काठमाडौं- सम्बन्ध विच्छेद भएको भन्दै सुधीर बस्नेतकी श्रीमती नितु थापा बस्नेतले आफ्नो नाममा रहेको सेयर फुकुवा गर्न समस्याग्रस्त सहकारी व्यवस्थापन समितिमा निवेदन दिएकी छन्।
सुधीर बस्नेतले संचालन गरेको ओरेन्टल कोअपरेटिभ लिमिटेड समस्याग्रस्त घोषणा भएपछि त्यसको व्यवस्थापनको जिम्मा समस्याग्रस्त सहकारी व्यवस्थापन समितिले लिएको छ। बस्नेतकी श्रीमतीलगायत उनको परिवारका सदस्यको नाममा रहेको सम्पत्ति पनि समितिले रोक्का गरेको छ। तर सुधीर बस्नेत र उनकी श्रीमती नितु थापा बस्नेतबीच सम्बन्ध विच्छेद भइसकेका कारण उनको नाममा रहेको सम्पत्ति समितिले रोक्का राख्न नपाउने फैसला सर्वोच्चले गरेपछि उनले निवेदन दिएको सहस्याग्रस्त सहकारी व्यवस्थापन समितिका अध्यक्ष कुमारप्रसाद पोखरेलले बताए।
नितु थापा बस्नेतको नाममा ग्लोबल आइएमइ बैंकमा १ लाख ८६ हजार कित्ता सेयर (समितिको तथ्यांकमा उल्लेख भएअनुसार) छ। सेयरधनी नम्बर १६९१२७ कायम रहेको ५० हजार ३ सय ८७ कित्ता साधारण सेयर र सेयरधनी नम्बर १४३२६८ कायम रहेको १ लाख ३६ हजार २ सय ३३ कित्ता संस्थापक सेयर उनको नाममा छ।
अध्यक्ष पोखरेलका अनुसार सेयर फुकुवाका लागि निवेदन दिएपनि समितिले निर्णय भने गरिसकेको छैन। ‘सुधीर बस्नेतकी श्रीमती नितु बस्नेतको नाममा रहेको सेयर समितिले रोक्का राखेको थियो। तर उनीहरुबीच सम्बन्ध विच्छेद भइसकेकाले नितु बस्नेतका नाममा रहेको सेयर रोक्का राख्न मिल्दैन भनेर सर्वोच्च अदालतले एउटा फैसला गरेको रहेछ।’ अध्यक्ष पोखरेलले भने‚ ‘त्यही फैसलाका आधारमा सेयर फुकुवाका लागि निवेदन आएको थियो। यस विषयमा केही निर्णय भइसकेको छैन। फैसलाको पूर्ण पाठ कुर्ने र थप अध्ययन गरेर मात्रै निर्णय गर्ने समितिको तयारी छ।’
समस्याग्रस्त व्यवस्थापन समितिले ओरेन्टल सहकारीका तत्कालीन महाप्रबन्धक राजेश श्रेष्ठ तथा उनको श्रीमती प्रतिमा शर्मा र नितु थापा बस्नेतको नाममा रहेको सेयर सम्पत्ति २०७५ सालमै बेच्न खोजेको थियो। ती व्यक्तिका नाममा विभिन्न बैंक तथा वित्तीय संस्थाको सेयर बिक्री गर्न खोज्दा सर्वोच्च अदालतले २०७५ माघ ६ गते अन्तरिम आदेश दिँदै उक्त सेयर बेचबिखन गर्न नपाउने भनेको थियो।
सर्वोच्च अदालतले पछिल्लो समय समितिलाई सुधीर बस्नेतका सम्बन्धमा थप केही निर्णय नगर्नू र कामकारबाही अगाडि नबढाउनु भन्ने आदेश दिएको छ।
व्यवस्थापन समितिबाट ओरेन्टल सहकारी बाहिरिन सक्ने फैसला सर्वोच्चबाट भएपनि सुधीर बस्नेत र ओरेन्टलसँग सम्बन्धित अरु मुद्दाहरुको फैसला बाँकी रहेका कारण तत्काल निस्कन सक्ने भने देखिँदैन। डेढ दर्जन बढी मुद्दा अदालतमा चलिरहेकोमा हालसम्ममा ७ वटा मुद्दाको मात्रै फैसला भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
