सिन्धुपाल्चाेक- सिन्धुपाल्चोकको जुगल गाउँपालिकाको लिदीमा शुक्रबार बिहान गएको पहिरोमा परी ज्यान गुमाउनको संख्या १३ पुगेको छ। जिल्ला प्रशासन कार्यालय सिन्धुपाल्चोकका अनुसार शनिबार बिहान दुई जनाको शव निकालिएको छ।
शुक्रबार अबेरसम्म ११ जनाको शव फेला परेको थियो। पहिरोमा पुरिएकाहरुको खोजी कार्य जारी छ। अझै २५ जना पहिराेमा बेपत्ता रहेको प्रमुख जिल्ला अधिकारी उमेशकुमार ढकालले बताए।
बस्ती स्थानानान्तरण गर्न गृहमन्त्रीको निर्देशन
शुक्रबार पहिरो अवलोकन गर्न तत्कालीन राहत लिएर पुगेका गृहमन्त्री रामबहादुर थापाले उक्त क्षेत्रका जोखिमपूर्ण बस्तीहरु स्थानान्तरण गर्न निर्देशन दिएका छन्। गृहमन्त्रीसँग स्थानीयले आफूहरुले जोखिम रहेको भनि निवेदन दिएको तर त्यसको बेवास्ता गर्दा ठूलो मानवीय क्षति भएको गुनासो गरेका थिए। लगत्तै गृहमन्त्री थापाले प्रमुख जिल्ला अधिकार ढकाललाई उक्त क्षेत्रका जोखिमयुक्त सबै बस्तीहरु सुरक्षित स्थानमा सार्न भनेका छन्।
बागमती प्रदेश सरकारले घर बनाइदिने
शनिबार बिहान पहिरोस्थलमा पुगेका बागमती प्रदेशका मुख्यमन्त्री डोरमणि पौडेलले प्रदेश सरकारले घर बनाइदिने प्रतिबद्धता व्यक्त गरेका छन्। लिदीमा मुख्यमन्त्री पौडेलसहित प्रतिनिधि सभा सांसद शेरबहादुर तमाङ, बागमती प्रदेशका सामाजिक विकासमन्त्री युवराज दुलाल, उद्योग, पर्यटन, वन तथा वातवरणमन्त्री अरुण नेपाल, अर्थ तथा विकास समितिका सभापति सरेश नेपाल लगायतको टोलीले पीडितहरुलाई राहात सामग्री लिएर पुगेका हाे।
पहिरो पीडितहरुलाई तत्काल अस्थायी आवस बनाएर राखिदिने र वर्षापछि प्रदेश सरकारले पीडितहरुको घर बनाइदिने मुख्यमन्त्री पौडेलले प्रतिबद्धता गरेको सामाजिक विकासमन्त्री युवराज दुलालले बताए। वर्षापछि जिल्लामा सबै सरोकारवालहरुसँग छलफल गरेर लिदीलगायत जिल्लाका अन्य जोखिम बस्तीहरुलाई स्थानान्तरण गर्न प्रदेश सरकारले काम सुरु गर्ने प्रतिबद्धता गरेको र सोही अनुसार काम हुने उनले बताए।
बागमती प्रदेशले यसअघि नै जोखिमा रहेका बस्तीहरुलाई संघीय सरकारले जग्गा उपलब्ध गराएसँगै एकीकृत बस्ती बसाउने निर्णय गरेको र सोही अनुसार लिदीका पीडितहरुकाे पनि नयाँ बस्ती बन्ने मन्त्री दुलालले बताए।
मुख्यमन्त्रीसँगै रहेका यस क्षेत्रका प्रदेश सांसद सरेश नेपालले पीडितहरुलाई दीर्घकालीन रुपमा र दिगो समाधान हुने गरी बस्ती स्थानान्तरण लगायत अन्य सबै कामहरु गरिदिने बताएका छन्। पीडितहरुलाई आय आर्जन लगायतका कामहरुमा पनि प्रदेश सरकार गम्भीर भएर लाग्ने उनले जानकरी दिए।
मन्त्री दुलालले प्रदेश सरकारले भूमि आयोगसमेत गठन गरिसकेकाले जग्गा खोजेर असुरक्षित रुपमा बसोबास गरिरहेकाहरुलाई स्थानान्तरण गरिने उनले बताए। अहिले पीडितहरुको सुरक्षा र दैनिकी चलाउनका लागि स्थानीय सरकारसँग मिलेर प्रदेश सरकारले राहातको प्याकेज ल्याउने तयारी गरेको अर्थ तथा विकास समितिका सभापतिसमेत रहेका प्रदेश सासंद नेपालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1764146706.png)
