काठमाडौं–सिन्धुपाल्चोकलाई एकपछि अर्को प्राकृतिक विपत्तिले छाडेको छैन। भोटेकोसीको बाढी अनि जुगल गाउँपालिकाको लिदिको पहिरो सकिन नपाउँदै बाह्रविसेमा पुनः ठूलो पहिरो गएको छ। पहिरोमा ठूलो मानवीय क्षति भएको खबर आएपछि बाह्रविसे नगरपालिकाको टोली घटनास्थलतर्फ हिँडेको मेयर निमफुन्जो शेर्पाले बताए।
लगातारको वर्षाले बाह्रविसे नगरपालिका ७ घुम्थाङको नागपुजे, भीरखर्क र चाङसारमा गएराति खसेको पहिरोले खसेको छ। यी तीनै क्षेत्रमा गरि १९ घर पुरिएको प्रारम्भिक जानकारी मेयर शेर्पाले बताए। नागपुजेमा कम्तिमा ८ घर, भीरखर्कमा कम्तिमा १० घर र चाङसारमा केही घर पुरिएको खबर आएको उनले बताए। नागपुजे पहिरोमा पुरिएकामध्ये एक महिलाको शव फेला परेको उनले बताए।
त्यहाँ कम्तिमा २० देखि २५ जना पहिरोमा पुरिएको हुन सक्ने आफूले सूचना पाएको बाह्रबिसे नगरपालिकाका प्रमुख शेर्पाले बताए। ‘ठूलै मानवीय क्षति भएको हुन सक्ने खबर सुनेर घटनास्थलतर्फ जाँदै छु’, शेर्पाले भने, ‘वडाध्यक्ष मीनबहादुर श्रेष्ठको घरसमेत त्यहाँ परेको सुनेको छु।’
उक्त क्षेत्र नगरको वडा ७ नम्बरमा पर्छ। पहिरोको खबर सुनेपछि सभामुख अग्निप्रसाद सापकोटा सिन्धुपाल्चोकको बाह्रबिसे नगरपालिका ७ घुम्थाङ हिँडेका छन्।
भीरखर्कका पुरिएका घर र बेपत्ता मानिसबारे नजिक पुगेर जानकारी लिन कठिन रहेको स्थानीयको भनाइ छ। त्यस्तै जुगल गाउँपालिका ५ चनौटेमा पहिरो जाँदा केही घर पुरिएका छन्। तर कुनै मानवीय क्षति नभएको नगरपालिकाले जनाएको छ।
घटनाको जानकारी पाएलगत्तै प्रहरी घटनास्थल तर्फ परिचालन गरिएको प्रमुख जिल्ला अधिकारी उमेशकुमार ढकालले बताए। जल तथा मौसम विज्ञान विभागको बाढी सूचना केन्द्रका अनुसार सिन्धुपाल्चोकका गुमथाङ, बाह्रविसे र आसपासका क्षेत्रमा ६ घण्टायता ठूलो वर्षा भएको थियो।
मौसमअनुकूल भए उद्धारका लागि हेलिकोप्टर पनि पठाउने तयारी भइरहेको प्रजिअ ढकालले बताए।
बलेफी र जलविरेमा जलसतह सतर्कता तहसम्म पुगेको र यो बढ्दो क्रममा रहेको केन्द्रले जनाएको छ। साथै भोटेकोशी, इन्द्रावती, मेलम्ची र सिन्धुपाल्चोकका अन्य साना नदीमा आकस्मिक बहाव हुन सक्ने र पहिरो जान सक्ने भएकाले बिहान १० बजेसम्म सतर्क रहन केन्द्रले आग्रह गरेको छ।
सिन्धुपाल्चोकमा गत साउन ३० गतेयता पटक–पटक बाढी र पहिरो आउँदा ठूलो मानवीय क्षति भएको छ। गत साउन ३० गते बिहान जुगल गाउँपालिका–२ लिदिमा गएको पहिरोमा पुरिएर ३७ जनाको मृत्यु भएको थियो। दुईजना अझै बेपत्ता छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769166231.png)
-1769158577.png)
-1769161919.png)
-1764146706.png)
