दैलेख–दैलेखको क्षेत्र नम्बर २ (ख) का प्रदेशसभा सदस्य सुशील थापामाथि सांघातिक आक्रमण भएको छ। आफ्नो निर्वाचत क्षेत्रअन्तरगत भैरवी गाउँपालिका–३ को छड्ने भन्ने स्थानमा कार्यकर्ता भेटघाट तथा पार्टी प्रवेश कार्यक्रममा उनीमाथि आक्रमण भएको हो।
वडा नं ३ मा नेकपाको पार्टी कार्यालय स्थापनासँगै ४२ घरका करीब दुई सय जना नेपाली काँग्रेसका कार्यकर्ता पार्टी परित्याग गरी नेकपामा प्रवेश गर्ने कार्यक्रम आयोजना गरिएको थियो ।
‘आफ्नै निर्वाचन क्षेत्रमा भएकाले मलाई पनि त्यहाँ उपस्थितिका लागि खबर भयो, नेकपाका पालिकास्तरका नेता तथा कार्यकर्ता, गाउँपालिका उपप्रमुखलगायतको उपस्थिति थियो, बिहानको कार्यक्रम स्थानीयवासीको निधन भएकाले केही बेर ढिला गरी सञ्चालन भयो, मैले पार्टी कार्यालय उद्घाटनको बोर्ड राख्दै थिएँ, छ जनाको समूहले एकाएक आक्रमण शुरु गर्यो,' उनले भने।
अत्यधिकरुपमा मदिरा सेवन गरेको समूहले गाउँपालिकाका उपाध्यक्ष, नेकपाका पार्टी सचिवलगायतका नेतामाथि धमाधम आक्रमण गरेकाे र सबैलाई हुत्याउँदै आफूलाईसमेत आक्रमणको प्रयास गरिएकोमा जनताले बचाउन सफल भएकाे उनले बताए। त्यहाँ रक्तपात गर्ने योजना बनाएर दुल्लूका नेपाली काँग्रेसका नेताले योजनाबद्ध आक्रमण गर्ने प्रयास भएको उनकाे भनाइ थियाे। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
