काठमाडौं–जनता समाजवादी पार्टी नेपालका नेता एवं पूर्वप्रधानमन्त्री डा बाबुराम भट्टराईले पत्रकारको रिले अनशनमा ऐक्यबद्धता जनाएका छन्। मिडिया हाउसविरूद्ध सडकमै रिले अनशन बसिरहेका पत्रकारहरूको आन्दोलनमा ऐक्यबद्धता जनाउन भट्टराई बिहान साढे ११ बजे अनशनस्थल नयाँ बानेश्वर पुगेका थिए।
त्यसक्रममा भट्टराईले जनतालाई सुसूचित गर्ने जिम्मेवारी बोकेका पत्रकारहरू नै शोषणमा परेर सडकमा आउन बाध्य हुनु दुर्भाग्यपूर्ण भएको बताए। उनले पत्रकारलाई सडकमा आउन बाध्य नपार्न मिडिया हाउसहरूलाई अनुरोध गरे।
सरकारले ऐन कानुन बनाउने तर पालना नगर्नेलाई कारबाही गर्न नसक्नु दुस्खद् भएको भन्दै भट्टराईले श्रमजीवीको आवाज सुन्न सरकारको ध्यानाकर्षण गराए।
‘तर सरकारको ध्यान अहिले असंगठित श्रमिकको समस्या सुन्नतिर होइन, चुनाव हारेका मन्छेलाई सांसद बनाउनेतिर छ,’ भट्टराईले भने। विभिन्न एक दर्जन सञ्चारमाध्यमले कोभिड(१९ को बहानामा पत्रकार तथा कर्मचारी निष्काशन गरेपछि रिले अनशन थालिएको श्रमजीवी हित प्रवर्द्धन समितिका सहसंयोजक जन्मदेव जैसीले बताए। ६ बुँदे माग राखेर असोज १५ गतेबाट रिले अनशन थालिएको हो। कोभिड(१९ को बहानामा अहिले राजधानीका साढे तीन सय कर्मचारी तथा पत्रकारलाई मिडिया हाउसले निष्काशन गरेको उनले बताए।
‘पत्रकार महासंघमा १२ वटा मिडिया हाउसले निष्काशन गरेको उजुरी आएको छ, हामीले सम्बन्धित मिडिया हाउसलाई अनुरोध गर्यौं तर अटेर गरेपछि आन्दोलन सुरू गर्नुपरेको हो,’ उनले भने।
सरकारले तोकेको पारिश्रमिक उपलब्ध गराउनु पर्ने, बाँकी रहेको बक्यौता भुक्तानी, अनावश्यक सरुवा र निष्काशन फिर्ता लिनुपर्ने, ६ महिना काम गरेकालाई स्थायी नियुक्ति दिनुपर्ने तथा श्रमजीवी पत्रकार ऐन कार्यान्वयन नगर्ने मिडिया हाउसलाई कारबाही गर्नुपर्ने माग पत्रकारहरुको छ।
जैसीका अनुसार यो पाँच दिने रिले अनशनपछि पनि आन्दोलनका कार्यक्रम तय गरिएका छन्। जसअनुसार २१ असोजमा अन्नपूर्ण पोस्ट र कान्तिपुर टेलिभिजनमा एक घन्टा घेराउ गर्ने कार्यक्रम छ। २२ गते कान्तिपुर मिडिया ग्रुप र कारोबार दैनिक, २३ गते नागरिक दैनिक तथा २४ गते नेपाल आजमा एक घन्टा धर्ना दिने कार्यक्रम छ।
यस्तै, २१ देखि २४ असोजसम्म दिनहुँ ती मिडिया हाउसमा एक घन्टा घेराउ गर्ने कार्यक्रम रहेको पत्रकार महासंघका केन्द्रीय सदस्यसमेत रहेका जैसीले बताए। २५ गते सूचना विभाग र न्यूनतम पारिश्रमिक निर्धारण समितिमा लाल्टिन बालेर प्रदर्शन गर्ने र २७ गते प्रधानमन्त्री निवास बालुवाटार घेराउ गर्ने कार्यक्रम छ।
‘सञ्चारगृहको ज्यादती र शोषणको विषयमा राष्ट्रपतिको कार्यालय, प्रधानमन्त्री कार्यालय, प्रतिनिधिसभा सभामुख, राष्ट्रिय सभा अध्यक्ष, सञ्चार र श्रम मन्त्रालयलगायतलाई ज्ञापनपत्रसहित ध्यानाकर्षण गराउने कार्यक्रम छ,’ जैसीले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
