काठमाडौं- स्पेनिस क्लब बार्सिलोनाका लागि यो सिजन ला लिगामा खराब समय रह्यो। लामो समय शीर्षमा रहेको बार्सिलोना कोरोनाले रोकिएर सुरु भएको लिगमा कमजोर हुँदै उपाधि गुमायो। अब च्याम्पियन्स लिगमा केन्द्रित क्लबका लागि पहिलेजस्तै खेलाडीको चोट समस्या बनिरहेको छ।
खेलाडीमा देखिएको चोटकै कारण बार्सिलोनाले यो सिजन सबै खेलाडीको प्रयोग गर्ने अवसर भने पायो। बार्सिलोना बी टिमबाट अन्सु फाती, रिकी पुइच र रोनाल्ड आरुखो समेत प्रयोग भए।
२०१९-२० को सिजनमा बार्सिलोनाका चार खेलाडी मात्र चोटबाट बचे। जसमा जेरार्ड पिके, सर्जियो बुस्केट्स, इभान राकिटिक र मार्टिन ब्रेथवेट रहेका छन्। त्यसमध्ये पिके र बुस्केट्स सबैभन्दा बढी प्रयोग भए।
चोटका कारण यो सिजन उसमान डेम्बेलेले सबैभन्दा बढी ३९ खेल गुमाए। उनको मैदानमा रहेको समय जम्मा ४ सय ९१ मिनेट रहेको छ। अहिले च्याम्पियन्स लिग अन्तिम १६ को खेलमा नापोलीविरुद्ध उनी खेल्छ सक्छन् सक्दैनन् अझै यकिन छैन।
चोटका कारण लुइस स्वारेज पनि लामो समय मैदानबाहिर रहे। उनको अभाव टिमको गोलमा खड्कियो। स्वारेजले सबै गरेर यो सिजन १७ खेल गुमाए। ला लिगामा २८ र च्याम्पियन्स लिगमा ५ खेल खेलेका उनले १९ गोल गरे भने ११ गोलको अवसर बनाए।
यस्तै खुट्टा र घुँडाकै चोटका कारण डिफेन्डर स्यामुअल उमटिटी भने यो सिजन १५ खेल त बाहिर रहेर नै गुमाए। त्यसबाहेक पनि चोटबाट राम्ररी फर्कन नसक्दा उनको यो सिजन खल्लो नै रह्यो। पछिल्लो समय क्लेमेन्ट लेङलेट पनि चोटमा छन्।
यी खेलाडी बाहेक पनि बार्सिलोनाका सुरुवाती टिममा नै पर्ने अरु खेलाडीहरुमा पनि चोटको समस्या देखियो। चोटका कारण जोर्डी अल्बाले १२ खेल गुमाए। सर्जि रोबर्टोले १०, फ्रान्क डि योङले सात साथै कप्तान लियोनल मेस्सीले पाँच खेल गुमाए।
यसैले पिके, बुस्केट्स, राकिटिक र ब्रेथवेट मात्र बार्सिलोना टिममा चोटमुक्त देखिए। राकिटिक पनि केही समय चोटमा थिए तर त्यो खेल बिश्रामको समयमा परेकाले कठिन भएन। गोलकिपर मार्क आन्द्रे टेर स्टेगन र नेटो पनि चोटले सताइएका थिए। एन्टोनी ग्रिजम्यान पनि रियल भायाडोयिलडविरुद्धको खेलमा चोटमा परेका थिए।
चोटकै कारण च्याम्पियन्स लिग खेलमा बार्सिलोनामा डिफेन्डर अभावको डर बढिरहेको छ। क्लेमेन्ट लेङलेट, स्यामुअल उमटिटीका साथै रोनाल्ड आरुखो चोटमा छन्। बार्सिलोना बी टिमबाट ए टिममा अभ्यासमा सामेल भइरहेका डिफेन्डर जर्ज क्युएन्का पनि चोटमा परेका छन्। यस्तै बी टिमकै डिफेन्डर ड्यानी मारेर पनि चोटमा छन्।
यसैले अगस्ट ८ मा नापोलीविरुद्ध हुने च्याम्पियन्स लिग अन्तिम १६ को दोस्रो लेगमा बार्सिलोनाको कठिनाइ बढेको छ। पहिलो लेग १-१ को बराबरी भएको खेलबाट बार्सिलोना अघि बढ्नुपर्नेछ।
आउँदो सिजन युभेन्टसमा पठाउने सम्झौतामा रहेका आर्थर मेलो अहिले टिमको अभ्यासमा सामेल नभइ ब्राजिल गएर बसिरहेका छन्। यस्तै डिफेन्समा अब्बल हुन सक्ने मिडफिल्डरहरु आर्टुरो भिडाल र सर्जियो बुस्केट्स एक खेलको प्रतिबन्धमा छन्।
च्याम्पियन्स लिगमा राम्रो गर्न नसके प्रशिक्षक क्विके सेटियनकै भविष्यमाथि प्रश्न उठ्नेछ। यस्तोमा अब उनको योजना के हुन्छ भन्ने पनि यकिन छैन। आर्थर मेलोलाई युभेन्टस पठाउँदा नै आलोचना भोगेको बार्सिलोना बोर्डले त्यसलाई सुधार गर्न पनि भूमिका देखाउनुपर्नेछ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।