी गरेर राखेको छु। प्रिन्ट पनि गरेको छु।
(एउटा अनलाइनको न्युज पनि सेयर भएको थियो) तर त्यो हाम्रो नीति होइन। मानवीय त्रुटि भएको हो। त्यस्तो गर्नु हुँदैन। त्यसलाई तत्कालै सच्याइएको थियो। तर अहिले खाता बन्द गरिएकोचाहिँ त्यो कारणले होइन।
राष्ट्रपति कार्यालयको ट्विटर ह्यान्डललाई शिष्ट र मर्यादित राख्नुपर्छ भन्ने नै हाम्रो जोड छ।
ट्विटरमा औंल्याइएका कतिपय कुराले नै समस्याहरु थाहा भयो। यताबाट हेर्दा ह्यान्डल 'क्लिन' देखिन्छ, बाहिरबाट भएका अन्तरक्रिया कस्ता थिएन भन्ने थाहा हुँदैन नि एकातर्फबाट हेर्दा।
(पहिले कसैले फेक खाता चलाएर, पछि शितल निवास बनाएर) मलाई दिएको हुनसक्ने विषयचाहिँ मलाई थाहा भएन। तर मैलेचाहिँ संस्थागत रुपमै शितल निवास ह्यान्डल लिएको थिएँ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
![Nepal Live Samachar नेपाल लाइभ समाचार, जेठ २९ [भिडियाे]](https://nepallive.net/uploads/posts/500X300/samachar++-299-1718118150.jpg)
![Nepal Live Samachar नेपाल लाइभ समाचार, जेठ २७ [भिडियाे]](https://nepallive.net/uploads/posts/500X300/samachar++-1717941479.jpg)
