भारतीय र चिनियाँ सैनिकबीच फेरि लद्दाखमा झडप

विश्व

नेपाल लाइभ सोमबार, भदौ १५, २०७७ १३:०६

एजेन्सी-भारत र चीनबीच फेरि सीमामा तनाव सिर्जना भएको छ। भारतीय र चिनियाँ सैनिकबीच यही २९ र ३० अगष्टको राति पूर्वी लद्दाखमा फेरि झडप भएको हो। झडपपछि भारतीय पक्षले सोमबार वक्तव्य जारी गर्दै चिनियाँ पक्ष जबर्जस्ती आफ्नो सीमाभित्र प्रवेश गर्ने प्रयास गरेको आरोप लगाएको छ।

पूर्वी लद्दाखको सीमालाई लिएर भएको सहमतिको चीनले उल्लंघन गरेको भारतले आरोप लगाएको छ।

चीनले सैनिकलाई उक्साउने खालका गतिविधि गरेर सीमाको अहिलेको यथास्थितिलाई परिवर्तन गर्ने कोशिस गरेको आरोप लगाउँदै भारतले चीनका त्यस्ता गतिविधिलाई भारतीय सैनिकले रोकेको जनाएको छ।

प्रेस इन्फर्मेशन ब्यूरो (पिआइबी) का तर्फबाट भारतले वक्तव्य जारी गरेको हो।

‘भारतीय सैनिकले पानगोंग त्सो लेकमा चिनियाँ सैनिकको उक्साउने खालको गतिविधिलाई रोकेका छन्। भारतीय सेना संवादमार्फत् शान्ति स्थापना गर्ने पक्षमा छ,’ वक्तव्यमा भनिएको छ, ‘योसँगै आफ्नो क्षेत्रको अखण्डताको सुरक्षाका लागि पनि प्रतिबद्ध छ। विवाद समाधानका लागि ब्रिगेड कमाण्डर तहमा बैठक जारी छ।’

भारतीय सेनाले चिनियाँ जनमुक्ति सेना (पीएलए) ले सीमा क्षेत्रमा अवस्था परिवर्तनको प्रयास गरेको तर आफूहरुले त्यो असफल पारेको दाबी गरेको छ। झडपमा क्षति भए–नभएकोबारे भने स्पष्ट पारिएको छैन।

यसअघि गत जुन १५ मा गलवान उपत्यकाको सीमा क्षेत्रमा भारतीय र चिनियाँ सेनाबीच भीडन्त हुँदा २० भारतीय सैनिकको ज्यान गएको थियो। त्यसपछि दुई देशबीच तनाव जारी छ। तनाव कम गर्नका लागि सैनिक तथा कूटनीतिक तहमा वार्ता भइरहेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।