काठमाडौं–आर्थिक तथा प्राविधिक कारणले दुई वर्षदेखि संकट बेहोर्दै आएको सौर्य एयरलाइन्स आक्रामक बजार विस्तारसँगै पुनः आन्तरिक उडानमा फर्कने भएको छ।
सौर्य एयरलाइन्सले भारतीय कुबेर समूहको लगानी भित्र्याउँदै पुनः आन्तरिक उडानमा फर्कन लागेको हो। दुई वटा रिआरजे बम्बार्डियर २०० जेट इन्जिनमार्फत् उडान गरिरहेको सौर्य एयरलाइन्स आर्थिक संकटमा फसेसँगै उडान बन्दजस्तै भएको थियो। दुई वटा जहाजमध्ये एउटा जहाज ग्राउन्डेड भएको थियो।
त्यतिमात्रै नभइ त्रिभुवन अन्तर्राष्ट्रिय विमानस्थल कार्यालयले लामो समयदेखि विमानस्थल सेवा शूल्क वापतको झन्डै २ करोड रुपैयाँ तिर्न नसकेपछि उडान नै बन्द गराईदिएको थियो। उडान बन्द भएसँगै बैंकहरुले एयरलाइन्सलाई दिएको ऋण असुलीका लागि लिलामी सूचनासमेत जारी गरेका थिए। आर्थिक संकटमा फस्दै गएको एयरलाइन्स कम्पनीले एक नेपाली व्यवसायिक ग्रुपलाई नै ६२ करोड रुपैयाँमा एयरलाइन्स बिक्री गरेको थियो। तर, उक्त कम्पनी खरिद गर्ने व्यवसायीहरुले एक करोड बैना दिए पनि अन्ततः खरिद बिक्री रद्द गरेका थिए।
त्यसपछि भने एयरलाइन्सका मालिक दीपक पोखरेलले भारतीय कुबेर ग्रुपको लगानी भित्र्याउँदै उडान सुरु गरेका थिए। एउटा जहाजबाट सातामा केही उडान गरिरहेको थियो। उडान गरे पनि सौर्यले एयरलाइन्स जोगाउनका लागि काम मात्रै भएको थियो।
त्यसैबीचमा कुबेर ग्रुपको सहयोग पाएको सौर्यले पुनः विमानस्थल तथा आयल निगमको बक्यौता रकम चुक्ता गर्दै लकडाउनकै बीचमा उडान बन्द भएका बेला नयाँ सिआरजे २०० जहाज नेपाल ल्याएको थियो।
सौर्यले अहिले पुनः पाइलट तथा प्राविधिक तयार गर्दै आन्तरिक उडानमा फर्कन लागेको हो। एयरलाइन्सले केही दिनभित्रै पाइलटहरुलाई एक साताको तालिममा पठाउँदै असोज दोस्रो साताबाट नियमित उडानमा फर्कने तयारी गरको हो।
सौर्यसँग अहिले सिआरजे २०० सिरिजका ३ वटा जहाज छन्। त्यसमा एउटा भने मर्मत हुँदै छ। दुई वटा सिआरजे जहाज भने उडान योग्य रहेको एयरलाइन्सका मालिक दीपक पोखरेलले जानकारी दिए। अब कुबेर ग्रुपको सहकार्यमा यसै आर्थिक वर्षमा ४ वटा एटिआर जहाज ल्याउँदै आन्तरिक उडानमा आक्रामक बजार विस्तारसँगै अगाडि बढेर गुमेको शाख जोगाउने उनको भनाइ छ।
यसै आर्थिक वर्षभित्र सौर्य एयरलाइन्सले भारतबाट २ वटा र युरोपबाट २ वटा सिआरजे जहाज थप्दै पोखरा, चितवन तथा सिमरामा उडान गर्ने योजना बनाएको छ। सौर्यले अहिले धनगढी, नेपालगञ्ज, भैरहवा, भद्रपुर र विराटनगरमा उडान गर्ने छ।
६ वर्षदेखि सञ्चालनमा रहेको सौर्य एयरलाइन्सले लकडाउनका बेला बन्द भएको सेवा सुरु गर्न लागको जनाएको छ।
असोज दोस्रो साताबाट ट्रंकका पाँचवटा गन्तव्य धनगढी, नेपालगञ्ज, भैरहवा, भद्रपुर र विराटनगरमा सेवा प्रदान गर्न लागिएको एयरलाइन्सका अध्यक्ष पोख्रेलले जानकारी दिए ।
सौर्य एयरलाइन्सले डेढ वर्ष अघिदेखि भारतको कुबेर समूहलाई साझेदारका रुपमा भित्र्याएर कम्पनी सञ्चालन गरिरहेको छ। कुवेर समूहका बिकास मालुले भारत र दुवईमा विभिन्न क्षेत्रमा लगानी गरेका छन् । यो समूहले १० वटा नयाँ जहाज खरिद गरि आक्रामक रुपमा कम्पनीलाई अगाडि लैजाने लक्ष्य लिएर अघि बढेको पोखरेलको भनाइ छ।
‘असोज दोस्रो साताबाट हामीले सेवा दिन सुरु गर्नेछौं,’अध्यक्ष पोख्रेलले भने, ‘केही समय बन्द रहे पनि यात्रु र ट्राभल एजेन्सीको विश्वासका कारण हामी पुनः नयाँ व्यवस्थाका साथ आएका छौं । साथै चाँडै नै थप चार वटा एटिआर विमान भित्र्याएर आफनो बजार बिस्तारका लागि अझ आक्रामक रुपमा आउनेछौं।’
उनका अनुसार अब झापाको चन्द्रगढी एउटा, विराटनगर तीन वटा, भैरहवा दुई वटा, नेपालगञ्ज दुई वटा र धनगढीमा दुई वटा वटा गरि दैनिक दश वटा उडान हुनेछ ।
विश्वलाई नै कोरोनाले आक्रान्त पारेको अवस्थामा नेपाल सरकारले जारी गरेको स्वास्थ्य मापदण्ड पूरा गरेर उडान सञ्चालन गर्न लागिएको एयरलाइन्सले जनाएको छ। ‘हामीले हाम्रा यात्रुको सेवा तथा स्वास्थ्यलाई पूर्ण प्राथमिकतामा राखेका छौं,’ पोख्रेलले भने, ‘पूर्ण रुपमा स्वास्थ्य सुरक्षाको मापदण्ड पूरा गरेर यात्रुलाई सेवा दिनेछौं ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
