काठमाडौं– काठमाडौं महानगरपालिकास्थित वडा नम्बर १४ मा कोरोना संक्रमितको संख्या बुधबारसम्म ३५ पुगेको छ। पसले तथा घरमै बसिरहेका मानिसहरुमा पनि कोरोना संक्रमण देखिन थालेपछि संक्रमणले भयावह रुप लिएको भन्दै वडा पूर्णरुपमा सिलको तयारी गरिएको वडाध्यक्ष सोभा सापकोटाले बताइन्।
‘हाम्रो वडामा त कोरोना संक्रमणले भयावह रुप लिएको अवस्था छ। वडा कार्यालको एक तल्लामाथि घरभेटीलाई कोरोना संक्रमण पुष्टि भएपछि ४ दिनदेखि वडा कार्यालय पनि सिल छ,’ अध्यक्ष सापकोटाले नेपाल लाइभसँग भनिन्। घरभेटीलाई कोरोना पुष्टिभएसँगै वडाका १४ कर्मचारीसहित ५ जना जनप्रतिनिधिको पनि कोरोना परीक्षणको तयारी गरिएको छ।
घरभेटीको सम्पर्कमा रहिरहने सुरक्षा गार्ड र उनकी श्रीमतीको भने कोरोना परीक्षण गरिसकिएको र रिपोर्ट नेगेटिभ आएको अध्यक्ष सापकोटाले बताइन्। कार्यालय सिल भएसँगै जनप्रतिनिधि तथा कर्मचारीहरुले वडाको काम घरबाटै गरिरहेको सापकोटाले बताइन्।
ट्राभल हिस्ट्री नभएकालाई पनि कोरोना
वडाभित्र पसले तथा घरमै बसिरहेका मानिसहरुमा कोरोना संक्रमण देखिएको बताइएको छ। कुलेश्वरमा बुधबारमात्रै पसले तथा ट्राभल हिस्ट्री नभएका ८ जनामा कोरोना पुष्टि भएपछि संक्रमणले थप भयावह स्थिति लिएकाे देखिएको वडाध्यक्ष सापकोटाले बताइन्।
‘कुलेश्वरमा एक जना घरमै बसिरहेकी महिलामा कोरोना पुष्टि भएपछि हामीले उनका श्रीमानसहित दुई छोराछोरीमा कोरोना परीक्षण गराएका थियौँ। उनीहरु ३ जनामै कोरोना देखियो,’ अध्यक्ष सापकोटाले भनिन्।
हटस्पट कुलेश्वर
वडामा हालसम्म सबैभन्दा भयावहस्थिति कुलेश्वरमा देखिएको वडाध्यक्ष सापकोटाले बताइन्। ‘अहिले कुलेश्वरमा सबैभन्दा भयावह अवस्था देखिएको छ। पसलेहरुमै कोरोना देखिएपछि मंगलबारदेखि नै पसलहरु सिल गरेका छौँ,’ अध्यक्ष सापकोटाले भनिन्। कुलेश्वरमा मात्रै १५ जनामा कोरोना पुष्टि भएको छ।
कोरोना संक्रमितको सम्पर्कमा आएकाहरुको खोजी भइरहेको बताइएको छ। अहिलेसम्म कुलेश्वर क्षेत्रमा पसलेको सम्पर्कमा आएका १ सय जनाको सूची तयार गरी कोरोना परीक्षणका लागि पठाइएको छ।
लाम्पाटी र बल्खु क्षेत्रमा पनि कोरोना संक्रमण देखिएको छ। कोरोना संक्रमितहरुलाई अस्पताल पुर्याएर उनीहरुको सम्पर्कमा आएका व्यक्तिहरुको खोजी कार्य भइरहेको वडा कार्यालयले बताएको छ। बल्खु क्षेत्रमा कोरोना संक्रमितको सम्पर्कमा आएका ३२ जनाको कोरोना परीक्षण गराइएको र उनीहरु सबैको रिपोर्ट नेगेटिभ देखिएको अध्यक्ष सापकोटाले बताइन्।
अत्यावश्यक पसलहरु बिहान ५ बजेदेखि ९ बजेसम्म मात्रै खोल्न दिइने
वडाभित्र अत्यावश्यक खाद्यान्न, पानी, दुग्धजन्य पदार्थ, तरकारी फलफूललगायतका पसल बिहान ५ बजेदेखि ९ बजेसम्म मात्रै खुल्ला गर्न दिइने भएकाे छ। अत्यावश्यक बाहेकका अन्य सेवा भने बन्द गरिने वडाले जनाएको छ।
‘फलफूल पनि ल्याइसकेको बेच्न र अब नल्याउन हामीले पसलेहरुलाई निर्देशन दिएका छौँ,’ अध्यक्ष सापकोटाले नेपाल लाइभसँग भनिन्।
मालपोत कार्यालय र सहकारीका सेवा बन्द
कोरोना संक्रमणकाे संख्या तीव्र रुपमा फैलन थालेपछि १४ वडामा मालपोत कार्यालय तथा सहकारीहरुका सबै सेवा बुधबारदेखि नै बन्द गरिएको छ। अवस्था सामान्य नहुँदासम्मका लागि मालपोत, सहकारीलगायत भीडभाड हुने कार्यालयका सेवा बन्द गरिएको वडा कार्यालयले जनाएको छ।
बैंकका कर्मचारी घटाउने
बैंकको एउटा शाखामा २ देखि ३ जना कर्मचारीले मात्रै काम गर्ने गरी वातावरण मिलाउन बैंकहरुलाई निर्देशन दिइएको छ। बैंक अत्यावश्यक भएकाले सावधानी अपनाएर सेवा सञ्चालन गर्न निर्देशन दिइएको वडा कार्यालयले जनाएको छ।
सार्वजनिक यातायात पनि रोक्ने तयारी
सार्वजनिक सवारी सञ्चालनसँगै कोरोनाको जोखिम बढेको भन्दै वडाले सार्वजनिक सवारी पनि तत्कालका लागि चल्न नदिने गरी तयारी थालेको अध्यक्ष सापकोटाले बताइन्।
‘अहिले सार्वजनिक सवारी साधनहरु चलिरहेका छन्। हाम्रो वडाले मात्रै रोक्न मिल्दैन। तर जिल्ला प्रशासन र महानगरसँग समन्वय गरेर सार्वजनिक सवारी चल्न बन्द गराउने कि भनेर हामी सल्लाह गर्दैछौँ,’ अध्यक्ष सापकोटाले भनिन्। वडामा कोरोना संक्रमणले भयावह रुप लिन थालेपछि अन्य जनप्रतिनिधिहरु, उपभोक्ताहित समितिका पदाधिकारी नगर प्रहरी, जनपथ प्रहरीलगायत सबै सरोकारवालासँग समन्वय गरेर संक्रमण रोकथामका लागि प्रयास गरिरहेको अध्यक्ष सापकोटाको भनाई छ।
अध्यक्ष सापकोटा भन्छिन्,‘संक्रमितहरुसँग म सधै सम्पर्कमै छु। तपाईँहरु नआत्तिनुस् भनेर सान्त्वना दिइरहेकी छु।’ १४ वडाका सबै बिरामीहरुको अवस्था भने सामान्य छ उनीहरु टेकुलगायत उपत्यकाका अन्य अस्पतालका आइसोलेसनमा उपचाररत छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
