काठमाडौं- न्यायपरिषद्ले कोरोना महामारीकै बीचमा २ वर्ष पुरा भएका जिल्ला न्यायाधीशहरुको सरुवा गर्ने तयारी थालेको छ। परिषद्ले बुधबार परिषद्को बैठक बोलाएको छ। सर्वोच्च अदालतका न्यायाधीशलाई नै कोरोना संक्रमण पुष्टि भएर क्वारेनटाइनमा बसेको समयमै न्यायाधीश सरुवा गर्ने तयारी गरिएको हो।
गत बुधबार फुलकोर्टको बैठकमा सहभागी भएका एक न्यायाधीशमा कोरोना संक्रमण पुष्टि भएको थियो। शुरुमा उनको छोरोमा कोरोना पुष्टि भएको थियो। प्रधानन्यायाधीशसहित १६ न्यायाधीश सहभागी भएको फुलकोर्ट बैठकमा सहभागी भएका न्यायाधीशमा शुक्रबार कोरोना पुष्टि भएको थियो।
शुक्रबारदेखि कोरोना पुष्टि भएका न्यायाधीश आइसोलेनमा बसेका थिए भने अन्य न्यायाधीशहरु क्वारेनटाइनमा बसेका थिए। ७५ जिल्लाका न्यायाधीशहरुको २ वर्ष पुरा भएकाले उनीहरुको सरुवा गर्ने समय भएको छ। गत साउनमै उनीहरुको सरुवा गर्नुपर्ने भएपनि कोरोना महामारीका कारण रोकिँदै आएको थियो।
चैत ११ देखि सरकारले देशभर लकडाउन गरेकाले अदालत पनि लामो समय बन्द भएको थियो। उक्त अवधीलाई सर्वोच्चले शून्य समय हुने फैसला गरिसकेको छ।
दशैंको मुख र कोरोना महामारीमै सरुवाको तयारी
दशैं नजिकै र कोरोनाको रफ्तार बढेको समयमा न्यायाधीशहरुको सरुवा गर्ने तयारी गरेको भन्दै परिषद्का सदस्यहरू नै असन्तुष्ट रहेका छन्। परिषद्मा प्रधानन्यायाधीश, वरिष्ठतम न्यायाधीश, कानुनमन्त्री, बारको सिफारिसमा भएको सदस्य र प्रधानमन्त्रीको सिफारिसमा हुने सदस्य रहन्छन्।
परिषद्का एक सदस्यले महामारीमा सरुवा गर्ने तयारी गरेको र सर्वोच्चकै न्यायाधीशलाई कोरोना लागेकाले बैठकमा जान डर लागेको बताए। ‘यत्रो समयमा सरुवा हुन सकेन‚ अब केही नदिन नगर्दा पनि हुने हो‚’ ती सदस्यले भने‚ ‘सरुवा भएका न्यायाधीश आउन र जान पनि समस्या छ।’ जिल्लापछि उच्चमा पनि न्यायाधीश सरुवा गर्नेुपर्ने भएको छ।
उच्च अदालतमा मुख्यन्यायाधीश र सर्वोच्चमा पनि न्यायाधीश पद रिक्त रहेको छ। राजनीतिक सहमति नभई सर्वोच्च अदालतमा न्यायाधीश नियुक्त हुन नसक्ने भएकाले लामो समयदेखि रिक्त रहेको हो। यसअघि परिषद्का सदस्य पदम वैदिकले सर्वोच्चको न्यायाधीश हुन राजीनामा दिएका थिए।
माओवादी कोटाबाट परिषद्को सदस्य भएका उनी सोही कोटामा न्यायाधीश बन्न चाहेका थिए। तर नेपाल बार एशोसियसन र अन्य क्षेत्रबाट विरोध भएपछि न्यायाधीश नियुक्ति रोकिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768438874.png)
-1768981471.jpg)
-1764146706.png)
