काठमाडौं– नागरिक उड्ययन प्राधिकरणले एसियाना एयरलाइन्समाथिको छानबिन नटुंगिदासम्म नेपाल उडान गर्न नपाउने स्पष्ट पारेको छ। गत शनिबार दक्षिण कोरियाबाट नेपाल उडान गर्ने क्रममा उक्त एयरलाइन्सले स्वास्थ्य मापदण्ड पुरा नगरेको प्राधिकरणको ठहर छ।
एयरलाइन्सले नोभेम्बर ५ र २६ मा पुनः उडान गर्ने गरि कोरियामा टिकट बुकिङ खुला गरेको छ। तर प्राधिकरणले एयरलाइन्समाथिको छानबिन नसकिएको जनाउँदै ती उडान हुन नसक्ने स्पष्ट पारेको छ। प्राधिकरणका महानिर्देशक राजन पोखरेलले नेपाल लाइभसँग भने,‘एसियानाले अघिल्लोपटक स्वास्थ्य मापदण्ड पूरा नगरि उडाएको छ। छानविन नसकिएसम्म नेपालमा उडान गर्न पाउँदैन।’
एसियानाको उडान स्थगित भएको आधिकारिक जानकारी नआएको कोरियास्थित नेपाल टुरका प्रवन्धक केपी सिटौलाले जानकारी दिए। नोभेम्बरका दुई उडानका लागि बुधबार मात्रै स्वीकृति पाएको उनले बताए। उनले भने,‘ बुुधबारमात्रै चार्टरका लागि नयाँ मिति तय भएपछि बिहीबार कसरी उडान रोक्ने कार्य कसरी हुन्छ?’
एसियानाको कोरिया-नेपाल उडान कोरियास्थित नेपाल टुर र लिंक एसिया टुुर्सको समन्वयमा हुँदै आएको थियो। चार्टर उडानको मिति तय महिनौं अघि नहुने समेत सिटौलाले बताए। उनले भने,‘विगतमा कोरियाबाट गरिएका चार्टर उडानहरुको अनुमति छिटोमा हप्ता दिन र घटिमा एक दिन अगाडि मात्र पनि आएका छन।’ उडान अनुमति रद्ध गरिए अर्को उडानको व्यवस्था गरि नेपाल पठाउने सिटौलाले बताए।
कोरियाबाट नेपाल उडानमा कोरियन एयरको एकाधिकार तोडिएको कतिपयको बुझाईसमेत थियो। कोरियन एयरभन्दा केही सस्तोमा एसियानाले नेपालमा चार्टर उडान गरेको थियो। एयरलाइन्सको प्रतिस्पर्धाले नेपाली कामदारले लाभ प्राप्त गरिरहेको ट्राभल कम्पनीहरुको दाबी छ।
गत शनिबार नेपाल ओर्लिएका यात्रुमा कोभिड परीक्षणको नतिजा नेपाल सरकारले तोकेका मापदण्ड पुरा नभएको बताइएको थियो। एसियानाबाट नेपाल आएका युवाहरु करिब पाँच घन्टा अन्तर्राष्ट्रिय विमानस्थलमा रोकिएका थिए। नियमित उडान सुरु नभएपछि एसियानाले चार्टरमा दुई उडान गरेको छ। नियमित उडानमा भने एसियानाले उडान अनुमति पाइसकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
