वामदेवलाई भेट्न प्रधानमन्त्री ओली महासचिव पौडेलसहित भैँसेपाटीमा

राजनीति

वीरेन्द्र ओली मंगलबार, साउन १३, २०७७ २०:१७

काठमाडौं- पार्टीभित्रको विवाद चर्किरहेका बेला प्रधानमन्त्री केपी शर्मा ओलीले पार्टीका नेता वामदेव गौतमसँग भेटघाट गरिरहेका छन्। उनीहरूबीच बेलुका ७ बजेदेखि छलफल सुरु भएको वामदेव गौतमनिकट एक नेताले नेपाल लाइभलाई जानकारी दिए।

भैँसेपाटीस्थित वामदेव गौतमको निवासमा उनीहरूबीच छलफल सुरु भएको हो। छलफलमा पार्टीका महासचिव विष्णु पौडेलसमेत सहभागी भएको ती नेताले जानकारी दिए।

मंगलबार प्रधानमन्त्रीसमेत रहेका अध्यक्ष केपी शर्मा ओली इतर पक्षको स्थायी कमिटी बैठकमा ओलीलाई दुवै पदबाट राजीनामा दिन नपर्ने धारणा राखेका थिए। दुवै पदबाट राजीनामा दिन लगाउँदा पार्टी एकतामा असर पर्ने उनको धारणा थियो। ओली इतर पक्षका स्थायी कमिटी बैठकमा आफूप्रति नरम अभिव्यक्ति दिएपछि प्रधानमन्त्री ओली गौतम निवास भैँसेपाटी पुगेका हुन्।

तर बैठकमा वामदेवले धारणा राखेलगत्तै नेता भीम रावलले उठेर कुनै व्यक्ति हटाउनका लागि लडाईं नभएको तर पार्टीमा पद्धति बसाल्नका लागि भएको भन्दै गौतमप्रति आक्रामक अभिव्यक्ति दिएका थिए।

ओली इतर पक्षको स्थायी कमिटी सदस्यहरुको बैठकले छिटो बैठक राख्ने पहलकदमी लिने जिम्मा पार्टीका अर्का अध्यक्ष प्रचण्डलाई दिएको छ।

'यस विषम परिस्थितिमा पार्टीको एकता र विधि र परम्परालाई ध्यानमा राखी अर्का अध्यक्ष केपी शर्मा ओलीसँग छलफल गरी बैठक सुचारु गर्न पार्टी अध्यक्ष प्रचण्डलाई जिम्मेवारी दिने निर्णय बैठकले गर्‍यो,' बैठकपछि प्रवक्ता नारायणकाजी श्रेष्ठले भनेका थिए।

ओली पक्षले मंगलबार बिहान स्थायी कमिटी बैठक स्थगित गरेका थिए। बैठकले केपी ओलीले बैठक स्थगित भएको सूचना प्रशारित गर्नु उचित नभएको ठहर गरेको छ।

'आजको स्थायी कमिटीको बैठको मिति र समय यसअघिको स्थायी कमिटीको बैठकले नै निर्णय गरेको थियो,' प्रवक्ता श्रेष्ठले भनेका थिए, 'आजको बैठक केपी शर्मा ओलीले विधि विपरित स्थगित भएको सूचना प्रशारित गर्नु उचित थिएन।'

बैठकमा २९ स्थायी कमिटी सदस्य र दुई जना आमन्त्रित सदस्य सहभागी भएको श्रेष्ठले बताएका थिए।

यसका साथसाथै पार्टी एकताको रक्षा गर्न, पार्टीलाई विधि पद्धित सम्मत ढंगले अगाडि बढाउन र पार्टीको वर्तमान संकटलाई सकारात्मक ढंगले निकास दिन योगदान पुर्‍याउनका लागि पार्टीका सबै नेता तथा कार्यकर्ता सदस्यहरुलाई आआफ्नो ठाउँबाट भूमिका खेल्न आह्वान पनि गरेको थियो।

आजको बैठकअघि पुष्पकमल दाहाल प्रचण्ड र झलनाथ खनाल केपी ओलीलाई भेट्न गएका थिए। त्यहाँ प्रचण्ड र झलनाथ खनालले ओलीलाई बैठकमा उपस्थित हुन र बैठकलाई अगाडि बढाउन अनुरोध गरेको श्रेष्ठले बताए। 'उहाँले त्यसलाई स्वीकार गर्नुभएन,' उनले भने।

सम्बन्धित समाचार:
नेकपाका बहुमत स्थायी कमिटी सदस्यको बैठक सकियो