काठमाडौं-यातायात व्यवसायीहरुले निजी सवारीसाधनले निर्वाध रुपमा भाडाका यात्रु बोकेको भन्दै गृहसचिवलाई ध्यानाकर्षण पत्र बुझाएका छन्। नेपाल यातायात व्यवसायी राष्ट्रिय महासंघका अध्यक्ष योगेन्द्रमान कर्माचार्य, महासचिव सरोज सिटौला लगायतको टोलीले गृह मन्त्रालयमा ध्यानाकर्षण पत्र बुझाएको हो।
सरकारले कोरोना संक्रमणको जोखिम बढ्ने भन्दै सार्वजनिक सवारी बन्द गरेकाे अवस्थामा रातो नम्बर प्लेटका सवारीले यात्रु ओसारिरहेको र यात्रुबाट पनि ठूलो दरको भाडा असुल भइरहेको दाबी महासंघले गरेको छ।
गृहसचिव महेश्वर न्यौपानेलाई बुझाइएको पत्रमा सार्वजनिक सवारी बन्द गरेर बस्नुपर्दा व्यवसायीलाई ठूलो मार परिरहेको भन्दै यही बेला निजी सवारीले भाडाका यात्रु बोक्दा संक्रमण नियन्त्रणका लागि व्यवसायीले गरेको त्यागको अवमूल्यन भएको उल्लेख छ।
रातो नम्बर प्लेटका निजी सवारीले भाडामा यात्रु बोक्दा कोरोना संक्रमण नहुने जसरी कानुनविपरीत भएको काममा सरकारले बेवास्ता गरेको महासंघका महासचिव सरोज सिटौलाले बताए। ‘हामीले गृहसचिवलाई भेटेर कानुनविपरीत भएका काम रोक्न आग्रह गरेका छौं,’ सिटौलाले भने। उनले सरकारले दिएको निर्देशनअनुसार यातायात व्यवसायीहरु अनुशासित भएर बसेको अवस्थामा निजी सवारीहरुले यसैलाई मौका बनाएर कमाउधन्दा चलाइरहँदा सरकारले बेवास्ता गरेको आरोप लगाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
