काठमाडौं- टुरिस्ट यातायात व्यवसायीहरुले अनलाइन सिस्टमबाट पर्यटक सार्वजनिक यातायात सेवाको टिकट उपलब्ध गराउने भएका छन्। टुरिस्ट बस एसोसिएसन अफ नेपाल(टिबान)ले आफ्ना सम्पूर्ण बसहरुको टिकट अनलाइनमार्फत् बिक्री गर्ने उद्देश्यले इलेक्ट्रोनिक्स कन्सर्न एण्ड रिसर्च सेन्टर (इसिआरसी) प्रालिसँग सम्झौता गरेको छ।
एसोसिएसनले इसिआरसीसँगको सम्झौतापछि आफ्ना नेपालभर संचालन हुने टुरिष्ट बसहरुको टिकट अनलाइनमार्फत् नै बुकिङ गरी बिक्री गर्न सकिने जनाएको छ। बिहीबार टिबानका अध्यक्ष ईश्वरप्रसाद उपाध्याय तथा इसिआरसीका अध्यक्ष संजीत पौडेलबीच सम्झौता भएको हो।
सम्झौतापछि टिबानमा आबद्ध कम्पनीका पर्यटन सार्वजनिक यातायातको रुपमा संचालनमा रहेका सवारी साधनहरुको टिकट अनलाइन तथा एपबाटै बुकिङ गर्न सकिनेछ। पछिल्लो दिनमा कोभिड १९ को महामारीले गर्दा नेपालको पर्यटन सेवा संकटग्रस्त भएको सन्दर्भमा यात्रुहरुलाई सुरक्षित र सहजरुपमा पर्यटन सार्वजनिक यातायातका साधनहरु उपलब्ध गराउने उद्देश्यका साथ यो सम्झौता भएको हो।
‘हाम्रो एसोसिएसनअन्तर्गत संचालनमा रहेका सम्पूर्ण पर्यटन सार्वजनिक यातायातका साधनहरु सरकारी मापदण्डअनुसार स्वास्थ्य प्रोटोकल पालना गर्दै संचालन गरिरहेका छौं र सम्झौतापछि अनलाइनबाटै टुरिस्ट बसको टिकट उपलब्ध गराउनेछौं’, टिबानका अध्यक्ष उपाध्यायले भने।
कोभिड- १९ पछि सम्पूर्ण सेवाहरु अनलाइनमा गईरहेको सन्दर्भमा पयर्टन सेवा पनि अनलाइनमा आधारित भएर भरपर्दो र विश्वसनीय सेवा दिन तयार भएको सन्देश दिन चाहेको उनले बताए। ‘हरेक सेवाहरु अनलाइनमा आधारित भइरहेको बेला अब टुरिस्ट बसको सेवा पनि डिजिटलमा गएको छ, सम्झौतापछि यात्रुहरुलाई सहजरुपमा भरपर्दो सेवा सुपथ मूल्यमा डिजिटल प्रविधिमार्फत् उपलब्ध गराउन सकिनेछ, इसिआरसीका अध्यक्ष संजीत पौडेलले भने।
एसोसिएसनले यात्रु तथा पर्यटकहरुलाई आवश्यकताअनुसार विभिन्न स्थानहरुमा जानका लागि पर्यटन सार्वजनिक यातायात सेवा उपलब्ध गराउँदै आएको छ। सम्झौताअनुसार दसैंको लागि टिबानका पर्यटक सार्वजनिक यातायातका साधनहरुको अग्रिम बुकिङ अनलाइन सिस्टममार्फत् सुरु गरिनेछ।
सुरुवाती चरणमा पर्यटक सार्वजनिक यातायातको सेवा काठमाडौंदेखि पोखरा, नारायणघाट, लुम्बिनी, जनकपुरमा उपलब्ध हुनेछ भने क्रमशः अन्य सहरहरुमा पनि सेवा विस्तार गरिने कम्पनीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
