सुर्खेत- नयाँ शैक्षिक सत्रका लागि विद्यार्थी भर्ना अभियान सुरु भएसँगै यतिबेला सुर्खेतका विद्यालयहरुले धमाधम विद्यार्थी भर्ना गरिरहेका छन्। सामुदायिक तथा निजी विद्यालयमा विद्यार्थी भर्ना अभियानले तीव्रता पाएको हो।
विद्यालय उमेर समूहका सबै बालबालिकालाई विद्यालय सेवाभित्र ल्याउनका लागि चरणबद्ध रुपमा भर्ना अभियान सञ्चालन गर्न लागिएको छ। पहिलो चरणमा विद्यालयहरुले भर्ना मिति खुलाएर विद्यार्थी भर्ना लिइरहेका छन्। यसरी भर्ना गरिसकेपछि छुटेका विद्यार्थीहरुको खोजी गरी भर्ना गरिने शिक्षा विकास तथा समन्वय इकाइ सुर्खेतले जनाएको छ। पहिलो चरणमा बैसाख १५ गतेसम्म विद्यालयहरुले भर्ना लिन सक्नेछन्।
विद्यालयहरुले अहिले आफ्नो सेवा क्षेत्रभित्र विद्यार्थी भर्नाका लागि अभियान सञ्चालन गरिरहेका छन्। स्थानीय सरकारको समन्वयमा घरदैलो गर्नेसम्मका कार्य भइरहेका छन्। ‘कोही पनि विद्यालय जान पाउने अभियानबाट वञ्चित हुन नपरोस् भनेर अभियान सञ्चालन भइरहेको छ,’ शिक्षा विकास तथा समन्वय इकाइका सूचना अधिकारी भोजप्रसाद लम्सालले भने। उनले अभियानअन्तर्गत अनिवार्य शिक्षाका लागि विद्यार्थी भर्ना, विद्यालय स्वागत तथा विद्यार्थी टिकाउ र सिकाइ उपलब्धिमा सुधार लगायत कार्यक्रम गरिने जनाए।
विपन्नको संख्या पहिचान हुँदै
विद्यार्थी भर्नासँगसँगै विपन्न अवस्थाका बालबालिकाहरुको खोजी पनि सुरु गरिएको छ।
कमजोर आर्थिक अवस्थाका बालबालिकाहरुको अध्ययनमा सहयोग गर्नका लागि उनीहरुको खोजी पनि गरिएको जनाइएको छ। ‘भर्ना अभियान अन्तर्गत कमजोर आर्थिक अवस्था भएकै कारण पढ्न नसकेकालाई निश्चित कक्षा वा तहको जिम्मा वा अभिभावकत्व गराइदिने कार्यक्रम पनि छ,’ सूचना अधिकारी लम्सालले भने। यसका लागि विपन्न बालबालिकाहरुको संख्या पहिचानका लागि पनि काम भइरहेको उनले जानकारी दिए। ‘हामीले विद्यालयहरुमा नाजुक अवस्थामा रहेका बालबालिकाहरुको संख्या खोजिरहेका छौं,' उनले भने, ‘उनीहरुको अवस्था हेरेर सहयोग गर्नेछौं।’
अति आवश्यक देखिएकालाई सहयोगका लागि पहल गरिरहेको उनले जनाए। ‘शिक्षामा एक सय रुपैयाँ लगानी गर्न समेत नसक्ने वर्ग पनि रहेछ, हाम्रो समाजमा,’ लम्साल भन्छन्, ‘नगरी नहुने अवस्थाकालाई सहयोग आवश्यक पनि रहेछ।’
अभिभावकत्व ग्रहणका लागि अपिल
यसैबीच शिक्षा विकास तथा समन्वय इकाइले कमजोर आर्थिक अवस्था भएका बालबालिकाहरुको पढाइका लागि अभिभावकत्व ग्रहण गर्न अपिल गरेको छ। कतिपय बालबालिकाहरुका लागि विपनन्नता पढाइमा बाधा बनेको भन्दै कार्यालयले उनीहरुको पढ्ने अधिकारलाई सुनिश्चित गर्नका लागि सबैले सहयोग गर्नुपर्ने जनाएको छ।
इकाइका प्रमुख जितबहादुर शाहले विपन्न बालबालिकाहरुको अभिभावकत्व ग्रहणका लागि अपिल गरेका हुन्। पाठ्यक्रम र शिक्षण सिकाइ सेवालाई विद्यालयले नि:शुल्क बनाए पनि पोसाक, आवश्यक स्टेशनरी, खाजा लगायतको खर्चको अभावले गर्दा कतिपय बालबालिका विद्यालय भर्ना भएर पनि पढाइलाई निरन्तरता दिन सकिका छैनन्। त्यस्ता प्रकृतिका बालबालिकाहरुको तथ्यांक संकलन भइरहेको जानकारी दिदै शाहले उनीहरुलाई सहयोगका लागि सबैसँग आग्रह गरे।
'एक विद्यार्थी भर्ना मेरो सामाजिक दायित्व’ भन्ने नाराका साथ विद्यार्थी भर्ना अभियान सञ्चालन भइरहेको छ। सोही अभियानलाई सफल पार्न र अप्ठेरो परिवेशका बालबालिकाहरुको शैक्षिक भविष्य सुनिश्चित गर्न अपिल गरिएको हो। साथै इकाइले अभिभावकत्व ग्रहण गर्ने कार्यको औपचारिक उद्घाटन केही दिनभित्रै गरिने जानकारी दिएको छ। कुनै पनि बालबालिका पढ्नबाट वञ्चित नहुन् भनेर यस्तो अभियानको सुरुवात गरिएको प्रमुख शाहको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1791537767.jpeg)
-1786602170.png)
