काठमाडौं- बन्द प्रशिक्षणमा बस्ने राष्ट्रिय फुटबल टिमका सबै खेलाडीको कोरोना भाइरस (कोभिड १९) को परीक्षणका लागि स्वाब संकलन गरिएको छ। सोमबार र मंगलबार दुई दिन गरी खेलाडीको स्वाब संकलन गरिएको हो।
अखिल नेपाल फुटबल संघ (एन्फा) ले सोमबार बाँकी रहेका २३ खेलाडी र ६ जना टिम अफिसियल गरी २९ जनाको स्वाब संकलन भएको जानकारी दिएको हो। अघिल्लो दिन सोमबार ११ खेलाडी दुई टिम अफिसियल र १२ होस्टेल स्टाफ गरी कुल २५ जनाको स्वाब संकलन गरिएको थियो।
एन्फाले भदौ १ गतेदेखि बन्द प्रशिक्षणमा राख्दै खेलाडीको अभ्यास थाल्ने योजना बनाएको छ। विश्वकपको दोस्रो चरणअन्तर्गत बाँकी रहेको खेलका लागि प्रारम्भिक टोली घोषणा गरी सकेको छ। प्रारम्भिक टिममा किरण चेम्जोङ, विकेश कुथु, विक्रम लामा, तेज तामाङ, आशिष लामा, अजित भण्डारी, एरिक विष्ट, सेसेहाङ आङ्दम्बे, अमित तामाङ, सुमन अर्याल, भरत खवास, सरोज दाहाल, अविशेक रिजाल, सुवास गुरुङ, अनन्त तामाङ, सुनिल बल, अञ्जन विष्ट रहेका छन्।
त्यस्तै, नवयुग श्रेष्ठ, विशाल श्रेष्ठ, रोहित चन्द, विकास खवास, जर्जप्रिन्स कार्की, सुजल श्रेष्ठ, रञ्जित धिमाल, मिक्चेन तामाङ, विशाल राई, रविशंकर पासवान, दर्शन गुरुङ, विमल राना, दिप कार्की, दिलेन लोप्ताङ, छिरिङ गुरुङ, देवेन्द्र तामाङ र पुजन उपरकोटी रहेका छन्।
बन्द प्रशिक्षणमा खेलाडीको लागि बस्ने, खानेदेखि सबै कुराको ब्यवस्था गरिएको छ। खेलाडीहरु एन्फा होस्टेलमै बस्ने छन्। कोरोना संक्रमणबाट जोगिन राम्रो ब्यवस्था गरेको एन्फाले दाबी गर्दै आएको छ।
नेपालले विश्वकप छनोटको दोस्रो चरणमा आफ्नै घरेलु मैदानमा तीन वटा खेल खेल्दैछ। असोज २२ मा चाइनिज ताइपेईविरुद्ध खेल्दैछ। त्यस्तै, अस्ट्रेलियासँग असोज २७ गते खेल्ने तालिका छ। दशरथ रंगशालामा नेपालले अन्तिम खेल जोर्डनसँग कात्तिक २७ गते खेल्नेछ।
थप तस्बिरमा -
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।