फाइल फोटो: नेकपा स्थायी कमिटी बैठक
काठमाडौं- आज बस्ने भनिएको नेपाल कम्युनिस्ट पार्टी (नेकपा) को स्थायी कमिटी बैठकका लागि सदस्यहरु बालुवाटार प्रवेश गरेका छन्। यद्यपि, बैठक भने स्थगित भएको सूचना सार्वजनिक भएको छ।
केपी ओली पक्षले एकलौटी ढंगले बैठक स्थगित गरेको भन्दै पुष्पकमल दाहाल प्रचण्ड तथा माधव नेपाल पक्षले भने बैठक बस्ने बताएका छन्। यो समूहका नेताहरुले अब पनि बैठक नबसेर पार्टीलाई अनिर्णयको बन्दी बनाउन नसकिने भन्दै केही दिनयता आजको बैठक भने बस्ने बताउँदै आएको थियो।
'एकलौटी ढंगले बैठक स्थगित गरियो। हामीले बैठक चलाउँछौँ। पार्टीमा कुनै परामर्श नगरी स्थगित गरियो। यसरी बैठक स्थगित गरेर हुँदैन। पार्टीलाई अनिर्णयको बन्दी बनाउन मिल्दैन', एक स्थायी कमिटी सदस्यले भने।
नेता माधवकुमार नेपालले ओलीले एकतर्फी रुपमा बैठक रोक्न खोज्दैमा नराेकिने भन्दै प्रचण्डसँग सल्लाह गरेर बैठक चलाउने बताए।
बैठकमा भाग लिन प्रचण्ड, झलनाथ खनाल, माधव नेपाल, नारायणकाजी श्रेष्ठ, मातृका यादव, गणेश साह, युवराज ज्ञवाली, हरिबोल गजुरेल, मुकुन्द न्यौपाने लगायतका नेताहरु बालुवाटार प्रवेश गरिसकेका छन्।
स्थायी कमिटीमा प्रचण्ड पक्षका १९ जना सदस्य छन्। माधव नेपाल तथा झलनाथ खनाल पक्षका १५ जना सदस्य छन्। त्यस्तै, केपी ओलीका पक्षमा ११ जना मात्रै छन्।
पटकपटक स्थगित
असार १० गतेदेखि स्थायी कमिटी बैठक सुरु भएको थियो। पहिलो दिन अध्यक्ष ओली र प्रचण्डले मात्रै धारणा राखेर १२ गतेसम्म बैठक स्थगित भयो। असार १२ गते बसेको बैठक असार १४ र १५ गते स्थगित भयो। १६ गते बैठक सुरु भयो।
असार १६, १७ र १८ गते स्थायी कमिटी बैठक बसी १९ गते स्थगित गरी २० गतेका लागि बैठक बोलाइयो। पार्टीमा सहमति हुन नसकेपछि पुनः असार २२ गतेसम्मका लागि स्थगित भयो। असार २२ गते बैठक बस्न नसकेपछि २४ गतेका लागि बोलाइयो। फेरि असार २४ गते पनि बैठक बस्न नसकेपछि असार २६ गतेका लागि तय भएको थियो।
असार २६ गते बाढी पहिरो आएको भन्दै साउन २ गते बिहान ११ बजे बैठक बोलाइयो। शुक्रबार बिहान ११ बजे बैठक बस्न नसकेपछि दिउँसो ३ बजेका लागि बैठक सारियो। ३ बजे पनि बैठक बस्न नसकेपछि आइतबार दिउँसो ४ बजेसम्मका लागि बैठक स्थगित भयो।
साउन ४ गते बैठक बस्न नसकेपछि साउन ६ गते बिहान ११ बजे बस्ने तय भयो। बिहान ११ बजे बैठक बस्न नसकेपछि दिउँसो एक बजे बैठक बोलाएपनि एक घण्टा बस्न नपाउँदै बाढीपहिरोबाट जनधनको क्षति भएकाले साउन १३ गतेसम्मलाई बैठक स्थगित गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789375192.jpeg)
_ZtgGYzEpDO-1789120936.webp)
-1786602170.png)
