काठमाडौं–सिन्धुपाल्चोकमा २०७१ यताका प्राकृतिक विपत्तिमा ३७८६ जनाको मृत्यु भएको छ। जिल्ला प्रहरी कार्यालय सिन्धुपाल्चोकको तथ्यांकअनुसार २०७१ यताका बाढीपहिरो, भूकम्पलगायतका प्राकृतिक विपत्तिबाट उक्त संख्यामा मानिसहरुको मृत्यु भएको हो। यसअवधिमा १५६५ जना घाइते भएका छन् भने ४६ जना बेपत्ता भएका छन्।
२०७१ साउन १७ गते राम्चेमा भीषण पहिरो खस्दा १४५ जनाको मृत्यु भएको थियो। उक्त जुरे पहिरोले २४ घण्टसम्म भोटेकोसी नदी थुनिएको थियो भने महिनौंसम्म अरनिको राजमार्ग अवरुद्ध भएको थियो।
यस्तै, २०७२ वैशाख १२ को विनाशकारी भूकम्पले सिन्धुपाल्चोकमा ठूलो मानवीय तथा भौतिक क्षति भयो। भूकम्पबाट ३५७१ जनाको मृत्यु भएको थियो भने १५६५ जना घाइते भएका छन्। ८ जना बेपत्ता छन्। भूकम्पमा जिल्लामा ७८ हजार ५ सय ३७ घर पूर्णरुपमा क्षतिग्रस्त भए भने विद्यालय र सरकारी भवनसमेत क्षतिग्रस्त भए।
यस्तै, २०७३ असार २१ गते भोटेकोसी नदीमा आएको बाढीले चीनको तिब्बतसँगको सिमानाका लिपिङबजारदेखि बाह्रबिसे बजारसम्मका तल्लो तटीय क्षेत्रका ६० घर बगाए।
२०७४ साउन ८ गते राति खसेको पहिरोले लार्चा पुल बगाउँदा भोटेकोसी र तातोपानीको सम्पर्क विच्छेद भयो भने २०७५ भदौ २ गते साँधी खोलमा आएको पहिरोले पक्की पुल बगायो।
२०७७ असार २४ गते बाह्रविसे ५ को जम्बु बजारमा माथिबाट आएको पहिरोले बस्ती पूरै पुरिएर २ जनाको मृत्यु भयो भने १७ जना बेपत्ता भएका छन्। २५ घर बस्न नमिल्ने गरी क्षति भएको छ। बाह्रविसेकै खागदलमा बाढीपहिरोले बस्ती पुरिँदा २२ घर बस्न नमिल्ने गरी क्षति भयो। भोटेकोसी गाउँपालिकाको बुल्कुटे पहिरोमा १ जनाको मृत्यु भयो भने ३ जना अझै बेपत्ता छन्।
२०७७ असार ३१ गते राति भोटेकोसी गाउँपालिकाको फुल्पिङ गाउँमा खसेको पहिरोमा परी एकै परिवारका ५ जनाको मृत्यु भयो भने साउ १८ गते राति मेलम्ची नगरपालिकाकोे मेलम्ची बजारनजिकैको पहिरोमा परी ८ मजदूरको मृत्यु भयो। सोही राति बरुवा स्वास्थ्यचौकीसँगै जोडिएको घर पहिरोले बगाउँदा २ जनाको मृत्यु भयो।
साउन २२ गते राति चौतारा साँगाचोकगढी नगरपालिका २ सेराफाँटमा ४ घर पुरिएर क्षति भयो। ाउन ३० गते बिहान जुगल गाउँपालिका २ गोल्चेस्थित लिदिमा गएको भीषण पहिरोमा ३७ पुरिँदा बेपत्ता भएका मध्ये ३९ जनामध्ये ३७ जनाको शव भेटियो भने २ जना बेपत्ताा भएका छन्।
यस्तै भदौ २७ गते राति बाह्रविसे नगरपालिका ७ घुम्थाङको भीरकोट, नेवारटोल र नागपुजेमा भीषण पहिरो जाँदा पुरिएर बेपत्ता भएका ३१ जनामध्ये १५ जनाको शव फेला परेको छ भने १६ जना अझै बेपत्ता भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
