काठमाडौं- रौतहटको माधवनारायण नगरपालिका-२ खेसरहिया टोलस्थित हनुमान मन्दिरका पुजारी श्रीराम साहको हत्यामा मुख्यतया तीन कारण रहेको खुलेको छ। पुजारी साहको हत्यामा संलग्न भएको आरोपमा बुधबार दुई जना पक्राउ परेपछि प्रहरीको प्रारम्भिक अनुसन्धानले यी तीन कारण रहेको खुलेको हो।
पुजारी साहको हत्या मुख्य तीन कारण भएको देखिएको प्रदेश २ का डिआइजी धिरजप्रताप सिंहले नेपाल लाइभलाई बताए। डिआइजी सिंहले भने, ‘पुजारीको हत्यामा हुनमा उनको खरो स्वभाव, व्यक्तिगत रिसिइबी र आर्थिक लेनदेन गरी तीन कारण देखिन्छ।’
पुजारी साह खरो स्वभावका व्यक्ति भएको र समाजमा हुने गरेका विसंगति विकृतिविरुद्ध आवाज उठाउने गरेका थिए। जुन कुरा रामनरेशलाई मन नपरेको रामनरेशले प्रहरीसमक्ष बताएको डिआइजी सिंहले उल्लेख गरे। समाज हुने झैझगडा र विवाद पुजारीकै अगुवाईमा मिलापत्र हुने कुरा रामनरेशलगायत हत्यामा संलग्नहरूलाई मन परेको थिएन। जसकारण पुजारी साह उनीहरुको नजरमा तारो बनेका थिए।
अर्को कारण पुजारी साह बस्ने मन्दिर नजिक तीन वटा रक्सी पसल छन्। हत्या आरोपमा पक्राउ परेका व्यक्तिहरु ती पसलमा गएर रक्सी पिउने र हल्ला गर्ने गर्थे। यस विषयमा पनि उनीहरुबीच विवाद भएको थियो। यसलाई उनीहरुले व्यक्तिगत रिसिइबीका रुपमा लिएको पाइएको डिआइजी सिंहले बताए।
तेस्रो कारण भनेको आर्थिक लेनदने देखिएको प्रहरीले जनाएको छ। पुजारी साहको रकम रामनरेशका बाबुले ब्याजमा लगेका थिए। उक्त रकम तिर्ने विषयमा समेत विवाद भएको पाइएको अनुसन्धानबाट पाइएको छ। जसकारण उनीहरुले पुजारीको हत्या गर्नेसम्मको योजना बनाएको मात्र होइन, वास्तवमा हत्या नै गरेको प्रारम्भिक अनुसन्धानबाट खुलेको डिआइजी सिंले बताए। पुजारीको कति रकम उनीहरुले चलाएका थिए भन्नेबारे खुलिनसकेको प्रहरीले जनाएको छ।
६५ वर्षीय साहको भदौ ३ गते राती करिब ९ बजे हुनमान मन्दिर परिसरमै गोली हानी हत्या गरिएको थियो। हत्यामा संलग्न भएको आरोपमा प्रदेश २ प्रहरी र जिल्ला प्रहरी कार्यालय रौतहटको टोलीले देवाही गोनाही नगरपालिका १ करुनियाका ३६ वर्षीय नरेश भनिने रामनरेश राउत पटेल र सोही ठाउँका २८ वर्षीय बालकुमार पटेललाई पक्राउ गरेको थियो।
उनीहरुलाई बौधिमाई नगरपालिका-७ बडकी बंकुल क्षेत्रबाट बुधबार बिहान १० बजे पक्राउ गरिएको थियो। घटनामा संलग्न भएको आरोप लागेका माधवनारायण नगरपालिका १ वडाध्यक्ष शेख नरुल्ला र अर्का एक जना फरार रहेको प्रहरीले जनाएको छ।
मााओवादी लडाकुले हानेका थिए पुजारीलाई गोली
हत्या आरोपमा पक्राउ परकेो दुई मध्ये रामनरेश पूर्वमाओवाली लडाकु रहेके पाइएको डिआइजी सिंले बताए। ‘रामनरेश पूर्वपिएलए रैछ। यसको पृष्ठभूमि आपराधिक देखिएको छ। यसैले नै पुजारीलाई गोली हानेको पाइयो,’ डिआइजी सिंहले नेपाल लाइभसँग भने। बालकुमार पटेलले मान्छेको निगरानी गरेका उनले बताए।
माओवादी लडाकुबाट छोडेपछि रामनरेश तराईमा सशस्त्र गतिविधि संचालन गर्दै आएका समूहमा समेत प्रवेश गरेका थिए। उनी जनतान्त्रिक समूहमा प्रवेश गरेर अपराधमा लागेको पाइएको प्रहरीले जनाएको छ।
पुजारी हत्या गर्नेले प्रहरीलाई पनि हानेका थिए खुकुरी
रामनरेशविरुद्ध ज्यान मार्ने उद्योगको मुद्दा जिल्ला प्रहरी कार्यालय गौरमासमेत रहेको पाइएको छ। उनले रौतहटमै सशस्त्र प्रहरी बलका सिपाही राजाराम पटेललाई समेत खुकुरी प्रहार गरी घाइते बनाएको अनसन्धानबाट खुलेको छ। सोही घटनामा उनीविरुद्ध ज्यान मार्ने उद्योगको मुद्दा रहेको डिआइजी सिंहले बताए।
उनीविरुद्ध रौतहटमा २०७१ असोज १ गते सशस्त्रका सिपाही राजाराममाथि खुकुरी प्रहार गरेको भन्दै मुद्दा दर्ता भएको थियो। उक्त मुद्दामा अहिलेसम्म उनी फरार नै थिए। लकडाउनको समयमा समेत रामनेशरको समूहले विभिन्न आपराधिक क्रियाकलापमा संलग्न रहेको पाइएको अनुस्न्धानबाट खुलेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
