काठमाडौं– पार्टी एकताको विषय लम्बिँदै गइरहेका बेला बिहीबार बिहान नेकपा एमाले अध्यक्ष एवं प्रधानमन्त्री केपी शर्मा ओली र माओवादी केन्द्रका अध्यक्ष पुष्पकमल दाहाल 'प्रचण्ड'बीच एकताको विषयमा वार्ता भएको छ। प्रधानमन्त्री निवास बालुवाटारमा दुई अध्यक्षले पार्टी एकतामा देखिएका गाँठा कसरी फुकाउने भन्नेबारे छलफल गरेका हुन्।
एकता संयोजन समिति मातहतका कार्यदलले आफ्नो प्रतिवेदन बुझाइसकेको अवस्थामा पार्टी एकतालाई निर्णायक मोडमा पुर्याउने जिम्मा दुवै अध्यक्षको काँधमा आएको छ। सोहीअनुसार ओली र दाहालबीच वार्ता भइरहेको छ। आजै दिउँसो ३ बजे ओली र दाहालबीच पुनः छलफल हुने जनाइएको छ।
खासगरी सांगठिनक संरचना र केन्द्रीय समितिमा समान सहभागिताको विषयले पार्टी एकता अड्किएको छ।
बुधबार मात्र दाहालले माओवादी सचिवालय बैठकमा केन्द्रीय कमिटीको संख्या बढाएर भए पनि सहमतिमा पुग्ने ब्रिफिङ गरेका थिए।
सचिवालय बैठकलाई सम्बोधन गर्दै अध्यक्ष दाहालले वाम गठबन्धन कार्यदलको सुझाव अनुसार प्रस्ताव गरिएको २ सय ९९ सदस्यीय केन्द्रीय कमिटीको संख्या बढाएर भए पनि नेकपा एमाले र माओवादी केन्द्रका नेताको व्यवस्थापन गरिने बताएका थिए।
पार्टी एकता प्रक्रियाको पछिल्लो अवस्थाबारे सचिवालय बैठकलाई जानकारी दिँदै अध्यक्ष दाहालले दुवै दलले केन्द्रीय कमिटीको लिस्ट बनाउने र व्यक्ति हेरेर काटछाँट गर्ने विषयमा एमाले अध्यक्ष ओलीसँग छलफल चलेको जानकारी गराएका थिए।
अध्यक्ष दाहालले एकीकृत पार्टीको आगामी महाधिवेशन एकताको महाधिवेशन हुने उल्लेख गर्दै एकीकृत पार्टीको संख्याले नेतृत्व चयनमा फरक नपार्ने धारणा राखेका थिए।
अध्यक्ष दाहालले मे ५, शनिबार मार्क्स जयन्तिको अवसरमा पार्टी एकताबारे नयाँ घोषणा हुनसक्ने बताएका थिए। माओवादी केन्द्रका एक नेताका अनुसार शनिबार पार्टी एकताबारे केही नयाँ सन्देश आउँछ। उनले भने, 'धेरै विषय मिल्दै गएको छ, संख्याको विषयलाई दुई अध्यक्षले टुग्याउनासाथ शनिबार पार्टी एकता घोषणाका लागि मिति तय हुन सक्छ।'
पार्टी एकताका लागि सहमति हुन बाँकी विषय समाधान गर्ने जिम्मेवारी दुवै अध्यक्षलाई दिइएकाले आजको वार्तामा के-के विषयमा छलफल भयो भन्नेबारे ठोस जानकारी नआएको ती नेताले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
