विश्व

बेरुत विस्फोटको एक महिनापछि एक व्यक्ति जीवितै रहेको सङ्केतपछि खोजी जारी

नेपाल लाइभ शुक्रबार, भदौ १९, २०७७ २१:१७

एजेन्सी- बेरुत विस्फोटको एक महिनापछि भग्नावशेषमा एक व्यक्ति अझै जीवित रहेको हुनसक्ने रिपोर्टको आधारमा उद्धारकर्मीहरूले शुक्रबार खोजीलाई जारी राखेका छन्।

शहरको बन्दरगाहमा भएको विशाल विस्फोटको एक महिनापछि भग्नावशेषभित्र जीवित व्यक्ति पाउने चमत्कारी आशासहित खोजीलाई निरन्तरता दिइएको हो।

अगस्ट ४ को उक्त दुःखद विस्फोटका कारण १ सय ९१ जनाको ज्यान गएको थियो। लेबनानमा शान्ति स्थापनापछिको सबैभन्दा घातक घटना मानिएको यस दुर्घटनामा सात व्यक्ति अझै हराइरहेको सूचीमा रहेका छन्।

बिहीबार एक विशेषज्ञ उपकरणले एउटा घरको भग्नावशेषमा च्यापिएको अवस्थामा एक व्यक्तिको मुटुको धडकनको सङ्केत पाइएको बताएपछि खोजीलाई निरन्तरता दिइएको हो।

चिली र लेबनानका उद्धारकर्मीहरूले शुक्रबार हातहतियार प्रयोग गरेर नै भवनको भग्नावशेष हटाउने प्रयास गरेका थिए । तर अँध्यारो र हातले सिमेन्टले बनेका घरका अवरोधलाई हटाउन कठिनाइ भएपछि गेम्माएजेह र मार मिखाइलबीचको उक्त स्थानमा केही घन्टा उद्धारकार्यलाई रोकिएको थियो। रातभरको तयारीपछि उनीहरूले आफ्नो प्रयासलाई पुनः सुरु गरेको घटनास्थलका उपलब्ध एएफपी फोटोग्राफरले बताएका छन्।

लेबनानको नागरिक प्रतिरक्षाका जर्ज अबू मौसाले भने, ‘हामीले अवरोधलाई हटाएका छौं तर हामी भग्नावशेषमा मानिस जीवितै पाइने विश्वासलाई अझै गुमाएका छैनौं।’

चिली र लेबनानी उद्धारकर्ताहरूसँग समन्वय गरिरहेका निकोलस सादेले शुक्रबार पत्ता लगाएको धड्कन पहिलेको रेकर्डिंगको तुलनामा सुस्त भएको पाइएको छ।

‘ठूला भागहरू हटाएपछि हामीले फेरि मुटुको धड्कन वा श्वासप्रश्वासका लागि ‘स्क्यान’ गर्‍यौं, यसले धड्कन र श्वासप्रश्वासका सङ्केत बिहीबारको तुलनामा कम देखाएको छ अर्थात् प्रतिमिनेट सात पटक धड्कन मापन गरिएको उनले बताए।