काठमाडौं- भारतीय नागरिकहरू रेहान, विक्की गुप्ता कलवार र मुरारी महतोले नेपालमा अनलाइनमार्फत् ठगी गर्ने योजना बनाए। यसका लागि उनीहरूले अनलाइनमार्फत् नै नेपालमा साथी पनि बनाए।
पर्साको वीरगञ्ज–२९ का ३० वर्षीय कृष्णप्रसाद साह र वीरगञ्ज–३२ का २० वर्षीय सुनील साह भारतीय नागरिक रेहानसँग जोडिए। उनीहरु नाताले साला-भिनाजु हन्। कृष्ण भिनाजु हुन् भने सुनील साला। तिनै भारतीयको योजनामा नेपालमा ठगी धन्दाको आतंक मच्चाएका सालाभिनाजु अहिले केन्द्रीय कारागार सुन्धारामा छन्। काठमाडौं जिल्ला अदालतका न्यायाधीश श्रीकृष्ण भट्टराईको इजलासले उनीहरुलाई पुर्पक्षका लागि जेल चलान गरेको हो।
महानगरीय प्रहरी अपराध महाशाखाको टोलीले उनीहरुलाई असार ११ गते पक्राउ गरेको थियो। प्रहरीमा आएको जाहेरी अनुसार मात्रै यी सालाभिनाजुले नेपालमा १३ लाख ३९ हजार १ सय ४० रुपैयाँ ठगी गरिसकेको पाइएको छ।
उनीहरुलाई प्रयोग गरेर ठगी गर्ने तीन भारतीय नागरिक भने कारबाहीको दायरामा आएका छैनन्। भारतीयको योजनामा ठगी गरेको बयान उनीहरुले दिएका छन्। उनीहरुको ठगीको शैली भने नौलो किसिमको छ।
यसरी भएको थियो ठगी
अनलाइन सपिङका नाममा उनीहरुले ठगी गरेको पाइएको छ। यसका लागि फेसबुकलगायत सामाजिक सञ्जालमा उनीहरुले विभिन्न ब्राण्डका मोबाइललगायत सामानहरु सस्तो मूल्यमा दिने भन्दै फोटाहरु हाल्ने गरेका थिए। यो योजना उनै भारतीयको थियो। भारतीय नागरिकले भारतमै रहेर यो सब काम गरेका थिए।
यसरी सस्तो मूल्यमा सामान पाउने भएपछि नेपालमा रहेका विभिन्न व्यक्तिले सामान किन्न एडभान्स रकमसमेत दिएका थिए। उक्त रकम नै भारतीय नागरिकले यी दुई सालाभिनाजुको नाममा हाल्न लगाएको पाइएको महानगरीय प्रहरी परिसर काठमाडौंले जनाएको थियो।
कृष्णप्रसाद र सुनीलले आफ्नो नाममा आएको रकम निकालेर ठगीका योजनाकार भारतीय नागरिकहरुलाई पठाउने गरेको पाइएको थियो।
अनलाइनमार्फत् मोबाइल खरिद गर्ने भन्दै कञ्चन भण्डारीलाई जीवनकुमार यादवको नविल बैंकको खातामा ६५ हजार जम्मा गर्न लगाइ ठगी गरिएको थियो।
उता लक्ष्मी शर्मा गौतमलाई भने भारु १० लाख रुपैयाँ र १० तोला सुन पुरस्कार जितेको भन्दै भाइबर र ह्वाट्सएप म्यासेज पठाएका थिए। पुरस्कार लिनका लागि करवापतको ६० हजार रुपैयाँ चाहिने भन्दै मनमोहन कुमारको नाममा आइएमइ गर्न लगाएर ६० हजार रुपैयाँ ठगी गरेका थिए।
यस्तै, जेनिस मानन्धरको मोबाइलमा भने मोबाइल किन्नका लागि सम्पर्क गर्नु भनेर भारतीय एक नम्बरबाट म्यासेज आएको थियो। त्यसपछि उनले उक्त नम्बरमा सम्पर्क समेत गरेका थिए। मानन्धरलाई ७५ हजार रुपैयाँ पर्ने मोबाइल ४० हजार रुपैयाँका दरले उपलब्ध गराइदिने र होल डेलिभरीसमेत गराई दिने विश्वास दिलाइयो।
त्यसवापत एड्भान्स भन्दै उनीसँग १ लाख ६० हजार रुपैयाँ लिएर ठगी गरेको अनुसन्धानबाट खुलेको थियो।
‘एक लाख ६० हजारसम्म पर्ने आइफोन अब ६० हजारमा घरमै उपलब्ध’ फेसबुकमा साजन बनमालाले विज्ञापन देखे। एउटा आइफोनमै १ लाख रुपैयाँसम्म फाइदा हुने देखेपछि बनमालाले ७ लाख ८४ हजार हजार १ सय ४० रुपैयाँ एड्भान्सस्वरुप जम्मा गरिदिए। त्यसपछि भने सस्तोमा मोबाइल उपलब्ध गराइदिन्छु भन्ने भारतीय सम्पर्कविहीन भएका थिए।
जाहेरवाला प्रमिसा घिमिरेबाट १५ हजार, रोमन भट्टराईबाट ३० हजार, उज्ज्वल श्रेष्ठबाट २५ हजारलगायत गरी १३ लाख रुपैयाँभन्दा ठगी गरेका थिए।
सालाभेनाको बयान– भारतीयको पछि लाग्दा डुबियो
कृष्णको साथबाट प्रहरीले विभिन्न नम्बरका सिमकार्डहरू र विभिन्न व्यक्तिहरूको नामको भिसा कार्ड, नगद ७४ हजार ८ सय ७० रेमिटेन्स भौचर १ थान, चाँदीको जस्तो सिक्री १ थान बरामद गरेको थियो।
कृष्णप्रसाद साहले अनुसन्धान अधिकारीसमक्ष बयान गर्दा जाहेरवालाहरू कसैसँग पनि आफ्नो चिनजान नभएको बताएका छन्। भारतीय नागरिकहरू रेहान, विक्की गुप्ता कलवार र मुरारी महतो तथा नेपाली नागरिकहरू अनमोल राय र रविराज गुप्ता आफ्ना साथीहरू भएको उनको बयान थियो।
‘उनीहरुले अनलाइनमार्फत् विभिन्न व्यक्तिहरूलाई मोबाइल खरीद–बिक्री गर्ने र चिट्ठा जितेको झुट्टा कुरा गरी मोबाइलको मूल्य रकम र चिट्ठाको पुरस्कार लिन लाग्ने शूल्क विभिन्न व्यक्तिको बैंक खातामा जम्मा गर्न लगाउने र रकम लिने योजना बनाए। बैंक खातामा जम्मा भएको रकमबाट हिस्सा दिने गरी रकम भुक्तानी लिने जिम्मा मलाई दिएका थिए,’ कृष्णप्रसादले बयानमा भनेका छन्।
सोहीबमोजिम आफूले सुनीललाई साथमा लिई पर्सा, बारास्थित विभिन्न बैंकको एटिएम बुथबाट विभिन्न बैंकको भिसा कार्डमार्फत् भुक्तानी लिने गरेको उनले बताएका छन्।
कृष्णप्रसादले बयानमा अगाडि भनेका छन्, ‘भुक्तानी लिन प्रयोग भएको भिसा कार्ड रविराज गुप्ता र अनमोल रायले दिएका हुन्। मैले पटक–पटक विभिन्न व्यक्तिहरूको नामबाट आएको अन्दाजी ४ लाख जति भुक्तानी लिएँ होला। उक्त रकम रविराज गुप्ता र अनमोल रायलाई दिनुपथ्र्यो। निजहरूले प्रत्येक पटक भुक्तानी लिएको रकमबाट मलाई ३ देखि ५ हजार दिन्थे। भारतीयको पछि लाग्दा आज यस्तो हालत भयो।’
रविराज गुप्ताले अह्राए बमोजिम २/३ पटक पैसा निकालेर उसलाई दिएको र रविराजले आफूलाई मोबाइल र सिम पनि राख्न दिएको कृष्णप्रसादले बताएका छन्।
अर्का प्रतिवादी सुनीलसाह कानूले पनि जाहेरवालाहरु कसैलाई पनि नचिन्ने बताएका छन्। ‘प्रतिवादी कृष्णप्रसाद साह मेरो भिनाजु हुन्। उनले मलाई कहिलेकाहीँ बोलाई बाराको सिमरा तथा जितपुर शाखाका विभिन्न बैंहरूबाट रकम निकाल्ने गरेका थिए, को–कसको बैंक खाताबाट के कारोबारको रकम भुक्तानी लिएका हुन् मलाई जानकारी छैन,’ उनले बयानमा भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785139095.jpg)
-1764146706.png)
