काठमाडौं- दूरसञ्चार सेवा प्रदायक एनसेल अनलाइन कक्षा तथा सिकाइका लागि डाटा तथा भ्वाइसकाे मासिक योजना ल्याएको छ। एनसेलले राष्ट्रिय निजी तथा आवासीय विद्यालय एसोसिएसन नेपाल (एनप्याब्सन) र निजी तथा आवासीय विद्यालय संघ (प्याब्सन)सँगको सहकार्यमा याे याेजना ल्याएकाे हाे।
कोरोना भाइरसको महामारीले गर्दा विद्यालयहरु बन्द भई अध्ययन अध्यापनमा असर परिरहेकोले अनलाइन कक्षा तथा सिकाइका लागि मासिक योजना ल्याएको एनसेलले जनाएकाे छ। यो योजना अनलाइन कक्षाका लागि एनसेलको मोबाइल कनेक्टिभिटी प्रयोग गर्ने एनप्याब्सन र प्याब्सनको समझदारीका आधारमा ल्याएको एनसेलले जनाएकाे छ। एनसेलका अनुसार याे सहकार्यले विद्यार्थी, शिक्षक-शिक्षिका र विद्यालयलाई मोबाइल ब्रोडव्याण्डमा पहुँच सुनिश्चित गर्ने उद्देश्य रहेकाे छ।
याे मासिक योजनामा विद्यार्थी तथा शिक्षक-शिक्षिकाले भ्वाइस, डेटा र एसएमएसको बन्डल सेवा प्राप्त गर्दछन्। विद्यार्थीले करबाहेक मासिक रु २५० मा अनलाइन कक्षाका लागि आवश्यक पर्ने जुम, गुगल मिट र माइक्रोसफ्ट टिम्स प्रयोगका लागि २० जिबी डेटा, १ जिबी थ्रिजी-फोरजी डेटा, २ जिबी फोरजी डेटा, सीयूजी नम्बरमा कल गर्न हरेक दिन १२० मिनेट टकटाइम, ५० मिनेट अन नेट टकटाइम र ५० अन नेट एसएमएस सेवा प्राप्त गर्नसक्ने एनसेलले जनाएकाे छ।
'कोभिड–१९ ले शिक्षा क्षेत्र लगायत सबै क्षेत्रमा असर पारेको छ। अध्ययन अध्यापनमा इन्टरनेट प्रविधिको प्रयोग बढेको छ। हामी सबै विस्तारै अबको ‘न्यु नर्मल’सँग अभ्यस्त भइरहेका बेलामा दूरशिक्षा आवश्यकता बनेको छ र यसले प्रविधि र अनलाइन शिक्षाको महत्व स्पष्ट रुपमा दर्शाएको छ,' एनसेलका चीफ कमर्सियल अफिसर प्रदीप श्रीवास्तवले भने, 'देशको शिक्षा क्षेत्रमा डिजिटाइजेसन र इ–लर्निङमा योगदान पुर्याउनका लागि एनप्याब्सन र प्याब्सनसँग सहकार्य गर्ने अवसर पाएकोमा हामी हर्षित छौं।'
एनप्याब्सनका अध्यक्ष ऋतु राज सापकोटाले विद्यालयहरुमा पठनपाठन कहिले देखि संचालन हुने निश्चित नभएको अवस्थामा अनलाइन माध्यमबाट विद्यार्थी र शिक्षक-शिक्षिकालाई अध्ययन अध्यापनमा सहयोग पुर्याउनका लागि एनसेलसँग यस विशेष योजनामा हातेमालो गर्न पाउँदा खुसी लागेकाे बताए।
'कोभिड–१९ ले निम्ताएको यस महामारीले हालको शिक्षण प्रणालीलाई नाटकीय ढंगले परिवर्तन गरिदिएको छ र सिकाइका लागि विश्वव्यापी रुपमानै भर्चुअल लर्निङ्को ट्रेन्ड अप्रत्याशित रुपमा बढेको छ,' प्याब्सनका अध्यक्ष टीकाराम पुरीले भने, 'विद्यालयहरुले हालका लागि भर्चुअल रुपमा नै कक्षाहरु संचालन गर्ने सरकारको नीतिमा यस सहकार्यले सहयोग पुर्याउनेमा हामी विश्वस्त छौं।' यस सहकार्यअनुसार एनप्याब्सन र प्याब्सनको सिफारिस पत्रका आधारमा सम्बन्धित विद्यालयका विद्यार्थी, शिक्षक-शिक्षिकाहरूले यो योजनाबाट फाइदा लिन सक्नेछन्। सिमको स्वामित्व विद्यार्थी वा सम्बन्धित शैक्षिक संस्थाको नाममा राख्न सकिनेछ एनसेलले जनाएकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
