काठमाडौं–नेपाल पर्यटन बोर्डको समन्वयमा बुद्ध पर्यटन प्रमोसन समिति गठन भएको छ। भगवान् गौतम बुद्धको जन्मस्थल एवं विश्व शान्तिको उद्गम पवित्र भूमि लुम्बिनी तथा बुद्ध र बुद्धधर्मसँग सम्बन्धित धार्मिक, पुरातात्विक, ऐतिहासिक सम्पदाहरुको प्रवर्द्धन, बजारीकरण तथा प्रचार प्रसार गर्ने उद्देश्यले पर्यटन बोर्डका कार्यकारी प्रमुख डा. धनञ्जय रेग्मीको संयोजकत्वमा उक्त समिति गठन भएको हो।
लुम्बिनीलाई धार्मिक पर्यटन गन्तव्यको रुपमा प्रबद्र्धन गर्न सक्रिय पर्यटन व्यवसायी विक्रम पाण्डे सह–संयोजक रहेको सो समितिमा व्यवसायीहरु अम्बिका श्रेष्ठ, कर्ण शाक्य, बुद्ध धर्म संस्कृतिका अध्येता प्रा.डा.रमेश ढुङ्गेलदेखि म्यागसेसे पुरस्कार विजेता डा. सन्दुक रुइतसम्मका व्यक्तित्वहरु सदस्यहरू छन्।
लुम्बिनी विकास कोषको पनि प्रतिनिधित्व रहेको उक्त समितिले बुद्धसँग सम्बन्धित अन्य स्थलहरु जस्तै तिलौराकोट, रामग्राम, देवदह, कुदान, गोटिहवा, निग्लिहवा, सगरहवाको प्रवर्द्धन, ब्राण्डीङ, सौन्दर्यीकरण, प्याकेजिङ, अन्य वरिपरिका पर्यटकीय स्थलसँग जोड्ने कार्य, अन्तर्राष्ट्रिय बजारहरुमा प्रचार प्रसारको मोडालिटी तय गर्ने लगायतको विषयमा अध्ययन, विचार विमर्श गरि सोही अनुसारको कार्ययोजना बनाई तीनै तहका सरकारहरु, स्थानीय समुदाय, निजी क्षेत्र, लगानीकर्ता, अन्तर्राष्ट्रिय साझेदार संस्थाहरुसँग सहकार्य गर्ने कार्यक्रम तय गरेको छ।
यसका साथै पद्मसम्भव मार्ग, बृहत् लुम्बिनी क्षेत्र, लुम्बिनी सर्किट, बुद्धिस्ट सर्किट लगायतका महत्वपूर्ण पथ, परिपथहरुको व्यापक प्रवर्द्धन गर्ने लक्ष्य लिइएको छ। भैरहवामा निर्माणाधीन गौतम बुद्ध अन्तर्राष्ट्रिय विमानस्थलको निर्माण कार्य अन्तिम चरणमा पुगेको वर्तमान अवस्थामा एक अर्बभन्दा बढी संख्यामा रहेका बौद्धमार्गी तथा शान्तिप्रिय पर्यटकहरुलाई विभिन्न मुलुकहरुबाट नवनिर्मित अन्तर्राष्ट्रिय विमानस्थलका साथै स्थलमार्ग बाट लुम्बिनी ल्याउन पहलको समेत उक्त समितिले योजना बनाउने छ।
लुम्बिनी क्षेत्रमा प्रवेशसँगै शान्ति, धार्मिक भावना तथा पवित्रताको अनुभूति हुने प्रकारको विकास एवं सौन्दर्यीकरण गर्नका लागि सम्बन्धित निकायहरुलाई आवश्यक सुझाव दिने लक्ष्य यो समितिले लिएको छ।
यसबाट लुम्बिनी क्षेत्रका स्थानीय वासिन्दाको जीवनस्तरमा सुधार हुने तथा आय आर्जनको थप श्रोत प्राप्त हुने अपेक्षा गरिएको छ भने घरवासजस्ता कार्यक्रममार्फत् रोजगारी सृजना हुने अवस्था देखिन्छ। तसर्थ, सो समितिले लुम्बिनीक्षेत्र तथा समस्त बुद्ध धर्म, संस्कृति तथा दर्शनको विकास एवं प्रवर्द्धनका लागि समेत कार्य गर्ने अपेक्षा गरिएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
