यति ग्रुप र चिनियाँ समूहको लगानी रहेको हिमालय एयरलाइन्स। उसले पाएको सेल्फ ग्राउन्ड ह्यान्डलिङ अनुमति तत्काल कार्यान्वयन नगर्न मन्त्री भट्टराईले निर्देशन दिएका छन्। तस्बिर : हिमालय एयरलाइन्स
काठमाडौं- संस्कृति, पर्यटन तथा नागरिक उड्डयन मन्त्री योगेश कुमार भट्टराईले यती ग्रुपको मुख्य लगानी रहेको हिमालय एयरलाइन्सलाई दिइएको सेल्फ ग्राउन्ड ह्यान्डलिङ अनुमति तत्काल कार्यान्यवन नगर्न नेपाल नागरिक उड्ययन प्राधिकरणलाई निर्देशन दिएका छन्। मन्त्री भट्टराईले पहिलेदेखि नै आफै सेल्फ ग्राउन्ड ह्यान्डलिङ सेवा गर्दै आएका थाई एयरवेज र एयर इन्डियाका विषयमा पनि विमानस्थलको क्षमता अध्ययन गरेर मात्र दिन मिल्ने वा नमिल्ने विषयमा काम अगाडि बढाउने निर्देशन प्राधिकरणलाई दिएका हुन्।
हिमालयलाई दिइएको सेल्फ ग्राउन्ड ह्यान्डलिङको विषयमा सर्वत्र विरोध भएपछि मन्त्री भट्टराईले नेपाल नागरिक उड्डयन प्राधिकरणका महानिर्देशक राजन पोखरेललाई मन्त्रालयमा बोलाएर सो विषयमा निर्देशन दिएको मन्त्रालय स्रोतले जानकारी दिएको छ।
स्रोतका अनुसार प्राधिकरण महानिर्देशक पोखरेलले मन्त्री भट्टराईसँग हिमालयललाई दिएको ग्राउन्ड ह्यान्डलिङ अनुमति २०७२ मा जारी भएको निदेशिकाअनुसार नै भएको बताएका थिए।
हिमालयले निर्देशिकाकै व्यवस्था अनुसार सेल्फ ग्राउन्ड ह्यान्डलिङ अनुमति लिएको भएपनि उसँग ग्राउन्ड ह्यान्डलिङ सेवा संचालनका लागि आवश्यक उपकरण, जनशक्ति तथा अन्य क्षमता भए/नभएको अध्ययन गर्न मन्त्री भट्टराइले निर्देशन दिएका छन्। सोही क्रममा मन्त्री भट्टराईले अहिले तत्काल त्यो कामलाई रोक्ने निर्देशन दिएको स्रोतले बताएको हो।
नागरिक उड्डयन प्राधिकरणले असोज ४ गते हिमालयलाई आफ्ना जहाज आफैं भूमिस्थ प्रबन्ध (सेल्फ ग्राउन्ड ह्यान्डलिङ) गर्ने अनुमति दिएको थियो। प्राधिकरणका महानिर्देशक राजन पोखरेलको निर्णयबाट हिमालयलाई सेल्फ ग्राउन्ड ह्यान्डलिङ सेवा संचालनका लागि प्रमाणपत्र दिइएको थियो।
हाल संचालनमा रहेको एक मात्र अन्तर्राष्ट्रिय विमानस्थलमा व्यावसायिक ग्राउन्ड ह्यान्डलिङको सेवा नेपाल एयरलाइन्सले प्रदान गर्दै आएको छ। आर्थिक रुपमा संकट व्यहोर्दै आएको नेपाल एयरलाइन्सले ग्राउन्ड ह्यान्डलिङबाट वार्षिक ४ देखि ५ अर्ब रुपैयाँ आम्दानी गर्दै आएको छ। यसरी नेपाल एयरलाइन्सले गर्दै आएको व्यापार खोस्ने रणनीतिमा यती ग्रुपको हिमालय एयरलाइन्सलाई सेल्फ ग्राउन्ड ह्यान्डलिङ सेवा दिलाएर व्यावसायिक ग्राउन्ड ह्यान्डलिङ सेवा नै दिने तयारी भएको भन्दै विवाद उत्पन्न भएको थियो।
‘प्राधिकरणले ‘माथि’को दबाब थेग्न नसेपछि तत्काल हिमालयलाई सेल्फ ग्राउन्ड ह्यान्डलिङ सेवाबाट प्रवेश गराएको हो,’ स्रोतले नेपाल लाइभसँग भनेको छ, ‘विस्तारै नेपाल एयरलाइन्सको व्यापार खोसेर हिमालयलाई व्यावसायिक सेल्फ ग्राउन्ड ह्यान्डलिङ सेवा दिने तयारी भएको थियो। तर। विवादभएसँगै अहिले तत्काललाई मन्त्रीको निर्देशन पछि टरेको छ।'
नेपाल एयरलाइन्सले अहिले दिँदै आएको व्यावसायिक ग्राउन्ड ह्यान्डलिङ सेवाको सम्झौता अवधि आउँदो जेठबाट सकिँदै छ। सोही समयमा हिमालयलाई पनि केही एयरलाइन्स कम्पनीलाई व्यावसायिक ग्राउन्ड ह्यान्डलिङ सेवा दिन पाउने गरी यो खेल भएको थियो।
विमानस्थलमा यात्रा गर्ने यात्रुलाई बोर्डिङ पास जारी गर्ने, विमानसम्म गाडीमा लैजाने, ब्यागेज व्यवस्थापन गर्ने, र्याम्प, फ्लाइट अपरेसन एन्ड क्रु व्यवस्थापन, क्याटरिङ सेवा, इन्धन व्यवस्थापन, फ्रेट एन्ड मेल, ट्रान्जिट कार्गो, कुरियर ह्यान्डलिङ, वायुयानको सफाइ, एयरसाइड एम्बुलेन्सलगायतका सेवा ‘ग्राउन्ड ह्यान्डलिङ’भित्र पर्छन्।
प्राधिकरणले २ वर्ष अगाडि कतार एयरवेजले सेल्फ ग्राउन्ड ह्यान्डलिङ सेवाको प्रमाणपत्रका लागि निवेदन दिँदा भने सानो विमानस्थलमा थप कम्पनीलाई सेल्फ ग्राउन्ड ह्यान्डलिङ सेवा दिँदा उडान तथा सुरक्षामा समस्या आउने भन्दै प्रमाणपत्र दिएको थिएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
